వాకిలి » తిలక్ బొమ్మరాజు

ఇలానో ఇంకోలానో!

వాకిలి — Fri, 31 Oct 2014 21:03:26 +0000

నేనిలానో ఇంకోలానో ఉంటాను
ఉండాల్సిందేగా
నీకు నచ్చేలా ఉండడాన్ని నిరసిస్తూ ఎంతకాలం ఇంకా
నా దారిలో నేను బతుకుతూ ఉంటే ఏమైందో తెలియని ఒకానొకచోట ఇద్దరం కూర్చున్నట్టు
అనిపిస్తూ ఉండడం ఏమిటి?
నేను మళ్ళా అంతరంగీకరించుకోవడం ఎందుకు?
పగలో రాత్రో పుడతాను నాకు నేనుగా
మళ్ళీ ఎప్పుడో రమిస్తాను నాలో నేనే
ఇక నీ గురించి ఏం చెప్పను
నా చేతులన్నీ నిన్ను తాకడం, తాకినట్టు భ్రమించడం నావల్ల కాదు
పైకి మాత్రం ఇద్దరం ఒకేలా కనిపిస్తాం
ఎప్పటికీ మారం
కొత్తగా చెప్పేదేముంది ఇంకా ఎప్పుడూ ఉంటూనే ఉంటాం ఇలానో మరోలానో
నాలోకో నీలోకో ఎప్పుడోకప్పుడు ప్రయాణిoచాల్సిందేగా ఒకరికొకరం ఇష్టం ఉన్నా లేకపోయినా
ఏదోకరోజు నా మనసు కొంత ఇష్టాన్ని పోసుకుని నీమీద కురవడం అంత బాగోకపోవచ్చు
ఎందుకంటే ఇప్పటి దాకా ఎవరి సమాధుల్లో వాళ్లుండి ఇలా ఒక్కసారిగా తవ్వుకోవడం ఎందుకు
కాసేపయ్యాక మళ్ళా నచ్చుకుంటాం నువ్వూ నేనూ
ఒకసారి నడుస్తాం,నవ్వుతాం …నడకా నవ్వూ మామూలే మనమే కొంచం కొత్త
ఇలానో ఇంకోలానో
మళ్ళా కలుద్దాం

గది కిటికీ

వాకిలి — Tue, 30 Sep 2014 20:38:52 +0000

ఒక్కోసారి సగం తెరిచిన గది కూడా మాట్లాడుతుంది
తన కడుపులో ఉన్న కిటికీలు బయట ప్రపంచాన్ని పూర్తిగా మింగనూ లేవూ కక్కనూ లేవూ
అటూ ఇటూ కర్టన్లతో కప్పుకుంటూ చూస్తుంటాయి నిన్నో నన్నో
ప్రతిరోజూ కొన్ని ఉదయాలనూ సాయంత్రాలనూ నా కళ్ళలో పోసి పోతుంటాయి

నుసులు పట్టిన నుదురు కన్నాల్లో నులుముకుంటూనే ఉంటా
నిన్నటినో రేపటినో తలుచుకుంటూ కూర్చుంటాను బూజు పట్టిన మూలల్లో
రెక్కలు తెగిన సీతాకోకచిలుకలు కొన్ని గోడ మీద పాకుతూ కనిపిస్తాయి నా ముందు
వాటి రక్తపు చుక్కలు నా పక్కగా నదులవుతాయి

అందంగా కూస్తూన్న బల్లిపిల్లల పలకరింపు నాకు కొత్తేమీ కాదు
గొంతులో వెక్కిళ్ల శబ్దం అప్పుడప్పుడూ పరావర్తనం చెందుతూ
నేలకతికించిన నాపరాళ్ల సందుల్లో దాక్కోవడం బాగా గుర్తు
ఇంకని సున్నపు చెమ్మ గదంతా గంధమై పులుముకోవడం చూస్తుంటాను
పగలో రాత్రో బిగ్గరగా చప్పుడు చేస్తూ
తలుపులు గాలిని మింగేసి దుమ్మును జల్లడం
అప్పుడు నా చేతివేళ్ళు చీపురు పుల్లలై కడుగుతూ పోతుంటాయి
నన్నెందుకు పంపించేస్తున్నావు తన నుండి దూరంగా అంటూ విసిరే ప్రశ్నలు
నా ముఖానికి తగులుతూ తోసేస్తాయి
నన్ను ఊడ్చేసుకోలేని అగాధంలోకి.

