చేరుకోలేని దూరమేం కాదు. చెయ్యేస్తే అందేంత!
నేను నీ వెనుకే ఉన్నాననీ
ఒక పిలుపుని రబ్బరులా కొద్దిగా సాగదీస్తే చాలనీ
నాకు తెలియదా ఏమిటీ?

2

అయినా నువ్వెందుకు చూడాలనుకుంటావు
అలా చూడాలంటే
పొలంపనిచేస్తూ పల్లెతల్లి చంటిబిడ్డని కట్టుకున్నట్టు
నా వీపుకు సూర్యుణ్ణి కట్టేసుకోవాలి
చంద్రుడు నా నుదుటి మీద నిద్రపోవాలి
వందతోటల పూల పరిమళం ఏకకాలంలో
నా దేహాఛ్ఛాదన కావాలి

అవుతుందా అలా?

3

ఒక చెట్టుకీ తన కడుపులో దాగిన పిట్ట గురించి తెలియనట్టు
నీ నీడ గురించి నీకు తెలియదు చూశావా?

ఈ ఎండుతనపు నగ్నత్వం ఎలా వదిలిపోవాలీ
తడిబట్టను దేహం పై కప్పాలి

నది నదిలా కనబడకపోవడంకంటే
గొప్ప విషాదమేముందీ

ఇక్కడ ఒక నది ఉండాలి
నదిలో చూసుకున్న నా ప్రతిబింబం
ఇక్కడిక్కడే ఒయాసిస్సై ఎగురుతూ ఉండాలి

కొన ఊపిరితో ఎవరో దాహం దాహం అని
తల్లడిల్లుతున్నట్టుంది

***

అప్పుడపుడు
ఏకాంత రాత్రిలో

ఎండిన నది పాయలమీద
నిశ్శబ్దం చేతిలో చేయి వేసుకొని నడుస్తాను

నల్లగా కందిపోయిన నింగి
వెలుతురిని గుటకలుగా మింగుతూ
ఎక్కిళ్ళలో చీకట్లని జాలువారుస్తుంది

నది మీద శకలాలుగా రాలిపడుతూ
తిమిరం
సైకతచోరులు తవ్వితీసిన గుంతలలో
సెదదీరుతుంది

నదికి నిలువునా గాయాలైనట్టు
అక్కడక్కడా బురద పేరుకుపోయింది

నదికి దాహం బాగావేస్తున్నదేమో
కొద్ది కొద్దిగా వెన్నెల కరుగుతూ ఉంది

నాగరికత అంతా మనదే అనుకుంటాం గానీ
అదంతా నది నిర్మించిన చరిత్ర కదా

ఇపుడు
నాగరికత కుదుళ్ళతో కదులుతున్నట్టు
వాడిపోయిన మట్టిమడతల ముఖంతో నది…

నది వల్ల జీవితాన్ని తాగిన నేను
ఇపుడు
నదికి జీవితాన్ని తాపాలి.

నదీ మూలం దగ్గర నుంచి
ప్రయాణం మళ్ళీ మొదలెట్టాలి

వెదుకులాట
అన్నింటిలోకి గొప్ప ఉద్యమం.

దేన్నోదాన్ని సాధించాలి కదా?
ఏవైనా కావొచ్చు -
కలలో, కౌగిళ్ళో, కలత నుండి కాసింత విరామం పొందడానికి తగవులో,
తగవుల్లోంచి స్వేఛ్ఛలోకి విహంగాల్లాగా బార్లా చాపుకున్న రెక్కలతో మార్పుల్లోకి,
మానసిక వికాసాల్లోకి.. దేనికోసమైనా కావొచ్చు.

పాము కుబుసం విడిచినట్టు
అన్ని సందిగ్ధతలని వొదులుకోవాలి.
బంధాల లోహ పరిష్వంగాల నుండి విముక్తం కావాలి.
ఈ రాతిరికి కాసింత ఇంధనం కావాలి.