తలుపు తట్టబోయి ఆగాను . .వెనక్కి వెళ్ళాలో లేక తలుపు తట్టాలో లేక తలుపు తట్టకుండా ఆగి అక్కడే ఉండాలో తెగని సంశయం, తెలియని సంకోచం.

***

ఆ క్షణం వెంకట్ కి తానేం విన్నదీ అర్ధం కాలేదు . నిజంగానే తను ఆ మాట విన్నాడా ? తన భార్య అలా అందా? అసలు అలా అనగలదా ? ఏమో ! అయోమయంలో పడ్డాడు . హఠాత్తుగా కుంచించుకుపోయిన అనుభూతి . ఒక్కసారిగా రక్తం మొత్తం ధమనుల్లోకి ఉధృతంగా ప్రవహించి హృదయం ఖాళీ అయిన భావన.

ఆమె అన్న మాట మెదడు గోడను బలంగా తాకి వెనక్కి వెళ్ళిపోయిన బంతిలా అనిపించింది. అసలు ఆ మాటేంటి ? …………
ఓ పది క్షణాలపాటు మెదడులోని కణాల మధ్య ఏకత లోపించి భార్యవైపు వెర్రిగా చూశాడు.

మాటలు కూడబలుక్కుంటున్నట్లుగా నెమ్మదైన స్వరంతో అడిగాడు ” ఇప్పుడు నువ్వేదో అన్నట్లున్నావ్ ? ”

” మీరు విన్నదే నేనన్నది ”

” ఆ – గుర్తొచ్చింది . మరీ నువ్వంత దారుణంగా మాట్లాడుతావనుకోలేదు ”

“అంత దారుణం ఏమిటో?”

“దారుణం కాకపోవచ్చు.నువ్వనాల్సిన మాట మాత్రం కాదది”

” సరే మన పెళ్ళైన మొదట్లో మీరేం చెప్పారు ? ”

” ఏం చెప్పాను ? ”

” నన్ను ఉద్యోగం మానెయ్యమన్నారా లేదా ? ”

” అన్నాను.” దానికీ, ప్రస్తుతానికీ వున్న సంబంధమేమిటో అంతుబట్టని అయోమయంతో అన్నాడు.

” నామీద నమ్మకం లేకే కదా ! ”

” నాకు అర్ధం కాలేదు , అంటే?.. ”

” అంటే .. నలుగురిలోకి వెళ్ళి పనిచేస్తూ నేను లిమిట్స్ దాటుతాననే అనుమానంతోనే కదా ఆరోజు ఆ నిర్ణయం తీసుకుంది . ”

” ఛ ఛ కానేకాదు అప్పుడు నువ్వు చేస్తున్నది ప్రైవేటు వుద్యోగం . జీతం తక్కువ చాకిరీ ఎక్కువ . అప్పటికి మనకి పాప కూడా పుట్టలేదు. నాన్నకూడా అంతో ఇంతో సంపాదిస్తూనే వున్నాడు. ఖర్చులు పెద్దగా లేవు. నీకు విశ్రాంతిగా వుంటుందనే మానెయ్యమన్నాను. ఇంతకాలం ఈ విషయాన్ని నువ్వు ఆ కోణంతో చూశావా ?అయినా ఆ రోజే దాని గురించి అడిగుండొచ్చుగా ”

” ఏమని అడగమంటారు ? మీకు నామీద అనుమానమా అనా ? పెళ్ళైన కొత్తలో ఎలా అడగ్గలను .”

” కనీసం ఎందుకు అని అడగొచ్చుగా ? ”

” భార్యలు ప్రశ్నిస్తే భర్తలు ఎంత సహనాన్ని ప్రదర్శిస్తారో మాకు తెలియదా ! ”

” నామీద నీకలాంటి అభిప్రాయముందని ఇప్పటివరకూ నాకు తెలియదు మోహితా.. నిజం . ”

” స్త్రీలపట్ల మీకున్న చులకనభావం అర్ధమవుతోంది. ”

” చులకన భావమా ? ” విభ్రాంతిగా చూస్తుండి పోయాడు.

