వేలాడే వాక్యాల నిబంధన అనుకునేలోపే
పదాభినయశిల్పాల్లో ఏకాంతర ఏకాంతం

నేత్రసర్పపుష్పంలో
తలతో తలవని తడిమెలికల్లో
తోలుతీగల తాండవం

వేరేవొక గాలి
వేరే అద్దంలో
లోలోపల చూసి ఏమి తాకిందో

మరో పదమేలేని అరచేతుల్తో వున్నా
బొమ్మల మనసు గారడీలో నవ్వెక్కడ

నిశ్చేష్ట ఇష్టంలో తడవని మరుపులెన్నో
పరోక్షస్పర్శభ్రమలో

నిజాలు చెప్పలేని మాటలే కావాలి
గంతులేసే నీడల్లో

క్షీణత
పక్షవాతపు క్షీణత
వాసనల క్షీణత

తాబేటి తలలో నీడల్లేని మాటల వంతెన
నేలను తాకే కల
గుడ్డి నవ్వు

మోకరిల్లాలి జ్ఞాపకాల కాళ్ళపై
యెవరి ఆత్మో నీహత్య చేసేయ్
బ్లేడుతో పరాయి అద్దాన్ని కోసేయ్
లో అద్దాల లంగాల్ని లాగి పారేయ్
ప్రేమాంగాల్లో దూరిపో
గాల్లోని గాలిని గ్లాసులోకి గిరాటేయ్
ప్రాంతీయ అంధత్వం కెవ్వు కేక

నోట్లో ఆ అంగాలు తిరగకపోతే తప్పిపోతావ్
అనుభవాలు ఆలోచనల్ని నిరూపించేలోపే
కళ్ళకి నాలుకలు విషాన్ని తాపుతాయ్

నిధనము లభించు ఎల్లవేళలా