ఈ మధ్య కాలంలో ఎన్నడూ విననంతగా భారతదేశంలో స్త్రీలపై అత్యాచారాలు వెలుగులోకి వస్తున్నాయి. వయసుతో సంబంధం లేకుండా అన్ని వర్గ, కుల స్త్రీలమీద ఇవి జరుగుతున్నాయి. ముక్కు పచ్చలారాని పసిపాపలు, భారతదేశ ధార్మికత మీద ఆసక్తి తో వచ్చిన విదేశీ మహిళలు… ఎవరూ వీటి నుండి తప్పించుకోలేక పోతున్నారు.
అత్యాచారాలు జరిగినప్పుడల్లా రెండు వాదనలు ప్రముఖంగా వినిపిస్తాయి. సంప్రదాయవాదులు ఆడవారి వస్త్రధారణ వలనే అత్యాచారాలు జరుగుతున్నవని వాదిస్తారు. అంటే సాంస్కృతిక పరాయీకరణ వలన నష్టం జరుగుతుందన్న అర్ధం ఇందులో ధ్యనిస్తుంది. అయితే స్థానిక సంస్కృతుల పరిరక్షణకు అనుకూలంగా వీరు చేసే వాదనలో సంస్కృతీ పరిరక్షణ బాధ్యత అంతా భారత స్త్రీలదేనన్న ధోరణి వ్యక్తం అవుతుంది. ఆ విధంగా స్త్రీల వ్యక్తిగత మరియు సామాజిక స్వాతంత్ర్యాలను, సంస్కృతీ పరిరక్షణ పేరుతో వీరు తిరస్కరిస్తారు.
ప్రగతి కాముకులు అత్యాచారాలకు కారణాలను వస్త్రధారణలో కాకుండా వ్యవస్థలో చూడాలని కోరుతారు. సమాజంలో వస్త్రధారణ ప్రత్యేకమైన విడి అస్తిత్వం కలిగి ఉండే విషయం కాదని, వ్యవస్థను నడిపే ఆర్ధిక పునాదులు సంస్కృతిని శాసిస్తాయనీ, అలాంటి సంస్కృతిలో ఒకానొక భాగమే వస్త్రధారణ అని వారి వివరణ. వీరు కూడ సాంస్కృతిక పరాయీకరణ జరుగుతోందని అంగీకరిస్తూ దేశ సంస్కృతిని కాపాడుకోవాలని భావిస్తారు. అయితే స్థానిక సంస్కృతుల పరిరక్షణకు అనుకూలంగా వీరు చేసే వాదన, సంస్కృతుల ఆధిపత్యాన్ని తిరస్కరించే ధోరణి తో ఉంటుంది.
ప్రగతి కాముకులు వస్త్రధారణను, అత్యాచారాలకు కారణంగా అంగీకరించరు. ఎందుకంటే, అనేక సందర్భాలలో అత్యాచారం; అధికారం, ఆధిపత్యాలకు వ్యక్తీకరణగా ఉంటుంది. పశ్చిమ దేశాలలో మహిళలకు వస్త్రధారణలో ఇంతకంటే వెసులుబాటు ఉన్నప్పటికీ, ఇక్కడ కంటే విషసంస్కృతి విసృతంగా విస్తరించినప్పటికీ, అక్కడ అత్యాచారాల శాతం తక్కువ. భారతదేశంలో వేళ్ళూనుకొని ఉన్న పితృసామ్యం, కరడు కట్టిన పురుషాధిక్యత ఈ అత్యాచారాలకు ప్రధాన కారకాలని వీరు అంటారు.
సంప్రదాయ వాదుల్లోనూ, ప్రగతి కాముకుల్లోనూ ఉమ్మడిగా కనిపించే అంశం సాంస్కృతిక పరాయీకరణ పట్ల వ్యతిరేకత. కానీ వారికి ఉన్న కారణాలు వేరు వేరు. సంప్రదాయవాదులు తెలిసి చేసినా, తెలియక చేసినా నశించి పోతున్న, నశించవలసిన పాత విలువలను పట్టుకుని వేళ్ళాడుతూ అందులో భాగంగా సాంప్రదాయక వస్త్రధారణను కాపాడుకోవాలని భావిస్తారు. ఇందులో మనదైనది అంతా గొప్పే అనీ, పరాయిది అంతా చెడ్డదేననే ఒక తప్పుడు అవగాహన వ్యక్తం అవుతుంది. విదేశీ ఉద్యోగాల కోసం, పశ్చిమ దేశాల పౌరసత్వాల కోసం, ఫారెన్ అల్లుళ్ళ కోసం పరితపించే వారే సంస్కృతి పరాయీకరణ పట్ల గుండెలు బాదుకోవడం తరచుగా కనిపిస్తుంది. వీరికి డాలర్లు కావాలి, కానీ డాలర్ల వెంట వచ్చే సంస్కృతీ విలువలు వద్దు.
ఈ విషయం లోతు ‘సంస్కృతి ‘ అనే పదాన్ని అర్ధం చేసుకోవటంలోనే ఉంది. సంస్కృతులు అనేవి యధాతధంగా వాటి స్థానంలో అవి ఉన్నపుడు ఒకటి గొప్పా కాదు, మరొకటి చెడ్డా కాదు. వేటికవే ప్రత్యేకత కలిగినవి. ప్రజల సర్వతోముఖ అభివృద్ధితో ముడిపడి ఉన్నంతవరకు ఏ సంస్కృతి అయినా గొప్పదే. కానీ వచ్చిన చిక్కంతా చరిత్ర ఎక్కడి సంస్కృతిని అక్కడే ఉంచలేదు. వ్యాపార వాణిజ్యాలతో పాటు, పాత వలస పాలన, ఆధునిక సామ్రాజ్యవాద దోపిడి లాంటి ఆర్ధిక ఆధిపత్య కార్యకలాపాలు ప్రపంచంలోని వివిధ సంస్కృతులు పరస్పరం ఇచ్చి పుచ్చుకోవటానికి, సంభాషించుకోవటానికి, సమ్మిళితం కావడానికి దారి తీసింది. అంతే కాక సాంస్కృతిక సామ్రాజ్యవాదానికి దారి తీసింది.
వస్త్రధారణకు సంబంధించి కొన్ని నియమాలు గతంలో పాటించేవారు. దుస్తులు చలి, వేడిల నుండి శరీరాన్ని కాపాడటానికి అనే ప్రాచీనయుగాల నుండి, నాగరికత అభివృద్ధిలో భాగంగా అనేక రూపాలు తీసుకొంటూ ఒక దశలో పరిణితి రూపం తీసుకొంది. అన్ని వర్గాల పిల్లలను ఒకటిగా కలపగల ‘యూనిఫామ్ ‘ కల్చర్ లాగా, అన్ని రకాల శరీరాకృతి గలిగిన మనుషుల పొడవు, లావు, కండలు, ఎముకలు కప్పిపెట్టే ఒక విశ్వజనీన సాధనంగా దుస్తులు ఒకప్పుడు ఉండేవి. మళ్ళీ స్త్రీ, పురుషులకు వాళ్ళ అవసరాల రీత్య వేరు వేరు వస్త్రధారణ ఉండేది. ఇందులో ఆనాటి వ్యవస్థల ప్రభావం కూడ ఉండేది. కాల క్రమేణ సాంస్కృతిక సామ్యాజ్యవాద ప్రభావంతో భారతదేశంలో అత్యధిక శాతం పురుషుల దుస్తులు పాశ్చాత్స ప్రభావానికి గురయ్యాయి. అయితే స్త్రీల దుస్తులు 80 శాతం ఇంకా స్థానికతను కోల్పోలేదు. కాలక్రమేణ స్త్రీల క్రియాశీలక పాత్ర అన్ని రంగాలలో పెరగటం వారి వస్త్రధారణలో మార్పులకు దారి తీసింది.