” కాదామరి . సంతానం మీద భార్యాభర్తలిద్దరికీ హక్కుంది . ఇప్పుడు మీరు చేస్తున్నదేమిటి ? నామీద అధికారం చెలాయిస్తున్నారు. తల్లిగా నాకున్న హక్కుల్ని కాలరాస్తున్నారు . స్వరూప పుట్టాక ఉద్యోగం చెయ్యమన్నారు. సరేనన్నాను. ఎందుకంటే పెరిగే ఖర్చులు , చీటికీ మాటికీ పిల్లకి అనారోగ్యం. మీనాన్న ఆరోగ్యం సరిగా లేకపోవడం వగైరా కారణాల వల్ల . ”

” ఉద్యోగం చెయ్యమనడంలో తప్పేంటో? ”

” మీ స్నేహితుడు పెట్టిన స్కూలులో చేరమని నన్ను ప్రోత్సహించలేదూ ! అది మీకు నామీదున్న అపనమ్మకం కాదంటారా ? మీ మితృడి దగ్గరైతే నా శీలానికి రక్షణుంటుందని .”

” ఇహ చాల్లే ఆపు . విషయాన్ని వక్రంగా అర్ధం చేసుకోవడం మీకు మాత్రమే చెల్లిన విద్య . నాలుగేళ్ళ తర్వాత ఉద్యోగానికెళ్తున్నావ్ కనుక నీ టీచింగ్ ఎబిలిటీ ఎలావుంటుందో , ఆ విషయం బయటివాళ్ళు గమనించి సానుకూలంగా స్పందించకపోతే అది ఎక్కడ నిన్ను గాయపరుస్తుందోనన్న ఆలోచన తప్ప మరేమీ లేదు . ఇంకెప్పుడూ నిన్ను నువ్వు కించపరుచుకోకు . ”

” సరె సరే , నాకూ అహం, అబిమానాలుంటాయనీ , కనీసం ముఖ్యమైన విషయాల్లోనైనా నన్ను సంప్రదించాలని మీరెందుకనుకోరు ? ”

” ఇది అంత తీవ్రంగా చర్చించాల్సిన విషయమా ! ”

“ఓహొ ! రూపాయి విలువ పతనం , అమరావతిలో రాజధాని నిర్మాణం , .., ఇవేనా మీ దృష్టిలో తీవ్రంగా చర్చించదగ్గ విషయాలు ? ”

” అదికాదు మోహితా నా ఉద్దేశ్యం ఏమిటంటే కొన్ని విషయాలు పరిణతి చెందిన వారికి నేరుగా తెలియక పోయినా గ్రాహ్యమవుతాయని . ”

” కావచ్చేమో కానీ , పితృస్వామిక భావజాలంతో ఊరేగుతున్న సమాజంలో స్త్రీలు ఎంత ఇన్ ఫీరియారిటీతో , ఎంత ఇన్ సెక్యూరిటీతో బతుకెళ్ళదీస్తారో మీకు తెలుసా ? ”

” కొద్ది కొద్దిగా నాకు అర్ధమవుతూనే వుందిలే . ” అని పెద్దగా నిట్టూర్పు విడిచి ” ఇప్పుడు కాస్త దగ్గరగా వచ్చావ్ . నా బాధా అదే . మరి నేను చెప్పిన విషయమేమంటావ్ ? ” అడిగాడు వెంకట్ .

” మళ్ళీ మొదటికే వచ్చారా ? ఇదేదో బ్లాక్ మెయిలింగ్ వ్యవహారం లాగుంది .”

” మోహి… మన దరిద్రాన్ని చూస్తూనే వున్నావుగా . చూస్తూ చూస్తూ ఇందులోకి మరోప్రాణిని లాగడం ఎంతవరకూ సబబు ? ”

” ఈ భయం , వితరణ ముందుండాలి ”

” అంటే నేను చెప్పిన విషయాన్ని అంగీకరించనంటావ్ ? ”

” అవును ! లక్ష సార్లు మీరు ఆ విషయాన్ని లాగినా లక్షన్నొక్కసారి నేను కాదనే అంటాను . ”

” ఎందుకింత మొండిపట్టు ? ”

” ఎందుకంటే ఒక ప్రాణిని చంపడం పాపంకనుక . ”

” ఎంత జాలో నీకు ”

” మనిషన్నాక అది ఎంతో కొంత వుండాలి ”

” ఫిలాసఫి చెప్పకు ? ”

” మీరేమైనా అనుకోండి . నేను చెప్పాల్సింది చెప్పాను . ”

” నాకంటే కాస్త ఎక్కువ చదివావని పొగరే నీకు ? ”

” అదే నిజమయితే నా సంభోధన ఎప్పుడో మారేది . ”

” అవును ! మీరు బానిస మనస్తత్వం చేత బందీలు . ”

” ఆ విషయానికొస్తే సమాజతత్వంలోనే ఆ లిమిటేషన్ ఉంది. ప్రతివ్యక్తీ మరోవ్యక్తికి ఏదో ఒక రూపంలో బానిసే . ”

” మరి నేనెవరికి బానిసనంటావ్ ? ”

” మీ యజమానికి . ఆయన మిమ్మల్ని నువ్వు అని సంభోదిస్తాడు గానీ మీరెప్పటికీ అతనితో నువ్వు అని మాట్లాడలేరు. అతని దగ్గర ఉద్యోగం మానేసిన తర్వాతైనా సరే ! ”

“ఎందుకు అన్నీ ఇలా మాట్లాడుతుంటావ్?”