ఒక మనం

వాకిలి — Tue, 30 Sep 2014 20:33:13 +0000

ఒకసారి సంభాషించడం కూడా కష్టమే మన ముఖాలు ఒకరికొకరు అలవాటు పడిపోయాక
పొద్దున్నే లేవడం
న్యూస్ పేపరుతోనో
నీలపు రంగున్న ఆకాశంతోనో
మనం మాట్లాడుకుంటాం
మనిద్దరం అనుకుంటూనే ఉంటాం బోల్డు చెప్పుకోవాలని కానీ తెరచిన కిటికీ రెక్కలమే అవుతాం ఎప్పుడో తెరుచుకుంటాం ఒకరికొకరం
ఎదురుపడుతున్నప్పుడల్లా నీ ముఖంలోకి నా ముఖం చొచ్చుకుపోవడం
అంతర్లీనంగా నీకేదో నేను చెప్పాలనుకోవడం నువ్వు నాతో…

అప్పుడు ఇలా ఉంటాం
hey
హా చెప్పు

అదీ…
ఏంటి?
సాయత్రం అలా నడుద్దామా మనం ఒకసారి
ఒక smiley
గుండెలో జీర నాలో

ఇదేంటిప్పుడు కొత్తగా
దూకుతున్న జలపాతం
ఒంటరి గది
గదంతా నిండిన వాక్యూమ్

తను ఒక పక్కన
రెండు కుర్చీలు
వాటి మీద కూర్చున్న కొంత గాలి

yes dear
ఇందాక ఏదో చెబుతున్నావు
రాత్రి ఎక్కడికెళ్ళావు?
ఎక్కడికీ లేదు…
బాల్కనీలో మొక్కలకు నీళ్ళు పోస్తున్నాను

బిగ్గరగా తన నవ్వు
.
.
.
.
ఎందుకంత నవ్వు
మొక్కలతో నువ్వు ….
అవును మొక్కలలో నేను
చేతులు కలుపుకున్నాం
ముచ్చట్లాడుకున్నాం
నీళ్ళు పోసుకున్నాం
నేను తనకు
తను నాకు
ఆకులు విదిలించి
feel of fragrance ఎంత బాగుందో

హ్మ్ ఇంకా ఏం మాట్లాడావు
మట్టీ
వేర్లు
కాంతి
అంతేనా…

ఇక
వానలో తడిసాం చాలాసేపు
నువ్వప్పటికే పడుకున్నావు నీలోకొద్దామంటే
నన్ను ఒంపుకుందామని చూసాను రాత్రిలో నక్షత్రాలుగా
చిక్కని చీకటిగా అద్దుకుందామని ఎంతసేపు చూసానో
కళ్ళు తెరలు తెరలుగా గడ్డకట్టడం
కలలను పారబోయడం నాలో నీలో

you stalker….
means?
your messing up with shit of thoughts

we are actually…

ఇక ఇప్పుడేమిటి
నువ్వూ
నేనూ
మనం ఇంకోరోజుతో..

అర్దావయవం

వాకిలి — Sun, 31 Aug 2014 17:20:24 +0000

నీ చేతులిక్కడ తెగిపడ్డాయి చూడు
అరచేతుల్లో గీతలిప్పుడు మఱ్ఱి ఊడల్లా తిరుగాడుతున్నాయి

అక్కడెక్కడో పారేసుకున్న ఎర్రదనం కొన్ని చోట్ల చూస్తుంటావు
పువ్వుల్లోనో
అస్తమించే ముసలి సూరీడులోనో
గుండెగోతుల్లో గతుకుల మురికి బయట ఎవరి మీదో

కస్తూరి దుర్గంధం మాటల ఉద్యానవనంలో
ఏరుకుంటున్న బండరాళ్ల కొసరు
కడుపులో ఆకలి దేవులాడుతున్నదేంటో అగుపించనే లేదు
ఎరువు వేస్తూనే కూర్చున్న నగ్న కళేబరం

