పాఠకులకు నమస్కారం.

ఈ సారి ‘నుడి’ని ఒక్క తప్పు కూడా లేకుండా పూరించినవారు ముగ్గురు. వారు:

1. కార్తీక్ చంద్ర, పి.వి.ఎస్.

2. రవిచంద్ర ఇనగంటి

3. పి. సి. రాములు

ఒక తప్పుతో పూరించినవారు ఒకరు. వారు:

1. శుభ

విజేతలకు అభినందనలు. ఇక కొన్ని ఆధారాలకు జవాబులు, వాటికి వివరణలు చూద్దాం.

Nudi 24 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-23 ఫలితాలు, జవాబులు, వివరణలు

పాఠకులకు నమస్కారం.

ఈసారి ‘నుడి’ని ఒక్క తప్పు కూడా లేకుండా పూరించినవారు ఒక్కరే. వారు: పి.సి. రాములు

ఒక తప్పుతో పూరించినవారు ముగ్గురు. వారు:
1. హేమనళిని
2. కార్తీక్ చంద్ర, పి.వి.ఎస్.
3. టి. చంద్రశేఖర రెడ్డి

విజేతలకు అభినందనలు.

ఇక గత ‘నుడి’ జవాబులను, వాటికి వివరణలను చూద్దాం.

1 అడ్డం: దీనికి జవాబు నిజాము. ఏలిక అంటే పరిపాలన అనే కాక రాజు అనే అర్థం కూడా ఉన్నదని తెలిస్తేనే ఈ ఆధారానికి సమాధానాన్ని కనుక్కోగలం. సత్యం = నిజము. అందులోని మధ్య అక్షరమైన ‘జ’ సాగితే ‘జా’ అవుతుంది. అప్పుడు ఏర్పడే నిజాము జవాబు.

3 అడ్డం: హంసల్లా మైనస్ హం = సల్లా. పంది మైనస్ ది = పం. సల్లా + పం = సల్లాపం. కనుక, జవాబు సల్లాపం. సల్లాపం అంటే సంభాషణ, ముచ్చట.

7 అడ్డం: ఆంగ్లంలో తాళంచెవి = కీ (key). వేడి వకీలు మైనస్ కీ = వేడివలు. దీన్ని సవరించగా వచ్చే వడివేలు జవాబు.

8 అడ్డం: రామూను రివర్స్ చేస్తే మూరా వస్తుంది. తాగు అటుదిటుగా = గుతా. రామూలో గుతాను చేరిస్తే వచ్చే మూగుతారా ఇక్కడ జవాబు.

9 అడ్డం: దీనికి జవాబు స్తావాలు. స్తావాలు అంటే పొగడ్తలు. మొదట్లో ఉన్న దీర్ఘాన్ని తీస్తే స్తవాలు. అప్పుడు కూడా అర్థం మారదు. ఎందుకంటే, స్తవము అన్నా స్తావము అన్నా పొగడ్తే.

11 అడ్డం: శివుడు = రుద్రుడు. శివుని = రుద్ర. కన్ను = అక్షి. కన్నులు కలవాడ = అక్ష. రుద్ర + అక్ష = రుద్రాక్ష. అదే జవాబు. కొందరు రుద్రాక్షి అని నింపారు.

13 అడ్డం: ఆధారం = ఊతం. ఊలుకి సైతం మైనస్ ఊతం = లుకిసై. దీన్ని రివర్స్ చేస్తే వచ్చే సైకిలు సమాధానం.

16 అడ్డం: ప్రారంభరహితంగా వేశాం = శాం. ఒకరి మైనస్ ఒ = కరి. శాం + కరి = శాంకరి. అంటే అమ్మవారు (పార్వతి) కనుక, అదే సమాధానం.

17 అడ్డం: తరుమకు మైనస్ త = రుమకు. దీన్ని తారుమారు చేస్తే వచ్చే కురుమ ఒక వర్ణం. వర్ణం = కులం. కనుక, జవాబు కురుమ.

19 అడ్డం: కాడు = అడవి, శ్మశానం. కనుక, కాడుపై అన్నది జవాబు.

22 అడ్డం: చూడు = కను. దుఃఖం = వగ. తిరగేసిన దుఃఖం = గవ. కను + గవ = కనుగవ = అక్షియుగళం. కనుక, అదే సమాధానం.

25 అడ్డం: దీనికి సమాధానం డుల్లుట, లేక డుల్లడం.

26 అడ్డం: ‘మది’లో ‘నా’ చేరితే మనాది వస్తుంది. సమాధానం అదే. మనాది = దిగులు.

1 నిలువు: నీ పలువరుసని మైనస్ పస = నీలువరుని. దీన్ని మిశ్రమం చేయగా వచ్చే నిలువనీరు ఇక్కడ సమాధానం.

4 నిలువు: అనుస్వారం అంటే సున్న. ‘రామా చాపలు’లో సున్న చేరి సర్దుకుంటే వచ్చే పంచారామాలు ఇక్కడ జవాబు. ఆరామము = తోట.

10 నిలువు: వాడి మగడు అంటే శూరుడు అనే అర్థం ఉంది. కనుక, అదే సమాధానం.

12 నిలువు: కవీంద్రా లోని మధ్య అక్షరమైన ‘వీం’ ‘వి’గా మారింది. అప్పుడు కవిద్రా వస్తుంది. దీన్ని తారుమారు చేయగా వచ్చే ద్రావిక = చొంగ. కనుక, ద్రావిక సమాధానం. కొందరు ద్రావక అని పూరించారు.

18 నిలువు: మనసు = మది. నిరవధికంగాలో మొదటి సగం నిరవ. దీన్ని ‘రవని’గా మార్చి ‘మది’లో చేరిస్తే వచ్చే మరవనిది సమాధానం.

20 నిలువు: కమురు అనంతంగా = కము. పై + కము = పైకము. జవాబు అదే.

ఈ నెల ‘నుడి’ (No. 24) తో రెండు సంవత్సరాల కాలం పూర్తయింది. ఇంతటితో ఈ శీర్షికా నిర్వహణను ఆపేస్తున్నాను. వచ్చే నెలలో కేవలం ఈ నెల ‘నుడి’ తాలూకు ఫలితాలు, జవాబులు, వివరణలు మాత్రమే ఉంటాయి. ఈ రెండు సంవత్సరాల కాలంలో ఈ శీర్షికను అభిమానించడమే కాక, నాతో ఎంతగానో సహకరించిన పాఠకులకు, సంపాదకులకు నా హృదయపూర్వక కృతజ్ఞతలు. సెలవు.

**** (*) ****

Nudi 22 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-22 ఫలితాలు, జవాబులు, వివరణలు

పాఠకులకు నమస్కారం.

ఈసారి ఒక్క తప్పు కూడా లేకుండా పూరించినవారు ఐదుగురు. వారు:
1. హేమనళిని
2. రవిచంద్ర, ఇనగంటి
3. పి.సి. రాములు
4. నాగరాజు రవీందర్
5. టి. సుధేంద్ర రెడ్డి

ఒక తప్పుతో నింపినవారు ముగ్గురు. వారు:
1. వి. దీప్తి
2. మమత
3. టి. చంద్రశేఖర రెడ్డి

విజేతలకు అభినందనలు. ఇక ఆధారాలకు జవాబులను, వాటికి వివరణలను చూద్దాం.

1 అడ్డం: దీనికి జవాబు అయిన తానీషా ఆధారంలోనే చెక్కు చెదరకుండా ఉన్నాడు, చూడండి.