ఆరడుగుల చీరల నుండి కురచ తక్కువ చీరలలోకి, తరువాత దక్షిణ భారతదేశ స్త్రీలు ఉత్తర భారతదేశ దుస్తులైన పంజాబీ డ్రెస్, చూడీదార్, షల్వార్ కమీజ్ వగైరాలలోకి మారిపోయారు. ఇందులో ఫాషన్ తో బాటు, సౌకర్యం కూడ పని చేసింది. ఇప్పుడు దక్షిణ భారతంలో కూలీ కెళ్ళే మహిళలు కూడ పంజాబీడ్రెస్ లోకి మారటం గమనించగలము. నగర ప్రాంత మహిళలు పాంటు, షర్ట్ లలోకి మారారు. ఉత్తర భారతదేశ రాష్ట్రాలలో సేల్స్ గర్ల్స్ కూడ జీన్స్ పాంటులు ధరిస్తారు.
వేషధారణలో ఈ మధ్య వచ్చిన ఫాషన్ లో అంతర్లీనంగా కనిపించేది, స్త్రీ పురుషుల మధ్య ఆకర్షణ. పాశ్చాత్యదేశాల్లో ఇలాంటి ఆకర్షణ కోసం తమను తాము వ్యక్తీకరించుకునే చర్యలు వెర్రితలలు వేస్తున్నాయి. వ్యక్తిత్వ సౌందర్యంతో కాకుండా శారీరక సౌందర్యంతో ఆకర్షించుకునే ప్రయత్నం ఏ దేశంలోనైనా సహజమే అయినా పశ్చిమ దేశాల్లో అది విపరీత పోకడలకు పోయింది. పోర్న్ మాఫియా అభివృద్ది చెంది, వివిధ ఆర్ధిక కార్యకలాపాల్లో పై చేయి సాధించటానికి అదొక సాధనంగా అక్కడ అవతరించడం దానికొక కారణం కావచ్చు. ఇది స్త్రీ, పురుషుల ఆకర్షణకు సంబంధించిన డైనమిక్స్ పైన తీవ్ర ప్రభావం పడేసినట్లు కనిపిస్తోంది.
శారీరక సౌందర్య ఆకర్షణలో భాగంగా శరీర భాగాలను కూడా బహిర్గతపరుస్తూ ఆపోజిట్ సెక్స్ ను ఆకర్షించడమ్ పశ్చిమ దేశాల్లోనూ, కొన్ని లాటిన్ దేశాల్లోనూ ఒక ధోరణిగా ముందుకొచ్చింది. దుస్తులను రకరకాల షేపుల్లో కుట్టి ధరిస్తే అదొక ఫ్యాషన్ కావచ్చు. ఒకటికి రెండు, మూడు, లేదా ఐదారు దుస్తులు ఒకదానిపైన ఒకటి వేసుకొని లోచొక్కాలను బైటికి కనిపించేలా పై దుస్తులను కురచవి చేసుకొంటే అదొక ఫ్యాషన్ కావచ్చు. జుత్తుని రకరకాల షేపుల్లో కత్తిరించి ప్రదర్శించుకొంటే, పాతదైనా, లేటెస్టైనా, అదొక ఫ్యాషన్ కావచ్చు. కానీ శరీర భాగాల్ని చూపడం ఏమి ఫ్యాషన్? ఇక మనిషి దుస్తులను కనిపెట్టి ధరిస్తున్నదెందుకు? ఇవి ఆలోచించవలసిన ప్రశ్నలు.
స్త్రీ, పురుషల మధ్య ఆకర్షణలో భాగంగా వెర్రితలలు వేస్తున్న ఫ్యాషన్లు పాశ్చాత్య దేశాల్లో ప్రముఖ ధోరణి అయ్యింది. సాంస్కృతిక సామ్రాజ్యవాదంలో భాగంగా అది మన దేశానికి వచ్చింది. శాటిలైట్ల పుణ్యమాని విదేశి టి.వి., మ్యూజిక్ లు దేశాన్ని ముంచెత్తితే, అంతర్జాలం పుణ్యమాని పోర్నోగ్రఫీకి గట్లు తెగి మారుమూల గ్రామీణ యువకుడి జేబులోకి సైతం జొరబడింది. ధనిక వర్గాలు అలవర్చుకొన్న పాశ్చాత్య సంస్కృతి, ‘పాలకుల భావాలే, పాలితుల భావాలు’ కనుక కింది వర్గాల మీదికి దూకింది. ఇందులో భాగంగా స్త్రీ, పురుష బేధం లేకుండా సకల వర్గాలు పబ్ సంస్కృతులకు, శరీర భాగాలు చూపుకొనే రకం ఫ్యాషన్లకు లోనవుతున్నారు. దుస్తులు తయారుచేసే పరిశ్రమలు కూడ ఈ రకం దుస్తులను తయారు చేసి జనం మీదకు వదులుతున్నారు. ఇక్కడ ప్రభుత్వం కూడ ఒక పెట్టుబడిదారుడు కాబట్టి ఈ దుస్తుల కంపెనీలకు అనేక రాయితీలు ఇచ్చి ఈ వస్త్ర సంస్కృతిని మనకు అంట కడుతున్నారు.
వాణిజ్య వ్యాపారాలు ప్రపంచానికి అవసరమే; కాని వ్యాపారం పేరుతో వచ్చే వలస పాలన, సామ్రాజ్యవాద దోపిడి అవసరం లేదు. సంస్కృతుల సంగమం అవసరమే; కానీ సాంస్కృతిక ఆధిపత్యం అవసరం లేదు.
పాత కొత్తల మధ్య సంఘర్షణ ఎప్పుడూ తప్పదు. సంఘర్షణ జరిగితేనే మెరుగైన అంశం బైటికి వచ్చి అభివృద్ది వైపుకి సమాజాన్నినడిపిస్తుంది. అలాగే ప్రపంచీకరణ యుగంలో స్థానికం, పరాయిల మధ్య సంఘర్షణ అనివార్యం. ఈ సంఘర్షణలోంచి పుట్టే మెరుగైన అంశాలను, అవి ఏవైపు నుండి వచ్చినా, స్వీకరించాల్సిందే.
డాలర్ వెంట వచ్చే సంస్కృతి మొత్తంగా చెడ్డది కాదు. ప్రతి సంస్కృతిలోనూ పాత, కొత్తలు; గొప్పలు, లోపాలు ఉంటాయి. వాటిలో మెరుగైన అంశాన్ని, ఆధునిక అంశాన్ని స్వీకరించి ప్రగతి నిరోధక చెడ్డ అంశాలను తిరస్కరించాలి. ఐతే: ఏది మంచిది, మెరుగైనది అనేది అలాగే ఏది ప్రగతి నిరోధకమైనదీ, చెడ్డదైనదీ అనేది ఎలా నిర్ణయించాలి అంటే ఒక్కటే దారి. ప్రజాస్వామిక విలువలకు, సమానత్వ భావాలకు ఏది విలువ ఇస్తుందో అదే గొప్పది, అదే మెరుగైనది, అదే ఆధునికమైనది. కొత్తకు పునాది పాతే కనుక రెండింటిలోనూ ప్రజాస్వామిక విలువలకు, సమానత్వ భావనలకు విలువ ఇచ్చేవి ఉంటాయి. వాటిని కాపాడుకుని ఆ విలువలకు వ్యతిరేకంగా ఉన్నవాటిని తిరస్కరించటమే నేటి మనిషి కర్తవ్యం. ఆ మాటకొస్తే ఏ కాలంలోనైనా, సంస్కృతి రీత్యా, మనిషికి కర్తవ్యం ఇదే. పాతలోంచి ‘మంచి ‘ని నిలుపుకొని కొత్తలోని అభివృద్ధిని ఆహ్వానించాలి.