ఇంకోసారెప్పుడో ఊరిచివర కొన్ని జీవాలు పుడతాయి మరణిస్తాయి
ఉదయం సాయంత్రం /పూల మెడలు విరిచేసారు నీలాగే ఇంకెవరో
ఇప్పుడు మళ్ళీ అంటుకట్టాలి చీడలు పట్టకుండా ఈసారి

అక్కడక్కడా నా అవయవాలు విడివడుతూనే ఉన్నాయి
నాట్లుగా గుండె పోట్లుగా
ఆలోచనలు కాలపు వేశ్యలయ్యాయి
స్వచ్ఛంగా ఉచ్ఛ్వాసలొదిలాక

చీకటి వాసన

వాకిలి — Mon, 02 Jun 2014 21:46:56 +0000

ఇంకొన్నాళ్ళు ఆగాలేమో కొత్త రెక్కలు విచ్చుకోవడానికి
అన్నం మెతుకులు చేతులకంటనే లేదు అప్పుడే ఆకలిసముద్రాన్ని దాటేస్తే ఎలా
చీకటి తైలం ఇంకిపోయిన నేలంతా రాత్రి వాసనను కప్పుకొని బయటకొచ్చింది
చేతుల్లోకి కాసింత శూన్యాన్ని తోడుకుని ముఖాన్ని చదును చేసుకుంటూ ఇంకో క్షణం
మట్టి గొంతులో కుక్కబడిన వేర్ల చిరునామాలన్నీ ఆకులతో కుప్పపోసాక
లోన మిగిలిన ఓకింత ఖాళీ
నవ సమాధుల నిర్మాణం జరుగుతూనే ఉంది ఎక్కడోచోట ప్రతి రోజు
పాత శాసనాలను కొత్తగా లిఖిస్తూనే ఉన్నా

మరో రెండు శరీరాలు కోరికల ముసుగులో మరణించాక ఇంకో ఆకలి పుడుతూ వెంట తేలేని లిప్తపాటు కాలాన్ని నీతిప్రమణాలతో కొలుస్తూ డోలాయనం

ఇప్పుడిక ఎగరొచ్చు సరిహద్దులు దాటి

అర్థాల వసారా

వాకిలి — Wed, 30 Apr 2014 14:24:43 +0000

పదాల మేడల్లో నేను ముడుచుకొని కూర్చున్నపుడు
వాక్యాలు నీ చుట్టూ లతలా అల్లుకుంటాయి

అర్థాల సమాధులపై దులిపిన భావాల దుమ్ములా నేను
నేల పగుళ్ళలో గాలిని నింపి కొత్తపూడికలకు శాంతి స్థాపన చేస్తూ నువ్వు

నీళ్ళను మళ్ళీ మళ్ళీ కడుగుతూ ఒడిలిన రెండు చేతులు
రంగుల కొవ్వుత్తులను కొత్తగా వెలిగించడం కోసం

ఆశల బావుల్లో ఎన్నిసార్లు తొంగిచూసినా కొత్తగా కనబడదే
ఎప్పుడూ పాత నీడలే

మునుపెన్నడో నేశాను
అంతరంగ పరికిణీని
ఇంకా ఏ కలలు తొడుక్కోలేదు
ఎండిపోయిన పూల సుగంధంలా
నా కళ్ళు తడారుతుంటాయి ప్రతిరోజూ

నా గదిలో శూన్యం కనిపించిన ప్రతిసారి చెబుతుంటాను
కాస్తంత ఖాళీ ఉంచమని నేనొచ్చేదాకా

మనసు గుహల్లో ఎన్ని శవాలో
ప్రతి నిత్యం కాలుతుంటాయి నిర్వేదానికి వత్తాసులా
చెక్క తలుపుల మధ్యన ఓ నిండు సువాసన తెరచిమూసినప్పుడల్లా

వసారాలో ఒంటరి దూలాలు
చెదలతో రమిస్తూ
వర్షం పలకరించినపుడల్లా ఒళ్ళుతడుపుకుంటూ కొంత మట్టివాసనను లోలోపలకు తోడుకుంటూ