5 అడ్డం: శత్రువు = అరి. మరణం = చావు. శత్రువు మరణం = అరిచావు. కాని, పూర్తి కాలేదు అంటున్నాం కనుక, చివరి అక్షరాన్ని తీసేయాలి. అప్పుడు వచ్చే అరిచా = కేక వేశా. కనుక, అదే సమాధానం.

7 అడ్డం: నాశనం చేసేవారు = నాశకులు. తారుమారు చేస్తే వచ్చే శకునాలు = శుభాశుభ సూచనలు. కాబట్టి, జవాబు శకునాలు.

8 అడ్డం: ఇక్కడ చింక దారి anagram. కరిచిందా అన్నది జవాబు.

9 అడ్డం: ‘కలిపాక’లో శీర్షం (తల) = క. దాన్ని మైనస్ చేసి, వెనుకకు తెస్తే వచ్చే కపాలి సమాధానం.

11 అడ్డం: దీనికి సమాధానం కంకటి. కంకటి అంటే వెదురుమంచం. ‘ఇక’లో రెండక్షరాలున్నాయి. మొదటిదైన ‘ఇ’ పూర్వార్ధమైతే, రెండవదైన ‘క’ ఉత్తరార్ధం (అర్ధం = సగం). ‘క’ ను కంటి అనే అక్షరాల నడుమ చేర్చితే కంకటి వస్తుంది. అదే సమాధానం. పారిజాతాపహరణ కావ్యంలో కోపం, అలుక నిండిన సత్యభామను వర్ణిస్తూ

మాసిన చీర గట్టుకొని మౌనముతోడ నిరస్తభూషయై
వాసెన కట్టుగట్టి నిడువాలిక కస్తురి పట్టు వెట్టి, లో
గాసిలి చీకటింటి కడ కంకటిపై జలదాంత చంద్రరే
ఖా సదృశాంగియై పొరలె గాఢ మనోజవిషాదవేదనన్

అంటాడు తిమ్మన, అద్భుతంగా.

13 అడ్డం: ‘కవితలు’లో ‘వి’ ధ్వంసమైతే మిగిలే కతలు ఈ ఆధారానికి జవాబు.

15 అడ్డం: ‘హంసమూలాలకు’ మైనస్ ‘కులాల’ = హంసమూ. దీన్ని సర్దుబాటు చేస్తే వచ్చే సమూహం జవాబు.

16 అడ్డం: దీనికి జవాబు మలుపు. మెత్తుట = పులుముట. కాబట్టి, మెత్త = పులుమ. దీన్ని తారుమారు చేస్తే మలుపు వస్తుంది.

17 అడ్డం: ఆన = ఒట్టు కనుక, ‘ఆచారి మన’ మైనస్ ‘ఆన’ = చారిమ = సౌందర్యం. జవాబు చారిమ.

19 అడ్డం: ‘పోల్చుకో’ నడుమ తేలికైతే పోలుకో వస్తుంది. దాన్ని రివర్స్ చేస్తే వచ్చే కోలుపో ఇక్కడ జవాబు.

21 అడ్డం: దీనికి జవాబు వేరు వేరు. వేరు = Root. వేరు = Different.

22 అడ్డం: ఇక్కడ చాలా మంది తడబడ్డారు. దాతృక్షమ, దాన చేవ మొదలైన సమాధానాలను రాశారు. నేను మొదట దాత చేవను సరైన సమాధానంగా నిర్ణయించుకున్నాను. కాని, దాతృచేవను కూడా ఎందుకు ఒప్పుకోగూడదు అనిపించింది. చేవ సంస్కృతపదం కాకపోవడం వల్ల దాతృచేవ వైరిసమాసమౌతుంది. అంత మాత్రాన ఒప్పుకోకపోయే అవసరం లేదనుకుని, మొదటి నిర్ణయాన్ని మార్చుకున్నాను.

23 అడ్డం: ‘పాట యొక్క దారి’ – దీన్లోని 2, 4, 6 అక్షరాలను కలుపగా వచ్చే టక్కరి ఇక్కడ జవాబు.

25 అడ్డం: లిఖిస్తే = రాస్తే. ‘రానట్టు వస్తే’ మైనస్ ‘రాస్తే’ = నట్టువ = నాట్యం. జవాబు నట్టువ.

26 అడ్డం: తెలుగులో వైరులు = శత్రువులు. ఇంగ్లిష్ లో వైరులు (wires) = తీగలు. కాబట్టి, వైరులు సమాధానం.

1 నిలువు: ‘రాశాం’కు అటూయిటూ ‘తాకం’ ఉంటే తారాశాంకం వస్తుంది. మధ్యన శ (శకారం) వేస్తే వచ్చే తారాశశాంకం సమాధానం.

4 నిలువు: తోవలు = దారులు. దీనికి ముందు చందా (రివర్సులో దాచం) రాస్తే వచ్చే చందాదారులు ఇక్కడ జవాబు.

5 నిలువు: పులుముట = అలుకుట. కాబట్టి, అలుక సమాధానం.

12 నిలువు: జంటను ఇంగ్లిష్ లో కపుల్ (couple) అంటాము. బూట్ ను బూటు అన్నట్టే కపుల్ ను కపులు అనవచ్చు. ఇక కపి = కోతి. కపులు = కోతులు. కనుక, జవాబు కపులు.

14 నిలువు: ‘మరి తటాకాలు’ లోని మొదటి సగాన్ని మిశ్రమం చేస్తే వచ్చే తమరి = మీ యొక్క. కనుక, అదే జవాబు.

16 నిలువు: No way = నోవే. దీనికి మదన చేర్చి కలగలిపితే వచ్చే మనో వేదన ఇక్కడ జవాబు. నిజానికి మథనపడు అన్నది సరైన పదం. కాని, మదన అనే అక్షరాల సమూహం ‘పడితే’ (కలిస్తే) అని నా ఉద్దేశం.

18 నిలువు: నీ + నా = మన. శాపాలకు విరుద్ధం వరాలు. మన + వరాలు = మనవరాలు = దౌహిత్రి. కనుక, జవాబు మనవరాలు.

19 నిలువు: ఊరు కొస = రు. దీనికి అటూయిటూ ‘కోట’ ఉంటే వచ్చే కోరుట ఇక్కడ సమాధానం.

24 నిలువు: ‘ఒక్కరి’లో మొదటి అక్షరం లేకుంటే ‘క్కరి’ వస్తుంది. రిక్క = చుక్క కనుక, క్కరి సమాధానం.

**** (*) ****

Nudi 22 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-21 ఫలితాలు, జవాబులు, వివరణలు

పాఠకులకు నమస్కారం.

ఈ సారి ‘నుడి’ని ఒక్క తప్పు కూడా లేకుండా పూరించినవారు ఒక్కరే. వారు: టి చంద్రశేఖర్ రెడ్డి.

ఒక తప్పుతో పూరించినవారు కూడా ఒక్కరే. వారు: నాగరాజు రవీందర్.

విజేతలకు అభినందనలు.

ఇక కొన్ని ఆధారాలకు సమాధానాలను, వాటికి వివరణలను చూద్దామా?

1 అడ్డం: పర్ణములు = ఆకులు. పర్ణములు లేనిది = అపర్ణ. సమాధానం అపర్ణ.

7 అడ్డం: నల్లికత లోని మొదటి అక్షరమైన ‘న’ ను బరువు చేయటం అంటే ‘న్న’ గా మార్చటం. అప్పుడు ఏర్పడే న్నల్లికతను క్రమీకరిస్తే కన్నతల్లి వస్తుంది. అదే జవాబు.