భారతదేశం లాంటి మూడో ప్రపంచ దేశాల్లో కూడా ఆధిపత్య వర్గాలకు విదేశీ డబ్బు కావాలి. కానీ దానితో వచ్చే సంస్కృతిని అలవాటు చేసుకోకూడదు. ఆ ఆధిపత్యం అన్నీ రంగాల్లో కనబడుతుంది. పురుషులకైతే స్త్రీలు ఒద్దికగా ఉండాలి తప్ప కొత్త ఆర్ధిక వెసులుబాటు తెచ్చిన స్వేచ్చా స్వాతంత్రాలను వారు కోరుకోకూడదు. ధనికులకైతే పేదలు అణగిమణిగి ఉండాలి తప్ప సోకులు కోరుకోకూడదు. అగ్ర కులాలకైతే చిన్న కులాలు కష్టం చేసుకొని తొంగోవాలి తప్ప తన కష్టాన్ని నచ్చిన రీతిలో ఖర్చుచేసుకోగూడదు.
ఇందులో భాగమే స్త్రీల వస్త్రధారణపై ఆంక్షలు.
సాంస్కృతిక సామ్రాజ్యవాదం అనేది ఆర్ధిక సామ్రాజ్యవాదం యొక్క అనివార్య ఫలితం. ఇందులో సామ్రాజ్య వాద దేశాల సంస్కృతి గొప్పదిగా చెప్పబడుతుంది. పశ్చిమ దేశాలే ఇప్పటి ఆధిపత్య సామ్రాజ్య వాద దేశాలు కనుక అక్కడి సంస్కృతి, ప్రజల వేష భాషలు, ఆ దేశాల్లోని వివిధ సామాజిక పాత్రల మధ్య ఉండే సామాజిక సంభందాలు… ఇవన్నీ గొప్పవిగా చెలామణిలో ఉన్నాయి. ఆర్ధిక, సాంస్కృతిక దురాక్రమణలో ఉన్న దేశాలలోని సంస్కృతులు తక్కువ రకం; ఇవి వెనకబడి ఉన్నాయి; ఇక్కడి కుటుంబ సంబంధాలు ప్రాచీనమైనవి; బంధువులు, స్నేహితులు, కుటుంబీకుల మధ్య ఉండే సంబంధాలు ఇంకా అభివృద్ది చెందలేదు… ఇలాంటి వాదనలు, భావాలు- రూపాన్ని నెత్తికెత్తుకొని సారాన్ని తృణీకరించేవి. దీనిని దేశంలోని ధనిక వర్గాలు ఆనందంగా స్వీకరిస్తాయి, ఆచరిస్తాయి. పాలకుల భావాలే పాలితుల భావాలుగా చెలామణి అవుతాయి గనుక కింది వర్గాలు కూడ వారిని అనుకరిస్తాయి. ఆ విధంగా దేశీయ సంస్కృతిని, దిగుమతి చేసుకొన్న పాశ్చాత్య సంస్కృతి ఆక్రమిస్తుంది.
అయితే, ఆధిపత్య వర్గాలకు దేశీయ సంస్కృతి కూడా కావాలి. దేశీయ సంస్కృతిలో కింది వర్గాలను -స్త్రిలు, కార్మికులు, రైతులు, కింది కులాలు మొ.- కట్టి పడేసే సాధనాలుగా ఉన్నాయి. కనుక అవి వారికి కావాలి. కానీ దేశీయ సంస్కృతిలోని ప్రగతి కాముకమైనవి, స్థానిక అస్థిత్వాన్ని కాపాడేవి మాత్రం వారికి వద్దు, అవి కింద వర్గాలను ఐక్యం చేస్తాయి కనుక.
అంటే తాగి తందనాలాడి లిక్కర్ మాఫియాను పోషించేందుకు పబ్ లు కావాలి. కానీ అందులోకి స్త్రీలు రాకూడదు. రేసు గుర్రాలు, వాటిపై కాసే పందేలు కావాలి. కాని సంక్రాంతి పండగలో భాగమైన కోడి పుంజు పోటీలు నేరం. ఫ్యాంటు, షర్టు; సూటు, బూటు; షార్ట్ లు, జీన్స్ కావాలి. వాటితో బాటు వచ్చే మిడ్డీలు, చడ్డీలు, లేడి జీన్స్, లేడీ టీషర్ట్ లు వద్దు. ఇది వివక్ష తప్ప మరొకటి కాదు.
దేశీయ సంస్కృతిని పరిరక్షించుకోవడానికి వీలుగా పాశ్చాత్య సంస్కృతుల్లోని అవాంఛనీయ ధోరణులను అడ్డుకోవాలంటే మొదటి దేనిని అడ్డుకోవాలి? ఆర్ధిక, రాజకీయ సామ్రాజ్యవాదాన్ని మొదట అడ్డుకోవాలి. దేశ వనరులు దేశ ప్రజలకు దక్కేలా కాపాడుకోవాలి. దేశ వనరుల నుండి పుట్టిన వస్తువులు, డబ్బులు దేశ ప్రజల పరం కావాలి. ఆ విధంగా ధన, వస్తు సంపదలు అన్ని వర్గాలకు సమానంగా పంపిణీ అయినపుడు వాటిని అంటిపెట్టుకొని ఉండే సాంస్కృతిక, సామాజిక భావాలు, అలవాట్లు కూడా ప్రజాసామ్య పద్దతులకు లోబడి తమదైన స్వంత అభివృద్ధి బాటపైన పరుగులు పెడతాయి. అది జరిగినపుడు స్త్రీ, పురుష వస్త్రధారణ, దాని పరిణామం ఏ పరిమితుల్లో ఉండాలో ఆ పరిమితుల్లోనే ఉంటుంది. ప్రజాస్వామిక వాతావరణం ఉన్నపుడు సంస్కృతీ పరిరక్షణ భారం ఒక్క స్త్రీలపై మోపడమే విచిత్రంగా, అవాంఛనీయంగా మారుతుంది.
A good and nice article.
థాంక్యూ రాజేంద్ర ప్రసాద్ గారు
“దుస్తులు ఒకదానిపైన ఒకటి వేసుకొని లోచొక్కాలను బైటికి కనిపించేలా పై దుస్తులను కురచవి చేసుకొంటే అదొక ఫ్యాషన్ కావచ్చు. కానీ శరీర భాగాల్ని చూపడం ఏమి ఫ్యాషన్? ఇక మనిషి దుస్తులను కనిపెట్టి ధరిస్తున్నదెందుకు? ఇవి ఆలోచించవలసిన ప్రశ్నలు… ప్రజాస్వామిక వాతావరణం ఉన్నపుడు సంస్కృతీ పరిరక్షణ భారం ఒక్క స్త్రీలపై మోపడమే విచిత్రంగా, అవాంఛనీయంగా మారుతుంది.” రమాసుందరి గారూ, హేతుబధ్ధంగా, ఆలోచనాత్మకంగా రాశారు.బావుంది.
