ఇపుడా కెమ్మోవి తేనెల సోనై
ఊరించడం లేదు
యవ్వనపు పొంగులేవీ
కెరటాలై చుట్టేయడంలేదు.
హంసతూలికా తల్పాన విస్తరించిన
సుకుమార సౌందర్య జ్వాలలో
దహింప బడేందుకు
మనసు ఏ కోరికల కట్టెనూ
ఎగదోయడం లేదు.
ఒక తెలియని దుఃఖమేదో ఆవేదనై
మనసును ముంచెత్తుతోంది.
ఒక్కొక అహంకారపు ఆభరణాన్నీ
ఆభిజాత్యపు వస్త్రాన్నీ తొలగిస్తూ,
తననే మాత్రమూ కదిలించని
నిదురిస్తూన్న ఆ సౌందర్యప్రవాహాన్నీ
పక్కనే అమాయికపు పొత్తిగా కలలుగంటున్న
పసితనాన్నీ
నిర్వికారంగా చూస్తున్నాడతను.
ఇపుడే ముఖాన్ని చూస్తున్నా కలవరమే
ప్రతి శరీరమూ కోరికల తుట్టే,
వ్యాధి పీడిత కళేబరమే!
*
తెరలు తెరలుగా వ్యామోహ మాలిన్యాల్ని
తెలియకుండానే వదిలించుకుంటూ
మనసూ, శరీరమూ, ఘనీభవించిన చీకటీ
అడుగు బయటకు పెడుతూ
వెను తిరిగి చూడాల్సిన
చివరి అవసరాన్నీ
వెలివేసిన ఆతని హృదయమూ
ఎటుచూసినా
వుసూరుమంటున్న వ్యధార్తులూ…
కర్తవ్య కంకణం గుండె చుట్టూ
మరింత గట్టిబడుతోంది
సత్యాన్వేషణలో
తలపు తర్వాతి తలపుల
తలుపులను
తెరుచుకుంటూ
చీకటిని చీలుస్తున్న దారుల
వెలుతురులను పరుచుకుంటూ
కన్నీటి సంద్రాల మూలాలను వెదుకుతూ
సంఘాన్ని బోధి వృక్షాన్ని చేసికుని
సమస్యల అంతర్వలయాలను ఛేదించేందుకు
ఒంటరిగా
బద్ధుడై
‘సిద్ధా’ర్ధుడైన బుద్ధుడై …
painting: Anita Mihalyi
జీవిత సత్యం చిత్రీకరణ బాగుంది
సోదరా, నీ ఎనిమిదో అడుగు సిద్ధార్థుడు ఏడడుగుల జీవితంతో , ఆకర్షణలతో విసుగుచెంది నిరాసక్తుడై వేసిన ఎనిమిదో అడుగుగా చక్కగా భాసించింది. అభినందనలు.—–ప్రసాద్ వి . వి . ఎల్ . ఎన్. ఎస్.
డా. విజయ బాబు గార్కి
నమస్కారం,
సిద్దార్దుడైన బుద్ధుడిపై మీ పోయెం బాగానే అర్థముతున్నది గానీ మీరు అన్యధా భావించకుండా ఉంటే, నాకనిపించిన చిన్న విషయం ఏమంటే మీ మమకార వ్యక్తీకరణ ఎదో కొంచెం పొసగడం లేదనిపిస్తున్నది ఈ క్రింది వాక్యాల్లో ….
“మనసు ఏ కోరికల కట్టెనూ
ఎగదోయడం లేదు.”
“ప్రతి శరీరమూ కోరికల తుట్టే,
వ్యాధి పీడిత కళేబరమే!”
ఆ విషయ వివరణ జోలికి పోకుండా కవికే బాగా తెలిసి ఉంటుంది కదాని మీరే చూసుకోగలరని, మెరుగుపరచుగోగలరని ఆశిస్తూ….
–థింసా
థింసా గారూ
కవిత చదివి స్పందించినందుకు ధన్యవాదాలు.
రామానుజంగారికి సోదరుడు ప్రసాద్ కు
ధన్యవాదాలు.