8 అడ్డం: ఇక్కడ పొక్క వడి అన్నది anagram. దాన్ని తారుమారు చేస్తే వచ్చే వక్కపొడి సమాధానం.

9 అడ్డం: సమాధానమైన ‘కురుచ’ ఆధారంలోనే తారుమారుగా వుంది. చూడండి.

11 అడ్డం: దీనికి జవాబు యంత్రణ లేక యంత్రణం. యంత్రం = మర.
15 అడ్డం: ఇక్కడ కొందరు తడబడ్డారు: ఉగాది, హేవళం, నవాది అని పూరించారు. దీనికి సరైన సమాధానం నవాబ్దం. అయితే నవాబ్ది అని రాసినా ఒప్పుగా అంగీకరించడం జరిగింది. ఎందుకంటే, ఆ పదం బాగా వాడుకలో ఉండటమే కాక, స్థిరపడిపోయింది (శతాబ్ది ఎక్స్ ప్రెస్ అంటున్నాం). కాని, స్ట్రిక్టుగా చూస్తే నవాబ్ది కూడా తప్పే. ఎందుకంటే తెలుగు భాషలో అబ్ది అనే పదం లేదు, అబ్దము మాత్రమే ఉంది. ఇక నవాబ్ధి అని రాస్తే మాత్రం నిస్సందేహంగా (శుద్ధ) తప్పే. అబ్ధి అంటే సముద్రం కనుక, నవాబ్ధి = కొత్త సముద్రం అవుతుంది.

16 అడ్డం: ఈ ఆధారానికి జవాబు ఈ ముఖం. ఈము = మంచు.

21 అడ్డం: మా వూరి పొలిమేరలు అంటే మా వూరి లోని మొదటి, చివరి అక్షరాలైన మా,రి. వచ్చెయ్యకు = రాకు. రాకు + మారి = రాకుమారి = రాజుగారి పుత్రిక.

22 అడ్డం: అరుదైన పక్షులు = రాయంచలు. ఇక్కడ రాల సంచయంలో ‘సం’ ను హృదయంగా భావించాలి. ఎందుకంటే, అది హృదయం లాగా మధ్యన వుంది. రాల సంచయంలోంచి ‘సం’ ను మైనస్ చేసి తారుమారు చేస్తే రాయంచల వస్తుంది. అదే సమాధానం.

25 అడ్డం: టక్ టక్ అనేవి తలుపు మీద గొళ్లెంతో కాని, వేలి వెనుక భాగం లాంటి మరేదైనా వస్తువుతో కాని కొడితే వచ్చే శబ్దాలు. ఇక టక్కులు అంటే మోసాలు కూడా. కనుక, అదే సమాధానం.
26 అడ్డం: తప్పకుండా రాయాల్సినవి = తు.చ. అనే అక్షరాలు. తు.చ. తప్పకుడా రాయాలి అని అంటుంటాం కదా. ఇక లిఖించు = రాయి. తు + రాయి = తురాయి = ఒక రకమైన అలంకరణ. కనుక, తురాయి జవాబు.
1 నిలువు: M.V. = యంవీ. యంవీ కప్పతో ‘అ’ సంయోజనం చెందితే (కలిస్తే) ‘యంవీకప్పఅ’ వస్తుంది. దీన్ని తారుమారు చేస్తే వచ్చే అప్పకవీయం సమాధానం.

2 నిలువు: దీనికి జవాబు శాటి. శాటి = శాలువ. ఉపగ్రహం = శాటిలైటు. శాటిలైటు మైనస్ లైటు = శాటి.

6 నిలువు: చవకగా అనే పదంలోని చివర ‘గా’. దాన్ని తీసేసి కలగాపులగం చేస్తే వచ్చే కవచ ఇక్కడ జవాబు. ‘లాలు కుండ’ సర్దుకుని అంటే కుండలాలు అన్న మాట. కవచ కుండలాలులో కవచ తర్వాత కుండలాలు వస్తుంది.

10 నిలువు: ఇక్కడ కూడా చాలా మంది తడబడ్డారు. రుద్రాగారమా, రుద్రవాసమా, రుద్రవనమా, అంటూ రకరకాలుగా పూరించారు. నిజానికి రుద్రావాసమా అనే పదమే కనపడింది ముఖ్యమైన నిఘంటువుల్లో. ఈ పదానికి వెండికొండ, శ్మశానం అనే రెండు అర్థాలు ఇవ్వబడినాయి. అయితే ఆవాసము అన్నా, వాసము అన్నా ఇల్లు కనుక, ‘రుద్రవాసమా?’ను కూడా సరైనదిగా ఎంచడం జరిగింది.

14 నిలువు: వ్యాయామంలోని ఒక రకమైన గరిడీ ఇక్కడ జవాబు. సాము = సగము. సాముగరిడీ అంటాం కదా.

16 నిలువు: వయసు = ఈడు. వయసే = ఈడే. శిల = రాయి. శిల అట = రాయట. ఈడే + రాయట = ఈడేరాయట = సిద్ధించాయట. కనుక, ఈడేరాయట అనేది సమాధానం.

18 నిలువు: యిక పిలవాలి అనంతంగా అంటే యిక పిలవాలి లోని చివరి అక్షరాన్ని (‘లి’ని) తీసేయాలని అర్థం. అట్లా చేస్తే ‘యికపిలవా’ వస్తుంది. దాన్ని మిశ్రమం చేస్తే వచ్చే కపిలవాయి సమాధానం. కపిలవాయి లింగమూర్తి గారు శతాధిక గ్రంథకర్త. తెలంగాణ ప్రభుత్వం ఆయనకు అత్యున్నత సాహితీ పురస్కారాన్నిచ్చి గౌరవించింది.

19 నిలువు: చక్రవర్తి = నల. తల నరికి లోంచి నల మైనస్ చేస్తే వచ్చే తరికి ఇక్కడ సమాధానం. తరి = సమయం.

20 నిలువు: ఈ ఆధారానికి షరాబు అనేది జవాబు. షరాబు = సేటు, తాగేది (షరాబ్)

**** (*) ****

Nudi 21 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-20 ఫలితాలు, జవాబులు, వివరణలు

పాఠకులకు నమస్కారం.

ఈ సారి ‘నుడి’ని ఒక్క తప్పు కూడా లేకుండా పూరించినవారు ఇద్దరు. వారు:
1. రవిచంద్ర, ఇనగంటి
2. పి. సి. రాములు.

ఒక తప్పుతో పూరించిన వారు ముగ్గురు.
1. కార్తీక్ చంద్ర, పి.వి.ఎస్.
2. రాంమోహన్ రావు, తుమ్మూరి
3. ఫణీంద్ర, పురాణ పణ్డ.

విజేతలకు అభినందనలు.

ఇక కొన్ని ఆధారాలకు సమాధానాలను, వాటికి వివరణలను చూద్దాం.

1 అడ్డం: ఎస్ = S. ఎస్ తర్వాతది = T (ఆంగ్ల వర్ణమాలలో). సగం = అర. ఎస్ తర్వాతది సగం అంటే టి-అర. దీన్నే అరటి అని మార్చినా అర్థం మారదు. కనుక సమాధానం అరటి. కొందరు అనాస అని, మరికొందరు అవును అని నింపారు.

3 అడ్డం: తుంపర వర్షం = ముసురు. దాన్ని రివర్స్ చేస్తే వచ్చే రుసుము సమాధానం.

8 అడ్డం: దీనికి జవాబు పిడికిలి. ఇది ఆధారంలో అటుదిటుగా ఉంది, చూడండి.

15 అడ్డం: దీనికి జవాబైన అంతస్తు కూడా ఆధారంలో కుడినుండి ఎడమకు ఉంది.