మరికొన్ని అక్షరాలు నగ్నంగా నానాలి కొత్త అణువుల శోధనలో

ప్రసవం

వాకిలి — Mon, 31 Mar 2014 20:04:03 +0000

1
గర్భం దాల్చిన నిండు మేఘాలు
చినుకులను ప్రసవించడానికై ఉరుములు

2
ఆకాశం(లో)తో ప్రతి నిత్యం మబ్బుల అధరీకరణం ధరణిలో కూరుకుపోవడానికి

3
కొన్ని వెలుతురుల ప్రసరణ ఈనాడు మళ్ళా
పుడమిపై సంతృప్తిగా ఓ నిట్టూర్పు

4
చెట్ల కొమ్మల మధ్యగా జరుగుతున్న పిడుగుల ప్రక్షాళన వాటి మొదళ్ళను కుదించేస్తూ

5
కొన్ని చేతులు చాపిన ఆవరణం ప్రకృతి ఒడి
ఎన్నిమార్లు ఇంకిపోయాయో గుర్తుపట్టని పదార్థాలు

6
కణాలు
ప్రతి కణాలు
అంతమవుతూ మళ్ళీ ఆవిర్భావం.

ఇంకొన్ని జ్ఞాపకాలు

వాకిలి — Fri, 28 Feb 2014 21:05:48 +0000

నేను గదిలో ఒక్కడినే కూర్చున్నప్పుడు సముద్రమంత నిశబ్దం అలుముకుంది నా చుట్టూ

నేనెక్కడొ అగాధంలో పడిపోతున్నట్టుగా కొన్ని ఆలోచనా సరళ రేఖలు నా ఖగోళంలో
గీసుకుని వాటి మీద నడుస్తున్నప్పుడు

దూదిమేడలా నేను కూలిపోతున్నపుడు నాకు ఆసరా ఇస్తూ ఇంకొన్ని జ్ఞాపకాలు
ప్రహరీలా నిర్మించినపుడు

వాటి కింద ఏనాడో శిధిలమైపోయిన కొన్ని పిచ్చుకగూళ్ళు
అందులో నేనో మూల నన్ను నేను తడుముకుంటున్నపుడు

ఏమితోచక తోకచుక్కలా రాలుతున్న నా కన్నీళ్ళు కొన్ని అక్కడక్కడా
నీటిచెమ్మలుగా నిద్రాణమైపోతుంటాయి నువ్వొచ్చేసరికికి

నేను కరుగుతూ నిన్ను కూడబెట్టడానికి ప్రయత్నిస్తుంటాను నువ్వు
గుర్తొచ్చినప్పుడల్లా…

చిరునామ

వాకిలి — Sat, 30 Nov 2013 23:14:19 +0000

అంతర్లీన సరిహద్దు రేఖేదో
చెరిగిపోతోంది లోనెక్కడో…
సంతోషం తరువాత దు:ఖంలా
స్నేహం తరువాత సాంత్వనలా

కనులు పారేసుకున్న
చూపుల నవ్వులేవో జారిపడ్డట్టు

కొన్ని వింజామరలా తలపులేవో
తనుసీమలపై నుండి తరలిపోయినట్టు

చేతివేళ్ళతో పారే నీటి
ఉపరితలాన్ని స్ప్రుసించినట్టుగా

ఎనలేని ప్రేమామృత పరిదిలేని
పరువాలను మనసుతోనే శోదిస్తూ
శాశ్వత చరితల తయారిలో
వాడిపారేసిన వచనంలా
వేచిచూస్తోంది ఈ క్షణం.

నిన్ను కనలేని ఈ కనులెందుకు
నీ పేరు పలుకని పెదవులెందుకు
తీసుకెళ్ళు నీతోనే…
కనీసం నువ్వెళ్ళే దారిలో
నీకు కాపలాగ పడుంటాయి

నేను కనిపించని నాలో
నీవు దాగి నన్ను నీలోకి
మార్చుకొన్నావెప్పుడో
అర్ధంకాని వలపువేదంలా.