కన్నీళ్ళ కవిత్వం కలల కవిత్వం కల్లబొల్లి కవిత్వం
జ్నాపకాల కవిత్వం వ్యాపకాల కవిత్వం
ఆశల కవిత్వం అడియాసల కవిత్వం
అనుభూతుల ఆశయాల కవిత్వం

విత్తనం వున్న కవిత్వం కావాలి
విస్ఫోటనం చెంది వికసించి
పుష్పించి పరిమళించి
ఫలించే కవిత్వం

వెన్నెముక వున్న కవిత్వం కావాలి
నిటారుగా నిలబడి వ్యవస్థను నిలదీసే కవిత్వం
ఆధిపత్యాన్ని ప్రశ్నించే కవిత్వం
రాజ్యాన్ని ధిక్కరించే కవిత్వం

చూపు వున్న కవిత్వం
లోచూపు వున్న కవిత్వం
ముందు చూపున్న కవిత్వం

శిశువు చిరునవ్వు వంటి కవిత్వం
ప్రేమతో వివశమయిన కవిత్వం
కన్నతల్లి మమకారం వంటి కవిత్వం

ద్వేషించవలసిన ప్రతిదీ ద్వేషించే కవిత్వం
కసిత్వం వంటి కవిత్వం
ప్రేమించవలసిన ప్రపంచాన్నంతా
మనకందించే కవిత్వం

బాధకే కాదు సాంత్వనకూ పర్యాయపదమయిన కవిహత్వం
కష్టజీవికిరువైపులా నిలిచేదే కాదు
కష్టజీవి మార్గంలో కరదీపిక అయిన కవిత్వం

అపార మానవానుభవ కాసారంలో
సారమయిన కవిత్వం
అగాథ జీవిత సముద్రాన్ని తరచిన
ముద్ర అయిన కవిత్వం

పోరాటానికి మార్పుకు చిరునామా అయిన కవిత్వం
ప్రజాస్వామ్య భావమైన కవిత్వం
ప్రజాయుద్ధ రావమైన కవిత్వం.