నాగలక్ష్మీ గారు మీకు ఇది నచ్చినందుకు చాలా సంతోషంగా ఉంది.
రమా సుందరి గారు మీ ఆర్టికల్ నేను చదివాను .చెంప మీద కొట్టి నేను కొట్టలేదు అన్నట్లు ఉంది. కానీ నేను (చేరాలా సాయిరాం ) ఒక్క విషయం మాత్రం గట్టిగా చెప్పగలను .ఇండియన్ కల్చర్ ఇస్ బెస్ట్ కల్చర్ .western కల్చర్ ఇస్ worest కల్చర్ .మీరు అన్నట్లు విదేశాల నుండి ఏదైనా స్వీకరించవచ్చు. కాని వారి విష సంస్కృతిని స్వీకరించవద్దు అని చెప్పిన దీన్ దయాళ్ గారి మాట మరిచారా? ఈ ఆర్టికల్ నాకు నచ్చింది అని చెప్పలేను నచ్చలేదు అని చెప్పలేను .
ప్రాచీన కాలం నుండి సాంప్రదాయ వాదులు ఖాయం చేసి పెట్టిన మహిళల వస్త్రధారన కూడా స్త్రీ శరీరాన్ని పూర్తిగా కప్పిపెట్టేదేం కాదు.మగవాడికి ఆకర్షనీయంగా కనిపించే ఆడవారి నడుము,పొట్ట, చేతులు(ఒక్కొకసారి వక్షం కూడా) కప్పేయనటువంటి చీర కట్టునే అలవాటు చేశారు.అదే మగవాడికైతే పంచె,నిండుచేతుల చొక్కా శరీరాన్ని పూర్తిగా కవర్ చేస్తుంది.అప్పటినుండే పురుశాదిపత్య సంస్క్రతి చలామని అవుతూ, అలా స్త్రీ తన అందాలతో మగవాడికి కనువిందు చేసే వస్తువుగానే పరిగనించే కుట్ర జరిగింది.ఇక ఇప్పుడు కురుచ దుస్తుల వల్ల అత్యాచారాలు జరుగుతున్నవనడం అసంబద్దం .మెుదటినుండి మగవాడికి స్త్రీ పట్ల సంస్క్రతి, సాంప్రదాయం కలిగించిన చిన్నచూపు, డిపెండెంట్ అన్న భావనే ఇటువంటి అఘాయిత్యాలు జరగడానికి హేతువులు. రమ గారూ. It,s a justified article in time.—narsim
నరసింహం గారు, మీరు చెప్పిన ప్రాచీన కాలానికి ముందు, స్త్రీ పురుషులకు సమాన ప్రాతినిధ్యం గల సమాజంలో వారి వస్త్రధారణ వ్యక్తిగత ఆకర్షణలకు గురికాకుండా కేవలం వారి భౌతిక అవసరాలు తీర్చటానికే ఉండే అవకాశం ఉండి ఉంటుంది కదా.స్త్రీ విలాసవస్తువుగా చూడబడిన పితృసామ్య వ్యవస్థలోనే ఆమె వేషధారణకు పురుషులకు భిన్నమైన హంగులు ఇవ్వబడి ఉంటాయి. మీరీ విషయం ఒప్పుకొంటారని అనుకొంటాను. ధన్యవాదాలు.
మహిళల దుస్తులు, వస్త్ర ధారణ కాదు ఆమె కంటే తాను గొప్ప, ఎక్కువ అనే ఆధిపత్య భావజాలం ఎక్కడ ఎక్కువగా ఉంటుందో అక్కడ స్త్రీల పట్ల చిన్న చూపు అఘాయిత్యాలు, అత్యాచారాలు ఎక్కువ అవుతున్నాయి. ఆ భావనల్ని పెంచి పోషిస్తున్నాయి సంస్కృతి, సంప్రదాయాలు
శాంతి ప్రభోధ గారు మీరు చెప్పినది నిజమే. అయితే మళ్ళీ ఆధిపత్య వర్గాలకు అనువైన భావజాలమే సంస్కృతి, సంప్రదాయాలకు మార్గదర్శకాలు అవుతున్నాయి.ఇదొక విషవలయం.
Manchi article chaala subhodakangaa undi.Modatinunchi paaschyatula vastradhaarana manavastradhaarana bhinnaminavi.manadi streepurushliddaridi volludaachukune vastradhaarane.paaschyatya naagarikata prabhaavamlo purushudu evishayamlonina enniverriveshaalu vesinaa pharavaaledu,manadinka arthafudal purushaadhikhya samaajam andukani enta abhivrudhhi chendaamanukunna strini inkaa paradaachaatune vundaalani korukuntundi eesamaajam pikennicheppinaa atyadhika abhudayavaadulukoodaa idekorukuntaaru endukante vaallukooda purushaadhikya samaajamlo antarbhaagam kaabatti.Abhudayam abhivrudhhi vastra dhaarananu battenirdhaarinchatam pettubadidaari samaajapu lakshanam.Pettubadidaari samaajaaniki sripurushuliddaru dopidiki upauogapade saadhnaale kaakapote strini marinta chokaga dopidee cheyyavachhu vaanijya parikarangaa vaadukuntai,anduku vaariki streela vastradhaarana koodaa okasaadhanangaa vaadukuntaai.vaanijya prkatanalu,cinimaalu chooste eevishayam chaalaa varuku avagatamoutundi….. mee vyaasam chaalaabaagundi.samaaja parinaamakramam prastuta samaajasthiti inkaastalotugaa vivaristu vargasangharshanalo prapancheekaranalo veshadhaaranakoodaa okabhaagame.strini bhogavastuvugaa fudal samaajam chooste vyaapaarasaadhanangaa pettubadidaari samaajam chooste eerendintiki bhinnangaa stri gouravaani swechhanu aunnatyaani kaapudutundi inumadimpajestundi socialist samaajam deenni meelaanti rachanaapaatavam kalavaallu subhodhakanga cheppaagalaru,netitarunamlo itlaanti saamskrutika poraatam antyata avasaram.sagheeyulu itara saampradayavaadulu tamadaadini teevrataram chestunna rojulivi.andukani naavinnapam emitante meelaanti rachanaapaatavam kaligina meelaanti kalam yodhulu meemeekalaalaku padunupettaali.meeraapaniki tagainavaarani naaabhipraayam.ippudu meeru chestunna krushi abhinandaneeyaam.JAYAHO.
ధన్యవాదాలు పవన్ గారు.
ఇన్నేళ్ళూ ఎక్కడున్నారు రమాసుందరి గారూ!లేకపోతే నేనే చదవలేదా మిమ్మల్ని!!చాలా పరిణితితో రాస్తున్నారు. ఇవి రాయండి అవి రాయండి చెప్పను గానీ ప్రింట్ లోకి కూడా విస్తరించండి. అది మీ బాధ్యత కూడాను.
ఈ వ్యాసం ప్రామాణికమైనది. అభినందనలు.
మల్లీశ్వరిగారు, మీ అభినందన నాకు చాలా సంతోషం కలగచేసింది. ఎన్నో రోజులుగా మహిళల వస్త్రధారణ మీద జరుగుతున్న దాడి నన్నీ వ్యాసాన్ని రాయటానికి పురికొల్పింది.