16 అడ్డం: పువ్వు = విరి. ఆవిరి మైనస్ విరి = ఆ. దాచిపెట్టం = దాయం. ఆ + దాయం = ఆదాయం. అదే జవాబు.

19 అడ్డం: మ్యాట్రెస్ = పరుపు. మ్యాట్రెసే = పరుపే. దీన్ని తారుమారు చేస్తే వచ్చే పేపరు జవాబు.

22 అడ్డం: మానయము, మాముయన అని నింపారు కొందరు. ‘నయమై’ క్రమంగా వస్తే ‘యమైన’ ఏర్పడుతుంది. దీన్ని ‘మా’కు కలిపితే = మాయమైన = అదృశ్యమైన. కాబట్టి, మాయమైన అన్నది జవాబు.

1 నిలువు: సు అనే అక్షరం విశేషణం కదా (సు = మంచి). సుతారి అవక మైనస్ సు = తారి అవక. దీన్ని కలగాపులగం చేస్తే వచ్చే అవతారిక జవాబు.

4 నిలువు: సమాన దూరంలో ఉన్నవి అంటే ఇక్కడ అక్షరం విడిచి అక్షరం అన్న మాట. ‘మేము మూసగాలిలోన చుక్కలం’ లోని 2, 4, 6, 8, 10 వ అక్షరాలను కలుపగా వచ్చే ముసలి నక్క సమాధానం.

5 నిలువు: దీనికి సమాధానం భయంగా. క్షతి = గాయం. భయంగాలో గాయం కిందనుండి పైకి వచ్చింది, చూడండి.

6 నిలువు: మోట = కపిల. జుట్టు = పిలక. కనుక, కపిల జవాబు.

12 నిలువు: పదారణాలలో – ఇందులో ఆరు అక్షరాలున్నాయి. మొదటి మూడక్షరాలను మిశ్రమం చెయ్యగా వచ్చే పరదా = తెర. కనుక, అదే జవాబు.

14 నిలువు: కారణాలు ‘కా’లేదు అన్నాం కనుక, కారణాలు మైనస్ కా = రణాలు = యుద్ధాలు. సమాధానం అదే.

16 నిలువు: ‘ఆకులు’ రాసి, మధ్యన ‘రాధ’ను చేర్చితే వచ్చే ఆరాధకులు ఇక్కడ సమాధానం.

18 నిలువు: ఎయిర్ హోస్టెస్ కు గగనసఖి అనే తెలుగు పదాన్ని సూచించారెవరో. కనుక, అదే సమాధానం.

19 నిలువు: పొలతి నడుము అంటే పొలతి అనే పదంలోని మధ్య అక్షరమైన ల. దీనికి బయట కిందనుండి పైకి ‘వంపే’ వస్తే పేలవం ఏర్పడుతుంది. పేలవం = పస లేని కనుక, అదే సమాధానం.

24 నిలువు: ఇక్కడ చాలా మంది తడబడ్డారు. కఱ్ఱ, కర్రి, కడై, కడా, కప్పి – ఇన్ని రకాలుగా పూరించారు. దీనికి జవాబు కప్పు. కప్పు = డాగురించు, నల్లని, cup.

**** (*) ****

Nudi 20 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-19 ఫలితాలు, జవాబులు, వివరణలు

పాఠకులకు నమస్కారం.

ప్రతిసారి సరాసరిన పదిహేనుగురు ‘నుడి’కి తమ ఎంట్రీలను పంపుతూ వచ్చారు. మొట్టమొదటి నెలలో ఇరవై మంది పంపారు. ఈ సారి మాత్రం కేవలం ఐదుగురే. ఇంత తక్కువ మంది పాల్గొనడం ఇదే మొదటి సారి. అన్ని ఆధారాలకూ సరైన సమాధానాలు రాసినవారు ఈ సారి కూడా ఎవ్వరూ లేరు. ఒక తప్పుతో పూరించిన వారు ముగ్గురే. వారు:

1. కార్తీక్ చంద్ర, పి.వి.ఎస్.
2. పి.సి. రాములు
3. మాడిశెట్టి రామారావు. ముగ్గురికీ అభినందనలు.

ఇక కొన్ని ఆధారాలకు జవాబులను, వాటికి వివరణలను చూద్దాం.

1 అడ్డం: ఇక్కడ మన సాదా అనేది anagram. దానిలోని అక్షరాలను తారుమారు చేయగా వచ్చే సామ దాన సమాధానం. చతుర్విధ ఉపాయాలలో మొదటి రెండు సామము, దానము.

3 అడ్డం: షడ్జము = స. గాంధారము = గ. మధ్యమము = మ. నిషాదము = ని. ఇవి సరళీ స్వరాలలోనివి. స+గ+మ+ని = సగమని = అర్ధభాగం అని.

5 అడ్డం: ‘మూవీగా’లో మధ్యాంతాలైన వీ, గా పొట్టివైతే వి, గ లుగా మారుతాయి. వీటికి మూ కలిపి, కలగాపులగం చేస్తే వచ్చే మూగవి జవాబు. మేకలు, గొర్రెలు మొదలైన జంతువులను జీవాలు అనటం మనం సాదారణంగా వింటూనే ఉంటాం.

7 అడ్డం: తాను సైతం = తనూ. కనుక, అదే సమాధానం. కొత్తగా = నూతనంగా. దీనిలోని మొదటి సగమైన నూత తారుమారైతే తనూ వస్తుంది.

9 అడ్డం: దా‘రం’ కొస = రం. స్థానభ్రంశం చేసిన‘ది’ అంటే ది అనే అక్షరం. అది ‘రం’ను స్థానంభ్రంశం చేస్తే దారం దాదిగా మారుతుంది. దీనికి మధ్యన యా చేరితే ఏర్పడే దాయాది = పాలివాడు. కనుక, అదే సమాధానం.

14 అడ్డం: లాగా = మాదిరి. అది కుచింకుకుపోగా ఏర్పడే రూపం మాద్రి. కనుక, అదే జవాబు.

17 అడ్డం: జలుబు = పడిశం. దాని ఆద్యంతాలు పశం. అవి అటుదిటుగా మారితే వచ్చే శంప = మెరుపు. కనుక, అదే సమాధానం.

20 అడ్డం: ముదురుకు వ్యతిరేకం లేత. అది వ్యతిరేకదిశలో వస్తే తలే ఏర్పడుతుంది. శీర్షము = తల కనుక, తలే అన్నది జవాబు.

23 అడ్డం: రాశారులో నడుము = మధ్య అక్షరమైన శా. దాన్ని రాశారు లోంచి మైనస్ చేయగా వచ్చే రారు సమాధానం.

24 అడ్డం: సతతంకు సమానార్థక పదమైన సదా ఇక్కడ జవాబు. సదాశివ బ్రహ్మేంద్రుడు కర్ణాటకం సంగీతరంగం లోని ఒక వాగ్గేయకారుడు.

26 అడ్డం: అన్నమయ్యకు ఆ కాలంలో పేపర్లుగా పనికొచ్చినవి తాళపత్రాలు. తాళపత్రాలు మైనస్ తాళ = పత్రాలు = ఆకులు. కాబట్టి అదే సమాధానం.

29 అడ్డం: మా తల్లి = మా అమ్మ. మా అమ్మను జంబుల్ చేస్తే వచ్చే అమ్మమా ఇక్కడ జవాబు.

31 అడ్డం: పైపూత = లేపనము. లో‘న’ కొస = న. లేపనము మైనస్ న = లేపము = పైకెత్తము. కనుక లేపము జవాబు.

