కవిత్వం

విద్యుద్దీపాలు

19-ఏప్రిల్-2013

కృతకమైనా విద్యుద్దీపాలు
విడదీయలేని జిలుగు దారాలై
జీవితాలతో పెనవేసుకుంటాయి

ఒక్క క్షణం అవి వెలగకపోతే
ఎంతటి సౌధాలయినా నిస్సహాయపు చీకటిలో
చిక్కగా చిక్కుకుంటాయి

అద్భుత రాగాల్ని వినిపిస్తూ వినిపిస్తూ
ఒక్కసారిగా ఆగిపోయిన గ్రామఫోన్ లా
జీవనం హఠాత్తుగా స్తంభించిపోతుంది.

కానీ
చీకటి ని వెలిగించే నక్షత్రదీపాలు
రాత్రిని మెరిపించే వెన్నెల మైదానాలు
ముంగురులతో ఆడుకునే చల్లగాలి తెమ్మెరలు
ఒక్కసారైనా అనుభవంలోకి రావాలంటే మాత్రం
కనీసం కాసేపైనా కరెంట్ పోవాలి

చిన్నప్పడు నాయనమ్మ తో కలిసి
సెలవుల్లో తిరిగిన పల్లెటూళ్ళ జ్ఞాపకాలు
వెచ్చటి గ్లాసు లాంతర్ల చుట్టూ ముచ్చట్ల తో
తాపీగా సాగిన వలయాకారపు నేల భోజనాలు
ఆరుబయట నవారు మంచం పక్కల్ని ఆప్యాయంగా
పలకరించే యూకలిప్టస్ ఆకుల వగరు వాసనలు
ఇన్నేళ్ళ తర్వాత యాంకీ కాండిల్ వెలుగుల్లో
మళ్ళీ తళతళ లాడాలంటే అప్పుడప్పుడైనా కరెంట్ పోవాలి



8 Responses to విద్యుద్దీపాలు

  1. ramakrishna
    April 19, 2013 at 6:34 am

    బయట వెలుగునిచ్చేవి విద్యుత్ దీపాలు.లోపల వెలుగు నిచ్చేది (మనసుని వెలిగించెది) వెన్నెల.వెన్నెలను అనుభూతి చెందాలంటే విద్యుత్ లేని రోజులు తెలిసుండాలి.
    వైదేహిశశిధర్ గారూ మీ కవిత బాగుంది అభినందనలు.

  2. April 19, 2013 at 7:35 am

    బాగుంది వైదేహి గారు

  3. జాన్ హైడ్ కనుమూరి
    April 19, 2013 at 8:55 am

    తెలుగునాట ఇప్పుడు విద్యుత్తు పోవడం అద్భుతం కాదు

    విద్యుత్తు రావటమే అద్భుంగా మారిన సందర్భం!

    **
    నేలభోజనాలు కావవి – పంక్తి భోజనం

    అయినా ఇప్పుడు సహజ వ్యాయంలేని శరీరంతో డైనింగు టేబుల్‌కు అలవాటుపడ్డాంకానీ

    అవి మహత్తర సమయాలు కదూ!

    **

  4. April 19, 2013 at 3:42 pm

    జ్ఞాపకాలను మంచి ఫీల్ తో చెప్పారు, బావుందండి,.

  5. akella raviprakash
    April 21, 2013 at 1:49 pm

    కానీ
    చీకటి ని వెలిగించే నక్షత్రదీపాలు
    రాత్రిని మెరిపించే వెన్నెల మైదానాలు
    ముంగురులతో ఆడుకునే చల్లగాలి తెమ్మెరలు
    ఒక్కసారైనా అనుభవంలోకి రావాలంటే మాత్రం
    కనీసం కాసేపైనా కరెంట్ పోవాలి
    good lines good poetry

  6. April 25, 2013 at 6:12 pm

    ఎలాంటి వస్తువు చుట్టూ అయినా ఒక చక్కని అందమైన కవిత సృష్టించేస్తావు, వైదేహీ!
    చాలా సంతోషంగా ఉంది, చాన్నాళ్ళ (నాకు) తర్వాత నీ కవిత చూడటం :)

  7. Rammohan rao Thummuri
    April 26, 2013 at 9:06 am

    గత మధుర స్మృతుల్ని విద్యుదీకరించిన మీ కవిత బాగున్నది

  8. Vaidehi Sasidhar
    May 4, 2013 at 10:44 pm

    నా కవిత పై అభిప్రాయాలు తెలిపిన సాహితీ మిత్రులు రామకృష్ణ,డా.లింగారెడ్డి,జాన్ హైడ్,భాస్కర్,రవిప్రకాష్ ,రామ్మోహన్ గార్లకు ధన్యవాదాలు .
    నిషీ,బహుకాలదర్శనం!! థాంక్యూ.

    వైదేహి శశిధర్

Leave a Reply to ramakrishna Cancel reply

Your email address will not be published. Required fields are marked *

*

Enable Google Transliteration.(To type in English, press Ctrl+g)