వ్యాసం బాగుంది . బలంగా చెప్పారు .
ధన్యవాదాలు కిరణ్ గారు.
రమాసుందరి కథనం బాగుంటుంది.భాష వచ్చు.మల్లీశ్వరి చెప్పినట్లు తను ప్రింట్ లోకి విస్తరించాలి.ఈ వ్యాసం బాగుంది.
సత్యవతిగారు, మీ ప్రశంస నన్ను చాలా సంతోషపెట్టింది. ధన్యవాదాలు.
స్త్రీల వస్త్రధారణపై వస్తున్న విమర్శల మూలాలపై మంచి పరిశీలన! ఆధునిక వస్త్ర ధోరణిలో పెరుగుతున్న పెడపోకడలకు ఒక్క స్త్రీలనే నిందించటం, అత్యాచారాలకు దీన్నే కారణంగా పైకి తీసుకురావవటం ఏకపక్ష ధోరణే. అన్ని అంశాలనూ చర్చించిన ఈ వ్యాసం ముగింపు ప్రత్యేకంగా బాగుంది.
వేణుగారు, ధాంక్స్. ఎంతో మంది తో చర్చలు జరిగి (తగాదాలు కూడ)బయటకు వచ్చిన వ్యాసం. వారందరికీ కూడ నా ధన్యవాదాలు.
వేణుగారు, చాలా కష్టపడి టైప్ చేసాను. ఇప్పుడు కనబడటం లేదు. మీకు ధన్యవాదాలు.
charitra ekkadi samskrutini akkadee unchaleedu..manchi point. mee vyaasam chadavatam ide tolisaari. content too paatu saili kuudaa chaala bagundi..Haribabu, Ongole
థాంక్స్ హరిబాబుగారు.
చారిత్రిక పరినామ క్రమములో ఏర్పడిన ఫాషన్,దుస్తులు స్త్రీల ఆకర్షణ ఎక్కువ చేసి నదనే మాటా ఏమాత్రం అనుమతించ తగినది కాదు.(ఒకప్పుడు అచ్చాదనే లేని స్తితి మనవాల్లు ఊహించు కోలేరు- అంటే ఆనాడు స్త్రీ పురుష ఆకర్షణ లేదా?)
ఏ కాలం లో నైన స్త్రీ పురుష ఆకర్షన సహజ మైనదే. ఇలా సహజమైన దాన్ని అసహజముగా చేసినది పిత్రుస్వామిక భావజాలమే. గర్వించ దగిన స్త్రీల తల్లి తనాన్నే బలహీనతగా చూడడం మొదలెట్టి తనకు అనుకూలంగ మలుచుకున్నాడు పురుషడు.
పితృస్వామ్యం మొదలైనది లగాయితు, స్త్రీ ఒక బోగ వస్తువుగానే చూడబడుతున్నది. ఇలా చూడడమే కాదు, స్త్ర్రీ యే తను మగవాని కోసమే అందంగా కనపడాలి తప్ప మరేందుకు కాదు అనే బావాన్ని పెంపొందించుకొనేల చేసింది.
స్త్రీ తనకు తెలియకుండానే తాను భానిస అయిపోయింది. మగవాన్ని సుఖపెట్టటమే తన భాధ్యత అన్నంతగా. స్త్రీకి వుత్పత్తి క్రమమలో విలువ లేకుండా చేసి తను కుటుంబ పెద్దగా,వారి ఆస్తికి అదిపతిగా తయరైన మగ మహ రాజు ఇక తను చెప్పిందే వేదం తాను చేసిందే న్యాయం అని, సంపాదనా క్రమములో , వుంపుడుగత్తేలు, లేక వేష్యలు గా స్త్రీలు మలచ బడినారు. ఆకర్షణ సంస్కృతి సంబందించినది. మొన్న మొన్నటి వరకు కొన్ని కులాల్లో రవికెలు లేకుండా బ్రతి కారు వాల్లు అకర్ష్నకు లోనయ్యరా? మనవాల్లకి గ్లోబలైజేషన్ కావాలి విదేశి సంస్కృతి అక్కర్లేదా? ముందు ఈ సంస్కృతే లేకపోతే గ్లోబలైజేషన్ బతికి బట్ట కట్ట లేదు. ఇది అమెరికా వాల్లకి తెలిసినంత మనవాల్లకి తెలియదా?
ఈనాటి వ్యాపార సామ్రాజ్యవాద సంస్కృతి మరింత పెరి గి పెద్దదై కాస్మిటిక్ లేకుండ స్త్రీలు బ్రతకలేని స్థాయి కి తీసుక వెల్లింది. దానికి తోడు, పురుషహంకారాన్ని పుట్టుకతోనే ఉగ్గు పాలతో పెంచబడుతున్న పురుషులు స్త్రీ అంటే చులకన చేయబడే భూస్వా మ్య సంస్కృతి, ఈనాటి మత్తు సంస్కృతి, వాల్లని ఎటుపోతున్నారో తెలియనీకుండ చేస్తుంది.
ఈ నాటికి కూడా కొంతమది వేశ్య వాటికలకు లైస న్సులు మంజూరు చేస్తే ఈలాంటివన్ని సర్దుకుంటాయి అనుకోవటం ముధావహం. కేవలం కడుపు కూటికోసం పడుపుకత్తే రాక్షస రతికి అంగీక రించడం ఎంత నీచమో అనే అలోచన మనకు లేదు. ఇదేమంటే ప్రపంచములో లేనిది మనము చేస్తున్నామా? అంటారు. ఈ లాంటి ఒక వ్యవస్త లేకుంటే సమాజం నడవదు అను కోవడం ఇంకా ఎంత వికృతం? ఈ భౌతిక, సంస్కృతి తో పాటు,మగవాడి దురహంకారం మారితే తప్ప దీనికి పరిష్కారం లేదు.
“వేషధారణలో ఈ మధ్య వచ్చిన ఫాషన్ లో అంతర్లీనంగా కనిపించేది, స్త్రీ పురుషుల మధ్య ఆకర్షణ” స్త్రీ పురుషుల మధ్య ఉండే సహజమైన ఆకర్షణను కూడ ఈ మధ్య మార్కెట్ చేసుకొంటున్నారు అని నా అభిప్రాయం. దానికి కారణం ఈ ఇటీవల ప్రెటేగిన సాంస్కృతిక సామ్రాజ్యవాదం. భారతదేశంలో దానికి దన్నుగా పిత్రుసామ్యం ఎప్పుడూ పునాదిగానే ఉంటుంది. ధాంక్స్ ఫర్ యువర్ అనాలిసిస్.
అత్యాచారాలకూ వస్త్రదారణకూ లంకె తుంటి కొడితే పళ్ళు రాలినట్టుగా ఉంది. అత్యాచారాలు ఎక్కువ కావడానికి కారణం ఒంటరి సంచారాలూ ,అందివచ్చే ఏకాంతాలూ కాదా? ఒకప్పుడు ఏదైనా జరిగినా బయటకు వచ్చేవి ఎన్ని? వికృత చేష్టలకు కారణం అంతరించిపోతున్న నీతి నియమాలు , సవ్యమైన దిశలో మార్గదర్శకత నివ్వలేని తలిదండ్రులు కాదా? ఎ వస్త్ర ధారణా అయినా దాని ఆవశ్యకత ముందు సూత్రం కావాలి. కొన్ని బలహీనతలు పోగొట్టుకోలేనప్పుడు కొన్ని నియమాలకు తలవంచాలి
రమా సుందరి గారూ,
చాలా ఓపికగా, సినిశితంగా, ఎనాలిటికల్ గా రాసారు. మన హిపోక్రసీని నిర్దాక్షిణ్యంగా ఎండ గట్టారు.
well done.