33 అడ్డం: కలతలు కల లతల కలలు మైనస్ లుకలుకల తలల కల = తల. అదే సమాధానం.

35 అడ్డం: దీనికి సమాధానం కాక. ఎలా అంటే, చిన్నాన్న = కాక (తెలంగాణలో). వేడి = కాక. కాకుండా = కాక.

37 అడ్డం: దీనికి నవలిక ఎలా సమాధానమంటే, రేపోకు జత మాపో (రేపో మాపో అంటాం కదా). మానవ పోలిక మైనస్ మాపో = నవలిక.

3 నిలువు: వాసవి తన మైనస్ వాన = సవిత = సూర్యుడు. కనుక, సవిత జవాబు.

4 నిలువు: ఈ క్రాస్ వర్డ్ లో ఇవ్వబడుతున్న ఆధారాలు చాలా వరకు cryptic రకానికి చెందినవి. Cryptic = నిగూఢమైన కాబట్టి, నిగూఢము అనేది జవాబు.

6 నిలువు: So = సో. The = ది. రెండింటిని కలుపగా వచ్చే సోది జవాబు. The ని ‘ద’ అనాలి కనుక, సోద జవాబు అవుతుంది కదా అని ఎవరికైనా సందేహం కలుగవచ్చు. కాని ఇక్కడ The ని ‘ది’ అనే పలకాలి/రాయాలి. ఎందుకంటే, unending లోని మొదటి అక్షరమైన u ఒక అచ్చు (vowel). అట్లా కాక, హల్లు (consonant – a, e, i, o, u కాక మిగిలిన అక్షరం – ఉదాహరణకు b, n, s, p, l, etc.,)తో మొదలయ్యే పదానికి ముందు The వస్తే అప్పుడు దాన్ని ‘ద’ అని పలకాలి/రాయాలి.

13 నిలువు: ‘చాలా వరకు’ ప్రంశంసలో = ప్రశం. దానిలో దే చేర్చితే ప్రదేశం వస్తుంది. అదే సమాధానం.

16 నిలువు: ఎలెక్ట్రానిక్ మెయిల్ ను ఇమెయిల్ అంటున్నాము కనుక, ఎలెక్ట్రానిక్ రాతలును ఇరాతలు అనాలి. ఇరాతలును మిశ్రమం చేయగా వచ్చే ఇతరాలు = etc., కాబట్టి, ఇతరాలు జవాబు.

18 నిలువు: హారంనే అన్న పదంలోని ‘నే’ ను ‘పరి’ చేస్తే హారంపరి వస్తుంది. దాన్ని సరిచేయగా వచ్చే పరిహారం ఇక్కడ సమాధానం.

19 నిలువు: ఎండ = ఆతపం. ‘ఆ’కారం = ఆ. ఆతపం మైనస్ ఆ = తపం. అదే జవాబు.

21 నిలువు: ఆద్యంతం అంటే మొదలు, చివర. లేడిగారులో ఆద్యంతాలు లే,రు. ఈ పదం ఉన్నారుకు వ్యతిరేకం కదా. అందుకే లేరు జవాబు.

25 నిలువు: దాని లో ద్వితీయాక్షరం ని. ఇక అద్వితీయం అంటే ద్వితీయం కానిది. అంటే మొదటిది అయిన దా. నిమ్మ ఒక చెట్టు పేరు. దా + నిమ్మ = దానిమ్మ కనుక, దానిమ్మ జవాబు.

27 నిలువు: త్రాగాలి అనేది దీనికి సమాధానం. వాయువు = గాలి.

28 నిలువు: ఇక్కడే అందరూ తడబడి చిలుప, చిదప అని పూరించారు. కాని, సరైన సమాధానం చిద్రుప. 8 నిలువుకు జవాబు నూక. దాన్ని మనం బియ్యం యొక్క ముక్కగా అభివర్ణించుకోవచ్చు. చిద్రుప అంటే ముక్క. చిదురుప దాని రూపాంతరం చెందిన పదం. క్లాసికల్ సాహిత్యాన్ని సీరియస్ గా చదివే పాఠకులలో చాలా మందికి చిద్రుప అంటే ముక్క అనే విషయం తెలుసు.

29 నిలువు: రిక్కీగాడి తల = రి. లిపిక తల = లి. అమరిన లోంచి ‘రి’ని తీసేసి, అదే స్థానంలో ‘లి’ని పెడితే వచ్చే అమలిన ఇక్కడ సమాధానం.

30 నిలువు: ‘తా’ను పోగొట్టుకున్న తాత = త. దీన్ని మా తర్వాత పెడితే వచ్చే మాత జవాబు.

31 నిలువు: దీనికి జవాబు లేక. ఎట్లా అంటే – ముందుగా ఈ ఆధారంలోని రెండవ భాగాన్ని పరిశీలిద్దాం. లేకుండా లేకపోలేదిక్కడ అంటే ఈ ఆధారంలో లేకుండాకు సమానార్థకమైన పదం లేకపోలేదు, ఉంది అని అర్థం. ఇక మొదటి భాగానికి వద్దాం తారుమారైన తోక లేక = కలేకతో. ఇది తలాతోకా (మొదటి అక్షరం, చివరి అక్షరం) లేకుండా ఉంటే ఏం మిగులుతుంది? ‘లేక’నే కదా!

32 నిలువు: ఒక అవయవం = ముక్కు. ధాన్యపు పొడి = పిండి. కాబట్టి ముక్కు పిండి అనేది జవాబు.

34 నిలువు: కర్ర = కలప. అది తారుమారైతే వచ్చే లపక = ధనము, విత్తము, దుడ్డు, రూక, రొక్కము కనుక, అదే జవాబు.

35 నిలువు: దీనికి జవాబు కామినీ. కామినీ కౌశల్ పాత హిందీ సినిమాలలో నటించింది. భీమిలీ సెంటరు = భీమిలీలోని మధ్య అక్షరమైన మి. దీనికి రెండు వైపులా ‘కానీ’ ఉంటే కామినీ వస్తుంది.

ఈ ‘నుడి’లోని జటిలత్వం పరాకాష్ఠకు చేరుకున్నట్టుంది. ఈ మధ్యనే ఒక పాఠకుడు ఈ విషయం గురించి అసంతృప్తిని వెలిబుచ్చడం జరిగింది కూడా. అందుకని, ఈ నెల నుండి గ్రిడ్ సైజునూ, ఆధారాలలోని జటిలత్వాన్ని తగ్గిస్తున్నాం.

**** (*) ****

Nudi 19 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-18 ఫలితాలు, జవాబులు, వివరణలు

పాఠకులకు నమస్కారం.

ఈ సారి ‘నుడి’ని రవిచంద్ర ఇనగంటి ఒక్కరే ఒక్క తప్పు కూడా లేకుండా పూరించారు. ఒక తప్పుతో పూరించినవారు ఆరుగురు. వారు:
1. మాడిశెట్టి రామారావు
2. కార్తీక్ చంద్ర పి.వి.ఎస్.
3. రాంమోహన్ రావు తుమ్మూరి
4. రమాదేవి
5. పి.సి. రాములు
6. హేమనళిని
విజేతలకు అభినందనలు. ఎక్కువ మంది 32 నిలువు, 11 నిలువు, 5 అడ్డంల దగ్గర తడబడ్డారు.

ఇక కొన్ని ఆధారాలకు జవాబులను, వాటికి వివరణలను చూద్దాం.

1 అడ్డం: దీనికి జవాబు లోకానికి. ఇక్కడ ‘కాకిలోని’ అన్నది anagram.

