నా ఆలోచన ఎవరికో అనుకరణగా మొదలైనపుడు
నా తత్త్వగీతం దేనికో అనుసరణ కాదని నేనెలా చెప్పగలను?
జన్యువులు జననమరణాల్ని నిర్ణయించేసినపుడు
మెల్లిమెల్లిగా ఒక అనువాదంగా పుడతాను.
మా తాత దగ్గిన దగ్గు నా గొంతులోంచి ధ్వనిస్తున్నప్పుడు
ఏ దేవుడి పాదుకలకో అన్నం మెతుకునై అంటుకుపోతాను.
ఎవరో వదిలేసిన క్షణాల్ని ఏరుకుంటూ పరిగెడుతూ
ఏ బాటసారో వదిలిన నిశ్వాసాన్ని ఉఛ్ఛ్వాసిస్తూ ఉచ్ఛరిస్తాను.
విశ్వాన్ని పరికిస్తున్నప్పుడు ఎవరి భుజాలపైనో ఉన్నానని
గతం తాలూకు పేజీల గోడల వెనుక దాక్కున్నానని తెలుసు.
నేను చెట్టుగా ఎదిగిపోతున్నప్పుడు అందమైన ఆకృతినిచ్చే
వనమాలి కత్తెరకంటుకున్న నా ఆకులు కనబడుతున్నాయి.
నేను తిమిరాన్నై పొద్దుపొదుగు నుండి వెలుగును జుర్రుకోనపుడు
చీకట్లోకి మేల్కొనపుడు,మెలకువలోకి జారుకోనపుడు
సున్నాగా మొలవనపుడు…శూన్యమై మిగలనపుడు
నేను నేను కాదని నాకెప్పుడూ తెలుస్తూనే ఉంటుంది.
Painting: Pangaud Xavier
‘పశ్యఇ్ శృణ్వన్’ అనే భగవద్గీత శ్లోకంలో మనం చేసే ప్రతిదీ పనే అంటాడు గీతాచార్యుడు. అలాగే, గీతలోనే, ‘నేను అనాది, ప్రకృతి అనాది, జీవుడు అనాది. నాకు ఎఱుక వున్నప్పటినుండీ రెండూ వున్నాయి‘, అంటాడు. ప్రకృతినిగాని, జీవుడినిగాని నేను సృష్టించలేదు. అవి కూడా నాకు లాగా అనాది అంటాడు. మనం చేసేది ప్రతిదీ కర్మే అయినప్పుుడు ఆ అనుభవం ప్రతిదీ మనని అంటుకుంటుంది. దీనినే కర్మవాసనలు అని సనాతన ధర్మం అంటుంది. అనాదిగా అనేక కర్మవాసనలు మనని అంటిపెట్టుకుని వుంటాయి. వాటినే జిడ్డుకృష్ణమూర్తి కండిషనింగ్ అన్నాడు. ఈ కండిషనింగ్ పోతే నీకు సత్యం సాక్షాత్కరిస్తుంది అంటాడు. See it అంటాడు. ఐ సెంటర్ లేకుండా చేయమంటాడు. విశిష్టాద్వైతం నువ్వు చేసే ప్రతిదీ కర్తృత్వ బాధ్యత నీపై వేసుకోకుండా పరమాత్మ మీద వేసి చేయమంటుంది. కర్మణ్యే వాధికారస్తే మా ఫలేషు… ఈ కర్మలన్నీ నిశ్శేషమయితే భగవంతుడిలాగే నీకు ఏ నిబందతా లేని స్థితి వస్తుందని చెబుతుంది. నవీన విజ్ఞానం ప్రకారమయితే ఏకకణ జీవి నుండి వున్న అనుభవాలన్నీ మనని డి ఎన్ ఏ కు అంటిపెట్టుకునే వుంటాయని శాస్త్రజ్ఞుల పరిశోధనలో తెలిసింది. వాటిని గుర్తుతెచ్చుకునే అవకాశం వుందని కూడా తేల్చారు. అవే గత జన్మలు. ఏదీ అంటుకోని, నేను నేనుగా వున్న స్థితిని చేరుకోవాలంటే సనాతనధర్మం అనుసరించి కర్మలన్నీ (అనుభవాల ముద్రలన్నీ) నిశ్శేషమవాలి. (ఆగామి, సంచిత, ప్రారబ్ధ) గీతలో చాలా చక్కగా ఇది వివరించబడింది. ఆలోచన అనేదే నేను కేంద్రంగా ప్రారంభమయింది. కాబట్టి ఎవరికో అనుకరణ అని ఇప్పుడు వగచనక్కరలేదని నా అభిప్రాయం.