శారద
థాంక్యూ శారదగారు.
రమాసుందరి గారూ,
ఒళ్ళంతా చూపించే బట్టలు ధరించి ఎగురుతున్న సినిమా హీరోయిన్లలా బట్టలు ధరించేవాళ్ళున్నారు. అది వాళ్ళు ఆలోచించుకోవాల్సిన విషయం. దాని వల్ల అత్యాచారాలు జరుగుతున్నాయి అనడంలో అర్థం లేదు. అలాగే దాదాపు 20-25 ఏళ్ళ ముందు ఆడపిల్ల కడుపులో ఉందని జరిపిన భ్రూణ హత్యల వలన, ఆడపిల్ల పుడితే చంపేసేయడం వలన ఇప్పుడు ఆడమగ నిష్పత్తి సరిగా లేక అత్యాచారాలు ఎక్కువగా జరుగుతున్నాయని అనడం కూడా హాస్యాస్పదమే. ఇది అనాదిగా జరుగుతున్న అకృత్యం. తప్పుడు పనులు చేస్తూ ఏవేవో ముసుగులు తొడిగితే ఊరుకునే రోజులు పోయాయని అందరూ గ్రహించడానికి ఇలాంటి వ్యాసాలు మీరు ఇంకా రాయండి.
అభినందనలు
రాధ
రాధగారు, మీకు నచ్చినందుకు సంతోషంగా ఉంది
“పశ్చిమ దేశాలలో మహిళలకు వస్త్రధారణలో ఇంతకంటే వెసులుబాటు ఉన్నప్పటికీ, ఇక్కడ కంటే విషసంస్కృతి విసృతంగా విస్తరించినప్పటికీ, అక్కడ అత్యాచారాల శాతం తక్కువ. భారతదేశంలో వేళ్ళూనుకొని ఉన్న పితృసామ్యం, కరడు కట్టిన పురుషాధిక్యత ఈ అత్యాచారాలకు ప్రధాన కారకాలని వీరు అంటారు”
డిల్లి గాంగ్ రేప్ సందర్భంలో ప్రపంచ వ్యాప్తంగా అత్యాచారాలపైన ఎంతో చర్చ జరిగింది. పశ్చిమ దేశాలు సమయం దొరికింది కదా అని, మనదేశాన్ని ఎగతాళి చేస్తూ భారతదేశం ను అభివృద్ది నోచుకొని ఒక వెనుకబడిన దేశం గాను, పితృసామ్యం, పురుషాధిక్యత అంట్టూ వాళ్ల ప్రాపగండా తారాస్తాయిలో మొదలు పెట్టారు. దానికి జాతీయస్థాయిలో మన ఇంగ్లిష్ మీడియావారు తాళం వేశారు. అటువంటి సంధర్భం లో బయటపడిన వాస్తవాలు ఏమిటంటే ప్రపంచం లోనే ఎక్కువ గా అత్యాచారాలు జరిగేది పశ్చిమ దేశాలలో అన్న విషయం. ఈ క్రింది లింక్ లో ఉన్న గ్రాప్ ను చూడండి అమేరికా, యురోప్ దేశాలలోనే అత్యదిక శాతం అత్యాచారాలు జరుగుతున్నాయి. పితృసామ్యం, కరడు కట్టిన పురుషాధిక్యత ఇవ్వని ఐడియలాజి కోణం లో నుంచి చూస్తూ మీరు రాసిన మాటలను సవరించుకోవలసిన అవసరం ఉంది.
http://www.globalpost.com/dispatches/globalpost-blogs/quick-click/which-country-has-the-highest-reported-incidents-rape-data
డిల్లి గాంగ్ రెప్ సందర్భంలో సుమారు ఒక నెలపైన వివిధ పత్రికలలో ఇద్దరు మహిళల (ఎమర్ టూలే ,లిబ్బి పర్వ్స్ )మధ్య తీవ్ర వాదోపవాదాలు జరిగాయి. Libby purves ఆరోపణలను తిప్పికొడుతూ ఎమర్ టూలే అనే ఒకావిడ పశ్చిమదేశాల హిపోక్రసిని , వాళ్లకు వాళ్లే ఆపాదించుకొనే కల్చరల్ సుపిరియారిటిని కడిగి పారేశారు. ఎమర్ టూలే రాసిన ఆఖరు వ్యాసం లింక్ ఇది. అందులోని ముఖ్యాంశాలు ఎమిటంటే
Even gang-rape does not make news in the ‘developed’ West at times. Emer compares the gang-rape in Delhi with the gang-rape in Steubenville in Ohio in the US, where, in August 2012, a 16-year-old girl was dragged, drunk and unresponsive, from party to party where she was raped allegedly by members of a high school basketball team. Contrasting the brutal Delhi rape and death which spurred Indian civil society to its feet, causing protest and unrest, bringing women and men into streets, with the army and the states of Punjab and Haryana cancelling new year celebrations, Emer says that in Steubenville, sports-crazy townsfolk blamed the victim. But for a blogger Alexandria Goddard, now being sued, exposing it, followed by The New York Times four months after the crime, the US might not have noticed the incident at all.
Delhi gang-rape: look westward in disgust
http://www.theguardian.com/commentisfree/2013/jan/01/delhi-rape-damini
శ్రీరాం గారు, మీరిచ్చిన రెండు లింకులు పరిశీలించాను. కొత్త విషయాలు తెలిసాయి.
నా మాటలను సవరించుకోవాల్సిన అవసరం లేదని నేను అనుకొంటున్నాను. మొదటిది మీరిచ్చిన స్టాటిటిక్స్. పశ్చిమ దేశాల్లో అత్యాచారాలకు వారిచ్చే డైమన్షన్స్ కి, మనం ఇచ్చే నిర్వచనానికి చాలా తేడా ఉంటుంది. అక్కడ చైల్డ్ రైట్స్, భార్యలకు ఇష్టం లేకుండా సెక్స్ జరపటం… ఇవన్నీ అత్యాచారాల క్రిందే వస్తాయి. వాళ్ళ దేశాల్లో జరిగిన అత్యాచారాలు దాదాపు చాలావరకు రికార్డ్ గానే ఉంటాయి. ఇక భారతదేశం సంగతి మీకు తెలియనిది కాదు, వందకు ఒక్కటి మాత్రమే పోలీస్ స్టేషన్ కి వెళుతుంది. భార్యను అనుభవించడం తమ హక్కుగా భావించే దేశంలో దానిని రేప్ గా గుర్తించే స్థితి రావటానికి ఇంకా కొన్నేళ్ళు పడుతుంది. మనకంటే అక్కడ స్త్రీలకు లైంగిక హక్కులు ఎక్కవ ఉన్న మాట ఒప్పుకోవాల్సిన విషయం. ఇక్కడ జరిగే అత్యాచారాలకు చాలా వరకు ఆధిపత్యభావజాలమే కారణం. స్త్రీల వస్త్రధారణ వలన కాదు, అలాంటి వస్త్రధారణతో ఉన్న స్త్రీలు వల్యునరబుల్ అనే భావజాలం మన దేశంలో ఉంది. అక్కడ ఆ పరిస్థితి లేదు. అంత మాత్రాన స్త్రీలకు అది భూలోక స్వర్గం అని నా అభిప్రాయం కాదు.
