కరుస్తదనే భయం లేదు
కరవడానికి అవకాశం లేదు
గొలుసుతో బంధించి ఉంది శునకం

జాడ కదలాడుతుంటే
కుక్క మౌనంగా అనుమానంతో
ఒగరుస్తూ తేరిపారచూస్తుంది

చెవులు రిక్కించి
ఎదురు బొదురుగా చూసుకుంటూ
కొడుతడేమో అనుకుంటే గ్రామ సింహం
మనిషి కరుస్తుందేమోననుకుంటాడు

భైరవుడు మొరుగుతూనే ఉంది
మన లోపలి లోకాన్ని
జాగరుకతలోకి మేల్కొల్పుతూ కూడా

విధేయ అవిధేయతల
విశ్వాస అవిశ్వాసాల మధ్యనున్న
సన్నని రేఖను
కలుపుతూ … చెరుపుతూ…
మచ్చమచ్చల తెల్లకుక్క

ఎప్పుడూ
కార్య సానుకూల సాధన కోసం
యజమాని తోకూపుతూ
కీర్తిస్తుండాడు