చెప్పు తోడ్కలు లేని కాళ్ళు
గెగ్గెలు గెగ్గెల కాళ్ళు

తుమ్మ ముండ్లు ఇరిగి
సల సల సలిపిన అరికాళ్ళు

పోట్రవుతులు తాకి తాకి
నెత్తురు కార్చిన బొటనేల్లు

పుండ్లు పుండులై
బర్రలు అగుపిస్తున్న మోకాళ్ళు

దుబ్బ తుత్తుర్లు పల్లేరు గాయలు
అత్తుకొని గుల గుల పెడుతన్న కాళ్ళు

ఎవుసం చేసి చేసి
కంచెల ఎడ్లు ఇడిశి కూకున్న కాళ్ళు

శెల్కల ఇరువాలు దున్ని
ఇత్తునాలు అలికిన కాళ్ళు

బురుద నాగలి దున్ని దున్ని
మెత్తపడ్డ కాళ్ళు
తెల్లగ శెడ్డ ఏళ్ళ సందులు

గోదల కాడికి పోయిన కాళ్ళు
గొర్లు మ్యాకల కాసిన కాళ్ళు

పెండ కడి కోసం
తట్ట పట్టుకొని తిరిగిన కాళ్ళు

ఊర చెర్ల దునికి
ఈత కొట్టిన కాళ్ళు
ఎడ్ల పెయ్యి కడిగిన చేతులు

సద్దుల బతుకమ్మ పండుక్కు
ఎనెకు పువ్వేర బోయిన కాళ్ళు

పీరీల గుండం సుట్టు
ఆశన్న భుశన్న ఆటాలడిన కాళ్ళు

మన్ను గంధం పూసుకున్న కాళ్ళు
చెమట చుక్కలు పట్టిన కాళ్ళు
సకల పనులకు సంచరించిన కాళ్ళు

ఇగో ఈ కాళ్ళకు పట్టం కట్టాలే
ఈ కాళ్ళకు ఇత్తడి గజ్జెలు కట్టాలె
గండపెడేరం తొడిగి దండం పెట్టాలె..

(మొదటి ముద్రణ: 13వ ఆటా మహాసభల జ్ఞాపక సంచిక, జూలై 2014)
చిత్రం: జావేద్

ఇంటింటికీ
ఎడారి మంటల సలపరింత

అందరి వాకిళ్ళ
సాన్పుల్లోను కన్నీళ్ళ తడి

మనిషి మనిషికీ
మనస్సుకు పట్టని అవస్థ

ఏజంట్ల వీసాల మోసాలు
విమానం దిగంగానే
కల్లవెల్లి కల్లోల కొలువులు

బతుకవోయి బతుకవోయి
తేరుపుతడనుకుంటే
అందమైన పెట్టెల
శవమై వచ్చిన పెనిమిటి
ఆమె శోకం ఆపతరం కాని దుక్కపాతం

ఎ గుండెను కదలిన్చినా
దుబాయ్ మస్కట్ బాధల గాదలే
పొందింది తక్కువ
పోగొట్టుకున్నది ఎక్కువ

రంగు నరసయ్య తేల్చిన
వలస సంపాదనల సారాంశం
బట్ట పొట్ట అగ్గిపెట్టె బీడీ కట్ట

ఉరడి లచ్లచవ్వ కండ్ల నిండా నీళ్ళు
క్యాన్సర్ తో తిరిగొచ్చిన భర్త
చేసిన పుట్టెడు బాకీలు తీర్చ
కొడుకులిద్దరూ మళ్ళా అవుటాఫ్

అమరవీరుల స్థూపాల సాక్షిగా
అలుముకున్న పేదరికం సాక్షిగా
దేశాలు పట్టుకొని తిరిగి తిరిగి
ఆ వూరి
బాల్యం యవ్వనం కరిగి పోయినయి
వృద్యాప్య చాయలే మిగిలినాయి
జీవితం లోనే జీవం లేని తనాన్ని
దర్శిస్తున్న విచిత్ర వైనమిది

(తెరవే ఆద్వర్యమ్ లో రుద్రంగి గ్రామ సందర్శన )