3 అడ్డం: దీనికి జవాబు ప్రసాదితం. ప్రధానంగా అంటే మొదటి అక్షరాలు. ప్రతిష్ఠాత్మకమైన, సానుకూలమైన, దివ్యమైన, తంత్రభరితమైన – ఈ పదాల మొదటి అక్షరాలను కలిపితే ప్రసాదితం వస్తుంది.

5 అడ్డం: మెత్తనికి విశేషణం సుతి (సుతిమెత్తని అంటాం కదా). ప్రాథమికంగా అంటే మొదటి అక్షరమని అర్థం చేసుకోవాలి. అంటే దహించుకుపోయే లోని ద. సుతిలో ‘ద’ను చేర్చితే వచ్చే సుదతి జవాబు. కొందరు సుమతి అని పూరించారు.

6 అడ్డం: తిరగేసిన చిక్కులకు = కులక్కుచి. 38 అడ్డంకు జవాబు చికురాలు. అందులోని సగమైన ‘చికు’ను కులక్కుచిలోంచి తొలగిస్తే వచ్చే లక్కు ఈ ఆధారానికి సమాధానం.

7 అడ్డం: రాబోయే కాలం = భవిష్యత్తు. అందులో మొదటి సగమైన భవి = గృహస్థుడు. కనుక అదే జవాబు.

9 అడ్డం: ములాయం = మృదువు (హిందీ/ఉర్దూ భాషలో). ములాయం సింగ్ లో చాలావరకు (అంటే పూర్తిగా కాకుండా కొంత మాత్రమే) తీసుకోవాలి. అట్లా చేస్తే వచ్చే ములాయం దీనికి సమాధానం.

12 అడ్డం: ఉర్దూ భాష మాండలికంలో మామా = మామూ. ఈ పదం మూడుసార్లు వచ్చింది కనుక బహువచనమైన ‘మామూ’లు సమాధానం. మామూలు = సాధారణం.

15 అడ్డం: దీనికి జవాబైన సారాయి ఈ ఆధారంలో ఎట్లాంటి మార్పు లేకుండా కనిపిస్తుంది.

19 అడ్డం: మధ్యమధ్య అంటే అక్షరం విడిచి అక్షరం. ‘రాకు మాతో’లో 1, 3 వ అక్షరాలను కలుపగా వచ్చే రామా = సీతాపతీ కనుక, సమాధానం అదే.

22 అడ్డం: కొందరు దీనికి వుజి అనే జవాబును రాశారు. శివాజిలో మొదటి అక్షరం (తల)ను తీసివేస్తే వాజి వస్తుంది. వాజి = గుర్రం కాబట్టి, అదే జవాబు.

23 అడ్డం: పోరగాడులో నడుమ అక్షరాలైన ‘రగా’ను తొలగిస్తే వచ్చే పోడు సమాధానం.

24 అడ్డం: వచ్చెయ్ కు విరుద్ధం రాకు. కనుక, అదే సమాధానం. 38 అడ్డంకు జవాబు చికురాలు. చిచిచి = ‘చి’లు. చికురాలు మైనస్ చిలు = కురా. కురా వెనుతిరిగితే రాకు వస్తుంది.

26 అడ్డం: కాలరులోని మొదటి అక్షరమైన కా లోని దీర్ఘాన్ని కత్తిరిస్తే వచ్చే క వస్తుంది. అప్పుడు కాలరు కలరుగా మారుతుంది. అదే జవాబు.

28 అడ్డం: గానం = పాట. పాటవాలు మైనస్ పాట = వాలు. కనుక అదే జవాబు. ఇది ఏటతో కలిసి ఏటవాలు అని వస్తుంది కదా కొన్నిసార్లు.

29 అడ్డం: కేక వేసె = అరిచె. అందులోని చివరి అక్షరమైన ‘చె’ను ‘సె’గా మార్చితే అరిసె వస్తుంది. అదే సమాధానం.

31 అడ్డం: హిహిహి, వీటిలో ఒకటి = హి. అపస్మారం = కోమా. కోమాలో ‘హి’ని చేర్చగా వచ్చే కోహిమా ఈ ఆధారానికి జవాబు.

37 అడ్డం: ఇక్కడ జవాబైన పతనము ఆధారంలో చెక్కు చెదరకుండా అట్లాగే కనిపిస్తుంది, చూడండి.

38 అడ్డం: చికురాలు = వెంట్రుకలు. కనుక, చికురాలు సమాధానం. చిచిచి = ‘చి’లు. ఎదురుగా రాకు = కురా. కురాను చిలులో చేర్చితే చికురాలు వస్తుంది.

1 నిలువు: ‘మునకలో’ను కిందినుండి పైకి వరుసగా గడులలో నింపితే వచ్చే లోకనము = చూచుట. కనుక, అదే జవాబు. లోకనముకు ముందు ‘ఆ’ వుంటే ఆలోకనము వస్తుంది. అప్పుడు కూడా అర్థం మారదు. లోకనము అన్నా ఆలోకనము అన్నా చూచుట అనే అర్థం.
4 నిలువు: పోగులు = తంతువులు. కనుక అదే జవాబు. తంతువులుకు ముందు వి (‘వి’కారం) చేరితే వితంతువులు వస్తుంది.

6 నిలువు: కలిసిపోవడంకు సమానార్థకమైన లయం ఇక్కడ జవాబు. నీలకాయం మైనస్ కానీ = లయం.

10 నిలువు: చిన్న పాత్రలా = కప్పులా. దాన్ని మిశ్రమం చేస్తే వచ్చే లాకప్పు (lock up) జవాబు.

11 నిలువు: కొంత మంది దీనికి గాభరా అనే జవాబును రాశారు. కాని, జవాబు గాబరా. గాభరా, గాబరా – వీటి మధ్య అర్థపరమైన భేదం లేకపోయినా గాభరాను సరైన సమాధానంగా ఒప్పుకోలేము. ఎందుకంటే, వంటకపు విశేషణం = బగారా (బగారా రైస్ బగారా, బైంగన్ అనే వంటకాలుంటాయి కదా.) బగారాను తారుమారు చేస్తే గాబరా వస్తుంది తప్ప గాభరా రాదు. ఇక్కడ వర్డ్ ప్లే ఉంది కాబట్టి, బగారాలోని అక్షరాలను ఏ మార్పూ లేకుండా జంబుల్ చేస్తే వచ్చేదే సరైన జవాబు.

13 నిలువు: అస్థిసారం = మూలగ. దీనిలోని రెండవ, మూడవ అక్షరాలకు కొమ్ములను తగిలిస్తే వచ్చే మూలుగు ఇక్కడ జవాబు.

14 నిలువు: ఇక్కడ ‘రాసే మిస’ anagram.

15 నిలువు: ప్రాథమికంగా అంటే మొదటి అక్షరం అని అర్థం చేసుకోవాలి. జిల్లా, కలెక్టరు, సారు – ఈ మూడు పదాల్లోని మొదటి అక్షరాలను కలిపితే జికసా వస్తుంది. దీన్ని కలగాపులగం చేయగా వచ్చే సాజికలో ‘మా’ను చేర్చితే సామాజిక ఏర్పడుతుంది. అదే జవాబు.

16 నిలువు: ‘కారు పోక యిటు’ను కిందినుండి పైకి రాస్తే టుయికపోరుకా వస్తుంది. పాము వేసేది = కాటు. టుయికపోరుకా మైనస్ కాటు = యిక పోరు. పోరు = యుద్ధం కనుక, సమాధానం యిక పోరు.