“నేనేమన్నాను మీ మగబుధ్ధి ఇంతే అంటున్నాను”

” సరే గానీ ! రాజారావ్ మీద నీకు మనసైనట్లుంది కదూ ! దీనికేమంటావ్ ? ”

” నేనేమంటాను ! మగబుద్ధికీ , కుక్కతోకకీ వంకర తీయలేమంటాను . ”

” ఇలాగయితే మనిద్దరికీ పొసగదు మోహితా ! ”

” మరీ మంచిది . బానిసత్వం నుంచి విముక్తి కలిగిందనుకుంటాను . ”

” ఇంత తెలివైన దానివి ఈ ఒక్క విషయంలో ఎందుకింత తెలివి తక్కువగా ప్రవర్తిస్తున్నావో నాకర్ధం కావడం లేదు.” ” చూడండి ! ఇంతకుముందే చెప్పాను . X Y క్రోమోజోములూ , వాటి పనితీరూ తెలియని మీకు నేను తెలివి తక్కువ దానిగానే కనిపిస్తాను . కనేది స్త్రీ కనుక తప్పంతా ఆమెకే అంటగట్టడం ఆనవాయితీ అయింది.”

” సరే నీకున్నపాటి జ్ఞానం నాకులేదుకనుక అప్పుడేదో అన్నాను . ఇప్పుడు విషయం కొంచెం ముందుకి జరిగింది కదా ! కాస్త ఆలోచించు. అందరూ ఇదేపని చేస్తున్నఫ్ఫుడు మనం మాత్రమే మడిగట్టుకోవడం మూలంగా వొరిగే ప్రయోజనమేంటి ? ”
” కాదు,కుదరదు.పాపం అని కూడా అంటున్నాను.చూడండీ ! ఏ జీవి అయినా ఏదో ఒక ప్రయోజనాన్ని ఆశించి తమ సంతతిని వృద్ధి చేయవు. అది అంతే . ”

” అది పాక్షిక సత్యమే . మనిషి తాను చిరంజీవిగా వుండాలనే కాంక్షే అందుకు పురికొల్పుతుందని అంటారు మనోశాస్త్రవేత్తలు.”

. ” సరే ఏదోమేరకు సత్యమే కదా. చూడండి ! ఈ ఆమ్నియోసెంటసిస్ పరీక్షే లేకపోతే , పుట్టాక మనబిడ్డని తుప్పల్లోకి విసిరేవాళ్ళా మీరు ? ” కళ్ళల్లో నీరు తిరుగుతుండగా అడిగింది మోహిత.

” చ ఛ ! అదేం మాట మోహితా , నేనుమాత్రం మనిషిని కానా ? ఇప్పుడంటే టెక్నాలజీ వుంది కాబట్టి దీన్ని ఉపయోగించుకుందాం అంటున్నా”

” మీకు జీవితం అంటే వణుకు పుడుతుందా ? ”

” అవును మోహితా ! వీళ్ళ పెంపకం , చదువులు , పెళ్ళిళ్ళు , ప్రసవాలూ … ”

” మీకు స్వరూపతో సరిపెట్టుకుందామని ముందే చెప్పాను వినలేదు. ”

” ఇక నీ మనసు మార్చుకోవా? ”

మార్చుకోనన్నట్టుగా తల అడ్డంగా ఊపింది మోహిత.

అతను నిస్సత్తువుగా కుర్చీలో కూలబడ్డాడు. మోకాళ్ళమీద మోచేతులుంచి, తలవంచి రెండు చేతుల వేళ్ళమధ్యా జుట్టు గుప్పిటపట్టి లాక్కున్నాడు క్రిందికి . ఎంతబలంగా లాగుతున్నా నొప్పి తెలియడం లేదు .