ఇక మీరు ఇచ్చిన రెండో లింకు. ఇద్దరు రైటర్స్ వారి వారి పరిధుల్లో బాగనే రాసారు. మొదటి రచయిత్రి ఇండియాని బాలివుడ్ సినిమాల బేస్ తో రొమాంటిసైజ్ చేయవద్దని, అక్కడ పరిస్థితులు అంత బాగా లేవని రాసారు. రెండో రచయిత్రి భారతదేశాన్ని వెనుకబడిన దేశంగా ఫోకస్ చేస్తూ, పశ్చిమదేశాల్లో స్త్రీలు అత్యాచారాలకు అతీతంగా ఉన్నారు అని చెప్పటాన్ని తప్పు పట్టారు.” Let’s look east in solidarity and support for India’s urgently necessary women’s rights movement; let’s keep talking about the social discrimination Indian women face, which affluent westerners do not. However, it is both prejudiced and completely fantastical to talk as though sexual violence is some kind of Indian preserve. We might have comparatively better women’s rights in the UK, but this is due, in large part, to the social services that our wealth allows.” వారి భాగ్యం అనుమతించినంతగా వారికి స్త్రీ హక్కులు లేవు అని చెప్పటం ఆమె ఉద్దేశ్యం.
సోనియాగాంధీ దామిని బంధువుల్ని పరామర్శించటం… పంజాబ్, హర్యానాలలో కొత్త సంవత్సరం వేడుకలు రద్దు కావటం … ఇవన్నీ అత్యాచారాల పట్ల మన దేశంలో ఎప్పుడూ వచ్చే స్పందనలు అని వారనుకొంటే అది వారి తెలియనితనం. ఆ స్పందనలు తరువాత లేవు, అంతకు ముందు లేవు. సునీత కృష్ణన్ డిల్లీ సంఘటన గురించి ఏమన్నారో మీరు వినే ఉంటారు.
చివరగా, మన దేశంలో జరిగే అత్యాచారాలకు కారణాలు కరుడు కట్టిన పితృసామ్యం, ఆధిపత్య భావజాలం … ప్రధాన కారణాలు కానీ వస్త్రధారణ కాదు అని చెప్పటం నా ఉద్దేశ్యం. ( ఈ మధ్య వచ్చిన సాంస్కృతిక సామ్ర్యాజ్యవాదం దానికి ప్రేరకంగా ఉంది) ఒకే రకమైన దుస్తులు ధరించినపుడు, ఆ స్త్రీ పట్ల భారతీయ పురుషుడి దృష్టి కోణానికి , పశ్చిమ దేశాల పురుషుల దృష్టి కోణానికి సాపేక్షికంగా తేడా ఉంటుంది. మనలో అవలక్షణాలను మాట్లాడుకోవటం అంటే విదేశస్తులను గొప్ప చేయటం కాదు. ఆ మాటకు వస్తే వారి దేశాలు అభివృద్ధి చెందినంతగా వారి స్త్రీల హక్కులు అభివృద్ధి చెందలేదని వారే ఒప్పుకొంటున్నారు. థాంక్స్ ఫర్ యువర్ ఫ్రెండ్లీ డిస్కషన్.
ఏ సమాజం లోనైనా స్త్రీ పురుష సంబందాలు గానీ, మరో సంబందాలు గానీ, ప్రజా స్వామ్య యుతంగా వుంటే తప్ప వాటికి గౌరవం కాని, ఆదిపత్య బావ జాలాలకు అడ్డాలుగా మారితే వాటికి గౌరవం అటుంచి వ్యతిరేకత తప్పదు. వాళ్లకు వాళ్లే ఆపాదించుకొనే కల్చరల్ సుపిరియారిటిని కడిగి పారేశ య్యాలి మరి! ‘కల్చరల్ సుపిరియారిటి ‘ అంటేనే ఆధి పత్య భావజాలమే1 అది ఏ దేశమైనాసరే మినహ ఇంపులు ఏమైన వుంటాయా? స్వయం సమృద్దిగా వుంటే తప్ప!?
ఆలస్యంగా వచ్చాను కామెంటు రాయడానికి
తీరిగ్గా రాద్దామనుకుంటూ తీరకలేనితనంలో పడిపోవటంవల్ల అలా.
పరిణామ క్రమంలో జరిగే మార్పులను అవగాహన చేసుకుని కాపాడుకోవడమో, వదులుకోవడమో చేయాల్సినవి కొన్ని సంస్కృతిలో వుంటాయి. వాటిలో వస్త్రధారణ ఒకటి.
మనిషికి సాంస్కృతిక అవగాహన స్థాయీ భేదాలు వుంటాయని ఎక్కడో చదివిన గుర్తు (సమయానికి గుర్తు రావడంలేదు). ఉన్నత విద్య, బహుభాషల అధ్యనం, పలుదేసాల సాంస్కృతికత పై అవగాహనలవల్ల ఇవి ఏర్పడతాయి.
ఈ స్థాయిభేదాల దృష్టితో చూస్తున్నప్పుడు వస్త్రధారణ ఒక్కొక్కరికి ఒక్కోలాగా కన్పిస్తుంది.
మంచి వ్యాసాన్ని అందించినందుకు అభినందిస్తున్నాను
చర్చ, ఆలోచనల కోసం నిస్పాకి్షకమైన, లోతైన విశ్లేషణ చేసినందుకు రమాసుందరిగారికి కృతజ్ఞతలు అభినందనలు.
మీ వ్యాసం సమంగా వ్యాపించి విస్తరించిన వృక్షంలావుంది. నేను ఎపుడో రాసిన వ్యాసాన్ని సందర్భానికి సరిపోవచ్చన్న ఉద్దేశ్యంతో ఒక ఇక్కడ పేస్టు చేస్తున్నాను. నా అభిప్రాయం ప్రకారం వస్త్రధారణ కాదు, సాంకృ్కతిక కాలుష్యమే అంతటికీ మూలం
సహజమైన కుతూహలం కలిగించేవి (స్త్రీ కి పురుషుడు-పురుషుడికి- స్త్రీ), మనసుల్నిఆహ్లదపరచేవీ, ప్రకృతి పరమైన సహజత్వానికి దూరమై, డబ్బు సంపాదించే వ్యాపార వస్తువులుగా మారిపోవడం వల్ల జీవన సంసృ్కతి కలుషితమైపోతోంది. మహిళలపై, మైనర్ బాలికలపై, చివరికి బడిపిల్లలపై లైంగిక అత్యాచారాలకూ, అఘాయిత్యాలకూ, మూలమీ నైతిక, సాంస్కృతిక కాలుష్యమే!
ఉప్పు పప్పు నూనె బియ్యం లాంటి వినియోగవస్తువుల జాబితాలోకి మనుషుల ఉద్వేగాలతో ముడిపడివున్న వినోదం కూడా చాలాకాలం క్రితమే చేరిపోయింది. అమ్మకాలు కొనుగోళ్ళ మద్య వ్యాపారవస్తువైపోయిన “ఫన్” డిమాండు పెంచడానికి అందులో ఉత్తేజాలనూ, ఉద్రేకాలనూ కలిపేస్తున్నారు.