18 నిలువు: ఇక్కడ ‘రావసలు’ anagram. అందులోని అక్షరాలను తారుమారు చేస్తే సవరాలు వస్తుంది.

19 నిలువు: భార్య = ఆలు. ఆవారాలు మైనస్ ఆలు = వారా. వారాను కిందినుండి పైకి రాస్తే వచ్చే రావా సమాధానం.

21 నిలువు: రవిగాడులో 1, 3 వ అక్షరాలు మాయమైతే వచ్చే విడు ఇక్కడ జవాబు.

25 నిలువు: దీనికి జవాబైన కుమారి ఏ మార్పూ లేకుండా ఆధారంలోనే ఉంది.

27 నిలువు: ఎంట్రీలను పంపిన దాదాపు అందరూ ఈ ఆధారానికి సరైన సమాధానాన్ని రాయటం ఎంతో సంతోషాన్ని కలిగించింది. అంటే ‘నుడి’ పాఠకుల అవగాహన ‘స్థాయి’ పెరిగిందని అర్థం. నిజానికి ఈ ఆధారానికి గీత అనే ఒక్క పదం మాత్రమే సరిపోతుంది. అయితే అప్పుడది డైరెక్ట్ క్లూ, లేక సింపుల్ క్లూ అవుతుంది. దాన్ని నిగూఢ ఆధారం (cryptic clue) గా మార్చటం కోసం మిగతా పదాలను కలపటం. లెవెల్ = స్థాయి. తారుమారైన లెవెల్ = యిస్థా. లకీ యిస్థారు మైనస్ యిస్థా = లకీరు = గీత కనుక, లకీరు అన్నది సమాధానం.

32 నిలువు: ఇక్కడ చాలా మంది తడబడటం నేను ఊహించని విషయం. మాతంగాలు, మా జీవాలు, మా వేటలు, మార్జాలాలు, మానవులు – ఇన్ని రకాల సమాధానాలు వచ్చాయి పాఠకులనుండి. ఈ ఆధారానికి జవాబు మాయావులు. మా + ఆమ్మ = మామ్మ కాలేదు కనుక, అక్కడ యడాగమం వచ్చి మా యమ్మ ఏర్పడినట్టే, ఇక్కడ మా + ఆవులు = మావులు కాలేక యడాగమం కారణంగా మాయావులు వచ్చింది.

34 నిలువు: వంచకుడికి విశేషణం = నయ (నయవంచకుడు అంటాం కదా). ముసలాయన మైనస్ నయ = ముసలా. దీన్ని తారుమారు చేస్తే వచ్చే సలాము జవాబు.

**** (*) ****

Nudi 17 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-16 ఫలితాలు, జవాబులు, వివరణలు

పాఠకులకు నమస్కారం.
ఈసారి ‘నుడి’ని ఎవ్వరూ ఆల్ కరెక్ట్ గా పూరించలేదు. ఒక తప్పుతో పూరించినవారు నలుగురు. వారు:

1. కార్తీక్ చంద్ర, పి.వి.ఎస్.
2. పి.సి. రాములు
3. యలమంచిలి కేశవ్
4. కామేశ్వరరావు

చాలా మంది 5 అడ్డం, 13 నిలువు, 31 నిలువుల దగ్గర తడబడ్డారు.
కొన్ని ఆధారాలను, వాటికి జవాబులను, వివరణలను చూద్దాం.

5 అడ్డం: దీనికి సమాధానం యద్దేవా. ఈ రోజుల్లో మనం వాడుతున్న ఎద్దేవా పదం పాత శ్లోకంలోని యద్దేవా నుండి వచ్చింది. (?యత్ + దేవా). యద్దేవా దేవం దేవహేళనం…. అంటూ మొదలౌతుంది ఆ శ్లోకం. కొందరు యధవా, యదేవా మొదలైన సమాధానాలను రాశారు.

6 అడ్డం: ఇంతి అంటే స్త్రీ కనుక, అదే సమాధానమౌతుంది. ఇక ఆంగ్ల పజిళ్ల ఆధారాలలో Chiefly, Primarily అని రాసి తర్వాత కొన్ని పదాలను ఇచ్చినప్పుడు, ఆ పదాల మొదటి అక్షరాలను కలిపితే సమాధానం వస్తుంది. అదేవిధంగా ఇక్కడ ప్రధానంగా అంటే ఇంతేలోని ‘ఇం’, ‘తినాలి’లోని ‘తి’ తీసుకుని కలపాలి. అప్పుడు కూడా ఇంతి వస్తుంది. కాబట్టి రెండు విధాలుగా అదే సమాధానం. ప్రామాణిక తెలుగు పజిళ్లలో కూడా మొదటి అక్షరాన్ని సూచించడం కోసం తల, మొదలు, ప్రారంభం అనే పదాలను మానుకునే సమయం ఆసన్నమైందని నా అభిప్రాయం. ఎన్నో దశాబ్దాలుగా తల/మొదలు/ప్రారంభం నరికిన/తొలగించిన/లుప్తమైన అంటూ ఆధారాలను ఇస్తూ వస్తున్నాం. మొదటి అక్షరాలను సూచించడానికి నేరుగా పదాలనే ఇవ్వొచ్చు. ఇంగ్లిష్ పజిళ్లలో ఆ విధంగానే ఇస్తున్నారు. ఈ ప్రతిపాదనకు సమాధానంగా నా తోటి Setters (పజిల్ కూర్పరులు) ఏమంటారో!

7 అడ్డం: అశ్వారావుపేట – ఈ పదంలో 6 అక్షరాలున్నాయి. మధ్యన (సెంటర్లో) వున్న రెండక్షరాల పదం ‘రావు’. ఇది ‘వస్తాయి’కి వ్యతిరేకం!

14 అడ్డం: చిన్న నాటకం = నాటిక. అంతు లేని అన్నాం కనుక ‘నాటి’ సమాధానమౌతుంది. ఇక ఆనాటి లోంచి ‘ఆ’ (ఆకారం) పోతే మిగిలేది నాటి కనుక, రెండు విధాలుగా సమాధానం అదే అవుతుంది.

19 అడ్డం: Camus ను కామూ అని ఉచ్చరించాలి. ఇక Albert అసలు పేరు కాగా, Camus (కామూ) ఇంటిపేరు. పాశ్చాత్యుల పేర్లలో ఇంటిపేరు చివరన ఉంటుంది.

22 అడ్డం: ఆడకోడి = పెట్ట. పెట్టజాలం మైనస్ పెట్ట = జాలం = వల!

28 అడ్డం: ఆ మనుషులు = వారు. ‘తరువాతి’ సెంటర్లో (మధ్యలో) ఉన్న ‘రువా’ను తారుమారు చేయాలన్న మాట!

35 అడ్డం: పవిత్ర జంతువు = గోవు. తోక లేదంటున్నాం కనుక, గో మిగుల్తుంది. గోల్డ్ లేక గోల్డు పరాయి (ఆంగ్ల) భాషలో పసిడి అవుతుంది. కనుక, ఈ ఆధారానికి గోల్డ్, గోల్డు రెండూ సరైన సమాధానాలే.

38 అడ్డం: మన్మథపత్ని = రతి. అటుదిటుగా ఉన్నప్పుడు తిర వస్తుంది. వందనం = నమస్కారం లేక నమస్కృతి. అందులో సగం = స్కారం లేక స్కృతి. కాబట్టి, తిరస్కారం లేక తిరస్కృతి సమాధానం.

4 నిలువు: దుంప = కంద. చరణం = కాలు. కంద + కాలు = కందకాలు = అగడ్తలు!