భర్తను ఆ స్థితిలో చూసిన మోహిత హృదయం నీరయింది. వెంటనే అతని తలమీద చెయ్యివేసి అంది ” చూడండి ! మీరనుకున్నదొకటి .అయిందింకొకటి . అబ్బాయి పుడతాడనుకున్నారు , కానీ మళ్ళీ అమ్మాయేనని టెస్టింగ్ లో తేలిన నిజం మీ ఆశలమీద నీళ్ళు పోసింది . ”

” పున్నామనరకం నుండీ రక్షిస్తాడని కాదు మోహితా నేను కొడుకే కావాలనుకుంది. ”

” కట్నాలిచ్చి పెళ్ళి చేయలేమనే మీ ఆలోచన నుండి ఈ నిర్ణయం పుట్టిందని తెలుసు .”

” అంతే కాదు … ”

” నన్నుకాస్త చెప్పనిస్తారా . మన ముసలితనంలో గానీ, కాలం చేసిన తర్వాత గానీ స్వరూపకి తోడుగా కనీసం ఒక్క రక్త సంభంధీకుడైనా వుంటే బాగుంటుందన్న ఆలోచన మిమ్మల్ని మరో సంతానం కోసం పురి కొల్పింది. అంతేకదా ! ”

” మనసుని చదివే యంత్రమేదైనా వుందా నీ దగ్గర ? ” విభ్రాంతిగా అడిగాడు వెంకట్ .

విశాలంగా నవ్వింది మోహిత.

” మీరే అన్నారుగా కొన్ని విషయాలు డైరక్టుగా తెలియకపోయినా పరిణతిచెందిన వారికి ఈజీగా అర్ధమవుతాయని . జీవితం గురించి దిగులు పడకండి . అటూ ఇటూ కాని చదువు బాగా బ్రతకడానికి సరిపోదనే విషయం అర్ధమయింది . నేను పార్ట్ టైంగా పి.జి. చేస్తాను. తర్వాత లెక్చరర్ అయితే హైస్కూల్ సెక్షన్ కన్నా జీతం ఎక్కువ . ఆ జీతం మొత్తం పొదుపు చేద్దాం ! అప్పటికీ చాలలేదా మరోటేదైనా చూసుకుందాం .”

***

పదుల సంఖ్యలో కథలు రాసిన నేను కొన్నేళ్ళుగా బద్దకించి ఏ ఒక్క కథా రాయలేకపోయినా, రాయాలన్న ఆశ మాత్రం చావలేదు. ఆ ఆశకు ఊపిరి పోసింది మాత్రం నేను సంశయిస్తూ ఆగిపోయాక విన్న పై సంభాషణంతా…

నేను తలుపు తట్టాలనుకున్నది నా మిత్రుడు వెంకట్ ఇల్లు . అతనితో బీరకాయపీచు బంధుత్వమూ లేకపోలేదు . వాడి భార్య వెంకట్ తో అన్నమాటకి వాడి స్పందనెలా వుంటుందనేది నేను ఊహించగలను . సరిగ్గా అప్పుడే నాలో ఉన్న నేను మాయమైపోయి నాలోకి రచయిత ప్రవేశించాడు . వాడికి కావలసింది కధాంశం . పాత్రల్ని సృష్ఠించడం, చంపడం వాడికి మనోరంజకమైన విషయం . తప్పని తెలిసినా అయినా కొద్దిగా తెరచిన కిటికీలోంచి నేను విన్న ఆ భార్యా భర్తల సంభాషణ లో – వెంకట్ హృదయం క్షోభించిన, నన్ను ఉలికిపాటుకి గురిచేసిన – వెంకట్ తో మోహిత అన్న ఆ వాక్యం ఏమిటో తెలుసా?

” పక్కింటి రాజారావుతో వెళితే మీకేం అభ్యంతరం లేదుగా ? ”

ఆ రాజారావ్ కి ముగ్గురు మగ పిల్లలు . నాలుగోసారీ మగపిల్లాడు పుడతాడనే గ్యారంటీ లేదుగానీ తన అత్తమామలూ, భర్తా తననే నేరస్తురాల్లా చూస్తుండటంతో విసిగిపోయిన మోహిత అన్నమాటలవి . కానీ వెంకట్ కీ, బయటున్న నాకూ తెలుసు, మోహిత మేలిముత్యమని .

అంతే కాదు ఆర్ధిక ప్రణాళిక ఉన్న అర్ధాంగి తోడుంటే ఏదైనా సాధించవచ్చుననే ఆత్మవిశ్వాసం తాలూకూ మెరుపు వెంకట్ కళ్ళల్లో స్పష్టంగా చూసాను.

**** (*) ****