బుగ్గలమీద పచ్చబొట్లు, జడలో మెల్లెపూలు,
కొందరు నల్లగా, కొందరు తెల్లగా.
స్వరాలు గంభీరంగా, ఖిన్నమైన పాటలు; పాడుతున్నారు
ప్రేమికుల మరణాల గురించి, పుట్టుక నోచుకోని శిశువుల గురించి….

కొందరు డప్పులు బాదుతున్నారు, కొందరు వికసించని రొమ్ములు బాదుకుంటున్నారు
ఏడుస్తున్నారు, వేదనాభరితమైన పారవశ్యంతో గిజగిజలాడుతున్నారు.
వాళ్ళు పీలగా, కళావిహీనంగా, సగం కాలిన
కట్టెల్లా ఉన్నారు, ఒక రకమైన దైన్యం, నిస్సహాయత
కనిపిస్తోంది వాళ్ళందరిలో. పిట్టలు కూడా నిశ్శబ్దంగా
కూర్చున్నాయి చెట్ల మీద, పసిపాపలు కళ్ళు పెద్దవి చేసి చూస్తున్నారు, ఇంకా;

అందరూ ఆ నిర్భాగ్యుల వెర్రి ఆవేశాన్ని వింతగా చూస్తున్నారు
అప్పుడే ఆకాశంలో పెళపెళమని చప్పుడు, ఉరుములు, మెరుపులు
తుంపరలు, చినుకులు దుమ్ము లేపుతూ
సన్నటి జల్లులు, కొన్ని చుక్కలు…

మూలం: కమలా దాస్ (The Dance Of The Eunuchs)
అనువాదం: ఆలమూరు సౌమ్య

వెళ్ళండి
సముద్రాలలో ఈదండి
నీలి మహాసముద్రాల్లో ఈదులాడండి
ఎదురయ్యే మొదటి అల మీ దేహమే
చిరంతనంగా వేధిస్తున్న చీడపురుగు
ఒక్కసారి దానిని దాటేస్తే
ఇక అంతా భద్రమే!
ఔను

ఆ తరువాత అంతా సురక్షితమే
అప్పుడు మునకైనా సుఖమే!

మూలం: కమలా దాస్
అనువాదం: డా.నీరజ జవ్వాజి

(Advice to fellow swimmers కవితకు స్వేచ్చానువాదం)
మాధవి కుట్టి కలం పేరుతో మలయాళంలో రచయిత్రిగా, కమలా దాస్ పేరుతో భారతీయ ఆంగ్ల కవయిత్రిగా ప్రఖ్యాతి గాంచిన కమలా దాస్/కమలా సురయ్యా . భారతీయ సాహిత్యంలో మౌలికమైన స్త్రీవాద తాత్విక స్ఫూర్తిని, చైతన్యాన్ని అందించి సంచలనాన్ని కలిగించిన తొలితరం కవయిత్రి. తన కలం ద్వారా స్త్రీల మనసుని, లైంగికతని స్వేచ్చగా, నిజాయితిగా, శక్తివంతంగా ప్రకటించి తనతరం లో సంప్రదాయాలను బద్దలుగొట్టిన విధ్వంసకారిణిగా ముద్ర వేసుకుంది. 1984 లో సాహిత్యం లో నోబెల్ బహుమతికి ఎంపిక చేసిన తుది జాబితాలో పేరు సంపాదించటమేకాక అనేక అవార్డులు, రివార్డులు పొందారు. మార్చ్ 31 కమలా దాస్ జన్మదినం సందర్భంగా ఆమె స్మృతిలో.