8 నిలువు: బట్టలుతికే స్థలం = చాకిరేవు. ఇందులోని సగమైన రేవు తారుమారైతే వచ్చేది వురే = కంఠపాశమే!

10 నిలువు: ఘ్రాణేంద్రియము = ముక్కు. అన్నాను = అంటి (అంటిని). ముక్కు + అంటి = ముక్కంటి!

11 నిలువు: ఇక్కడ ఏడు అంటే సప్తస్వరాలైన స,రి,గ,మ,ప,ద,ని. వీటిలో మూడవది గ. రెండవది రి. నాలుగవది మ. వీటిని కలిపితే వచ్చేది గరిమ = గొప్పతనం!

14 నిలువు: రసికంగా నా – ఇందులో 5 అక్షరాలున్నాయి. ఇరవై శాతానికి సమానమైన ఒక అక్షరం (‘గా’) ను తీసేస్తే ‘రసికం నా’ మిగుల్తుంది. వాటిని తారుమారు చేస్తే వచ్చే ‘నాసి రకం’ ఈ ఆధారానికి జవాబు!

16 నిలువు: కుతి = యావ. మరగుపరచితిని = దాస్తి (వ్యవహారంలో). యావ + దాస్తి = యావదాస్తి = మొత్తం సంపద!

18 నిలువు: ఇక్కడ ‘పేరు చీకో’ అన్నది Anagram. అక్షరాలను తారుమారు చేస్తే పేచీకోరు వస్తుంది.

19 నిలువు: కాకినాడ నుండి తెచ్చుకున్నదాన్ని తింటే ఎంతో మజా. ఈ వాక్యంలో 18 అక్షరాలున్నాయి. మొదటి, చివరి అక్షరాలను కలిపితే వచ్చే కాజా సమాధానం. నడుమ ఉన్న పదహారక్షరాలను తొలగించాలన్న మాట!

25 నిలువు: ‘చె’రి సగం = చె. తల కొట్టేసిన కవులు = వులు. చె + వులు = చెవులు!

30 నిలువు: దూషణని = తిట్టుని. తిట్టుకోరని మైనస్ తిట్టుని = కోర = దంష్ట్ర!

31 నిలువు: ఈ ఆధారంలోని చమత్కారాన్ని చాలా మంది పట్టుకోలేక పోయారు. 35 అడ్డంకు గోల్డ్, గోల్డు రెండూ సరైన జవాబులే. కాని, ఈ 31 నిలువుకు బోల్డు మాత్రమే సరైన సమాధానం, బోల్డ్ సరైన జవాబు కాదు. ఎందుకంటే….
చాలా = బోల్డు (బోలెడు). ధైర్యమున్న = బోల్డు (Bold). బోలెడుకు మారురూపమైన పదాన్ని బోల్డు అంటాం కాని బోల్డ్ అనం కదా! దీన్నే మరోవిధంగా ఇట్లా చెప్పుకోవచ్చు: బోల్డ్ అంటే ‘ధైర్యమున్న’ మాత్రమే. దానికి చాలా (బోలెడు) అనే అర్థం లేదు. ‘బోల్డు’కు చాలా, ధైర్యమున్న అనే రెండర్థాలున్న విషయాన్ని గమనించాలి. ఒకరిద్దరు ఈ ఆధారానికి సరైన జవాబును రాశారు కాని, 13 నిలువుకు పుస్తక అని జవాబిచ్చారు.

32 నిలువు: మనుషుల ఆకృతి = మానవాకారం. తల లేదంటున్నాం కనుక నవాకారం జవాబవుతుంది. నవాకృతిని కూడా సరైన జవాబుగా పరిగణించవచ్చు. కాని, ఇటువంటి పజిళ్లలో ఎక్కువ వరకు భిన్నమైన సమానార్థక పదాలనే ఆశిస్తారు సెట్టర్లు (Setters = పజిళ్లను కూర్చేవారు – set చేసేవాళ్లు)

35 నిలువు: గుంత = గొయ్యి. గుంత యొక్క = గోతి. నెమలి నడుము = ‘మ’. గోతిలో ‘మ’ చేరితే వచ్చేది గోమతి. అదే సమాధానం!

**** (*) ****

Nudi 16 PDF (ప్రింట్ చేసుకుని తీరిగ్గా పెన్నుతో గడులను నింపుకోవాలనుకుంటే ఈ పి.డి.ఎఫ్ ఫైల్ ని డౌన్లోడ్ చేసుకోగలరు.)

నుడి-15 ఫలితాలు, జవాబులు, వివరణలు

పాఠకులకు నమస్కారం.
ఈసారి ‘నుడి’ని ఐదుగురు ఆల్ కరెక్ట్ గా పూరించారు. వారు
1. వి. దీప్తి
2. కామేశ్వరరావు
3. కార్తీక్ చంద్ర పి.వి.ఎస్.
4. పి.సి. రాములు
5. దేవరకొండ

11 నిలువుకు సరైన జవాబును కనుక్కునేవాళ్లు ఒకరిద్దరికి మించి ఉండరనే నా పూర్వానుమానం తప్పు అని రుజువు చేసినందుకు విజేతలను అభినందిస్తున్నాను.

చాలా మంది 7 అడ్డం, 11 నిలువు, 25 నిలువుల దగ్గర తడబడ్డారు.
ఇక ఆధారాలలో కొన్నింటికి జవాబులను, వాటికి వివరణలను చూద్దామా?

7 అడ్డం: పుత్రికి బదులు పత్రి అని నింపారు కొందరు. ‘పుత్రి’ లోని మొదటి అక్షరానికి గల ‘కొమ్ము’ను తీసేస్తే పత్రి వస్తుంది. పత్రి = ఆకులు.

17 అడ్డం: సంతోషించాలి = మురవాలి. సుగ్రీవ సోదరుడు = వాలి. మురవాలి మైనస్ వాలి = ముర = చంద్రగుప్తుని తల్లి!

22 అడ్డం: పరభాషలో వీల్లేని అంటే wheel లేని. Wheel = చక్రము. చక్రవాకము మైనస్ చక్రము = వాక = సెలయేరు!

33 అడ్డం: ఆంగ్లంలో శ్వాసకోశం = లంగ్ (Lung). శ్వాసకోశమా? = లంగా?

35 అడ్డం: పరిమళం = సురభిళం. దాంట్లో సగం = సుర = మత్తు పానీయం.

8 నిలువు: ముక్కంటి = ‘త్రినే’త్రుడు. నటి = అభి‘నేత్రి’.

11 నిలువు: కాల్చేసుకునేందుకు = కాల్ (call) చేసుకునేందుకు! ఐఫోను, ఓవెను, రజను మొదలైన సమాధానాలను రాశారు కొందరు.

15 నిలువు: పువ్వు = విరి. ‘విరి’లో ‘లేక’ చేరితే వచ్చేది విలేకరి.
19 నిలువు: పార్వతి = భవాని. మూడింట రెండొంతులు అంటే మొదటి రెండక్షరాలు (భవా) అని భావం.

21 నిలువు: జర = కొంచెం (తెలంగాణ మాండలికంలో). పాము పాకే శబ్దం = జరజర.
25 నిలువు: చాలా మంది ముక్కారు అని నింపారు. కరెక్టు జవాబు మున్నూరు. వివరణ అవసరం లేదనుకుంటా.

30 నిలువు: ‘పాలకులందరూ’ – ఇందులో 6 అక్షరాలున్నాయి. ఆరులో 33.33 శాతం = రెండు. పాల‘కులం’దరూ లో మధ్యన ఉన్న రెండక్షరాలు కులం = కమ్యూనిటీ!

**** (*) ****