సందిగ్ధం

వాకిలి — Sat, 24 Feb 2018 17:35:47 +0000

మెత్తని మబ్బుల్లో చిక్కబడిన వాన
సుడులు తిరుగుతూనే ఉంది

దాపెట్టిన పరిమళాన్ని మోస్తూ
నిశ్శబ్దం
పరిసరమంతటా పరచుకుంటోంది

వీచేగాలికి రాలిపోక
పొద్దున పూచిన పూలగుత్తులు
అటూయిటూ ఊగుతున్నాయి

కొమ్మమీది ఒంటరి పక్షి
బేలగా రెక్క సర్దుకుంటోంది

వానకురిస్తే,
నిశ్శబ్దం బద్దలవుతుంది కదూ?
పూలు రాలిపోతాయి కదూ?
పక్షి కచ్చితంగా కూలిపోతుంది కదూ!?

వాకిలి » నవీన్ కుమార్