రాత్రి వచ్చిన కల గుర్తుండదు
రసభంగమే వినోదం.

పదార్థం నిప్పుల మీద కాలుతూ
విరజిమ్మిన కొత్త వాసన
బతుకును ఊరిస్తది.
ఊహాలోకం లోకి విరిగిపడిన
ఉల్కాపాతం శరీరం చిద్రం చేస్తది

ఎన్నాళ్లైనా
పాటను మోసుకుంటూ తిరగవల్సిందే
సందేహాల సంకెళ్ళు
శిఖరం వైపు నడిపించలేవు

పడమటి కనుమలలో
పరిహాసాలుండవు
పాటలోకి చీకటి ప్రవేశించడం ప్రమాదం
అంతకంటే ప్రాణం లోకి చీకటి ప్రవేశించడం
పెద్ద విషాదం

స్వస్థ సమృద్ధమైన గ్రామాలు
రోగగ్రస్త నగరాల చుట్టూ చక్కర్లు కొట్టడం మాయ

వొత్తిడి గుండెను తొలుస్తది
ఒంటరితనం వొంటిని తొలుస్తది

ఊరు కాని చోట
దేశం కాని చోట
ఐనవాళ్ళు లేని చోట
పాదాలు అలసిపోతే
శవపేటికలు సంచరిస్తయి

బతకాలంటే
ఇంటి తుఫానులూ
ఇసుక తుఫానులూ
తట్టుకోవాల్సిందే

యెన్నాళ్ళైన కట్టెను మోసుకుంటూ
పాటను మోసుకుంటూ
బతకాల్సిందే

నడిస్తేనే తొవ్వ దొరికేది
యేడిస్తేనే బరువు దిగేది
తండ్లాడితేనే బతుకు దాటేది

అతి రాత్రైనా
కట్టె పట్టుకోని
కన్నీళ్ళకడ్డంగా
కాలాడించవల్సిందే!