కొండలు
ఆకాశానికి రాసే ప్రేమలేఖల్లా
మేఘాలు సాగుతున్నాయి.
ఆ పొగమంచును
ఎవరైనా ఊదేస్తే బాగుండును
ప్రేయసిని తొలిసారి కలిసిన
అపురూపమైన శిలావేదిక కనిపించేది.

చెడ్డీలోంచి ప్యాంట్లలోకి వస్తున్న
నునులేత ప్రాయంలో
ప్రతీ తలుపూ
ఒ పిలుపులాగే ఉండేది
ఇవాళ
యవ్వనం వెనుకకు జరుగుతూ
సంధ్య సౌభాగ్యం ముందుకొస్తున్నది.

ఆమె జ్ఞాపకాలు
ఫ్లవర్ వాజ్ లోని పువ్వుల్లా
విప్పారుతున్నాయి
ఉజ్వలంగా వెలిగే కళ్ళకింద
కాలం నల్లని గీతలు గీస్తున్నది.
అద్దానికి ముద్దొచ్చే క్రాఫ్ ముంగురులు
ఒక్కొక్క మెట్టే దిగుతున్న
కాలం అడుగుల్లా ఉన్నాయి.
ఉద్వేగ గీతాలు
మంద్రస్వరంలోకి మారుతున్నాయి.

కాలమా! చిన్నబుచ్చుకోకు
నన్ను ఓదార్చే ప్రయత్నం చెయ్యకు
నీకు తెలియని రహస్యమొకటి
నాకు తెలిసింది
నేను ప్రేమించింది ప్రేయసిని కాదు
నాలోని ప్రేమని.

కయ్యానికి కాలుదువ్వే
అమెరికా అంటే వ్యతిరేకత,
కానీ కాలిఫోర్నియాలో
అడవి కాలిపొయినా నాకు నిద్రపట్టదు
మా బంధువులంతా అక్కడే కనుక.

సెజ్జులన్నా, మాల్స్ అన్నా
నాకు పేదవాళ్ళే గుర్తుకొస్తారు.
అయినా ఎకరాలు ఎకరాల్లో
అమ్మకానికి పెట్టిన
అనంత వస్తు సంచయాన్ని చూసి
ముచ్చట పడతాను.

ఇక్కడి విద్యాలయాల్లో తెలుగును చంపేసి
అమెరికాలో వెలిగిస్తుంటే ఆశ్చర్యపడతాను.
ఆంగ్ల పదాలు లేకుండా మాట్లాడితే
తెలుగు బతుకుతుందంటే
మూగబోయి తిలకిస్తాను.
స్వదేశంలోని ఆస్తులను నిర్వహించడానికి
మాతృభాష పనికొస్తుందని గ్రహిస్తాను.

మధ్యలో ఈ చైనా గొడవేమిటి?
మరికొంత జాగా కోసం కాదు
సరుకులు అమ్ముకోడానికి చేసే
సందడిగా భావిస్తాను.

అమెరికా వారికి
జమా ఖర్చుల లెక్కలే ముఖ్యం
యుద్దానికి పెట్టిన డాలర్లే తప్ప
పోయిన ప్రాణాలకు విలువ లేదు.

మొత్తానికి నేను ఇరుక్కపోయాను
చిక్కిన విత్తనం లోంచి
భిన్నదిశలకు ఎక్కుపెట్టిన
రెండాకులుగా మిగిలిపోయాను.
ఇప్పుడు మార్కెట్ ఎడారిలో
కొత్తరకం సూఫీ వేదాంతానికి
వ్యాఖ్యానం రచిస్తున్నాను.