స్త్రీపట్ల పురుషుడికీ, పురుషుడి పట్ల స్త్రీ కి స్వాభావికంగా వుండే ఆసక్తి, కుతూహలాలను కృత్రిమంగా రెచ్చగొట్టే విధంగా సినిమాలు వస్తున్నాయి. మనుషులకు సహజసిద్ధమైన లైంగికేచ్ఛ ‘లిబిడో’ ని ప్రకోపింపజేసే వాతావరణాన్ని రూపొందిస్తున్న ప్రతీ ముడిసరుకూ వ్యాపారవస్తువే. బెల్టు షాపులు, లైసెన్సు లేని బార్లు, లైసెన్సువున్న బార్లు, పబ్బులు, ఔటింగులు, డేటింగులు, రేవ్ పార్టీలు మొదలైనవి చివరికి లైంగిక సంతోషాల వైపే దారిచూపిస్తున్నాయి.
సెక్స అనేది ఆనందపడటమే, ధ్రిల్ ఆస్వాదించడమే అన్న దృక్పధం వున్న పరిపక్వ/సంపన్న/న్యూరిచ్ క్లాస్ యువతీయువకుల విషయం పక్కన పెడితే ఈ ఆనందాల వేటలో ప్రలోభాల, భ్రమల ఎరకు చిక్కుకునేది మధ్యతరగతి, పేదతరగతి యువతులూ, మహిళలే – వీరిలో హెచ్చుమంది చివరి మజలీ వ్యభిచారమే అయిపోతోంది.
దీనికితోడు టెక్నాలజీ విస్పోటనం నుంచి వచ్చిన సోషల్ నెట్ వర్కింగ్ కుటుంబ సంబంధాల్లో సామాజిక బంధనాల్లో, మానవసంబంధాల్లో తీవ్రమైన మార్పులనే తీసుకువస్తోంది.
ఏకాంతంలో వుండే, వుండవలసిన మధురిమలు బట్టబయలవుతున్నాయి. ఎదుటివారితో ప్రశంసలు పొందాలన్న మనుషుల ఇచ్ఛ స్త్రీలలో పురుషులలో వెర్రితలలు వేసి ఎగ్జిబిషనిజం అవుతోంది.
ఇక్కడ విశేషమేమంటే వర్చువల్ మాయా ప్రపంచపు మనుషులు అవసరమనుకుంటే నిజంగా ప్రత్యక్షమైపోవడమే. మోహం మొత్తాక మాయమైపోవడమే.
మనుషులే సృట్టించిన ఇంటర్నెట్ లోకంలోకూడా మానవప్రపంచంలో వున్న మంచీచెడులన్నీ వున్నాయి. అయితే ఇది మంచి ఇది చెడు అని హితవుచెప్పే పెద్దమనుషుల వ్యవస్ధ అక్కడవుండదు. క్లిక్కులు, టా్రఫిక్కు, హిట్సే అక్కడ లాభనష్టాల లెఖ్ఖ.
పురుషాధిక్య సమాజపు “స్త్రీ పట్ల కుతూహలం” ఇంటర్నెట్ లో పెద్ద వ్యాపారవస్తువు. మానవసమూహాల మధ్యగాక ప్రయివేటుగా కంప్యూటర్లు, ఇతర గాడ్జెట్టుల తెరలమీద మాత్రమే కనిపించే వీలుండటంవల్ల స్త్రీని విశృంఖలంగా చూపించడానికి, చూడటానికి చిన్నపాటి సంకోచమైనా వుండటంలేదు.
ఇలాంటి “థ్రిల్” ఆఫ్ లైన్ లో, ఇంటర్నెట్ కనెక్షన్ కి అవకాశమే లేని ఫీచర్ మొబైల్ ఫోనుల్లో కూడా శరవేగంతో విస్తరిస్తోంది. మెమరీ కార్డుల్లో బూతు సినిమాలునింపి అమ్ముకునే వ్యాపారం గ్రామాల్లో పెరిగిపోతోంది.
వీటన్నిటి ప్రభావంగా మెదళ్ళల్లో సెక్స్ శక్తివంతమైన ముద్రతో స్ధిరపడిపోతోంది. ఇందువల్ల ఏ స్త్రీ ని అయినా లైంగిక దృష్టితో చూడటమే జరుగుతోంది. మనిషి వేషంలో వున్న కోర్కెల మృగాల మధ్య మహిళలు తిరుగుతున్నారన్న ఆలోచనే వొళ్ళు జలదరింపజేస్తుంది.
మహిళలు యువతులు చివరికి చిన్నపిల్లలపై లైంగికదాడులకు మూలాలు ఇవే.
వంటలో ఉప్పో పులుపో కారమో ఎక్కవైతే పాలో పెరుగోకలిపి వాటిని విరిచేసి రుచికరంగా చేసే చిట్కాలు అమ్మకు తెలుసు. వరదప్రవాహంలా ప్రపంచమంతా విస్తరిస్తున్న ఈ సంస్కృతికి అడ్డుకట్ట వేయడానికి చిట్కాలు చాలవనే అనిపిస్తుంది.
పాపికొండలు దాటాక దిగువవైపు గోదావరి వడి అంతా ఇంతాకాదు. గట్లను ఎలా కోసేయగలదో ఆ వేగం చూస్తేనే అర్ధమౌతుంది.గట్టుగ్రామాల్లో నివాసముండే గిరిపుత్రులు వెదురు బొంగులను ఒక కోణంవుండేలా చెక్కి ఒక మైలు దూరంలో ఏడెనిమిది వుండేలా నదిలో నాటేవారు. వెదురు కోణం, వాటిని నాటిన దిశలనుబట్టి ప్రవాహం దిశమారుతుంది. అంటే గట్టు కోతపడుతున్నచోటుని మార్చడమే. ఇందులో మహాప్రవాహం ఆగలేదు. చిన్న చిట్కాతో ఒక మళ్ళింపు ద్వారా కోతపడే ప్రదేశాన్ని కాపాడుకోవడమే!
“నిర్భయ” లాంటి కఠిన చట్టాలు విషఫలాలను మాత్రమే రూపుమాపగలవు. మూలాలను నిర్వీర్యం చేయనంతకాలం ఆడవారిపై అఘాయిత్యాలను ఆపడం” నిర్భయ” వల్లకాదు.
చట్టబద్ధతకూ, నైతికతకూ హద్దే చెరిగిపోయి, నీతి ఉనికే ప్రశ్నార్ధకమవ్వడంవల్ల ఈ తరం యువతరానికి “తప్పు”, “తలవంపు” అనే స్పృహే తెలియకుండా పోయింది. మనిషిమీద మనిషికి గౌరవ మర్యాదల సంస్కారాన్ని మళ్ళీ తీసుకురాగలిగితే దృక్పధాల్లోనే తప్పక మార్పువస్తుంది. ఇది చట్టాలూ, సామాజిక సంస్ధలపనికాదు. పూర్తిగా తల్లిదండ్రుల పనే. ఏ లైంగిక ఆగడం గురించి చదివినా, విన్నా- కన్నవారు జాగ్రత్తలు చెప్పేది కేవలం కూతుర్లకే…”కొడుకులూ! మీ ఆలోచనలూ నడకలూ జాగ్రత్త” అనాలనే ఆలోచనకూడా తల్లిదండ్రులకు రాకపోవడమే స్త్రీ అభద్రతకు పునాది అవుతోంది
సాంస్కృతిక కాలుష్యం మీద పాలకుల తో సహా అన్ని పార్టీలు, సామాజిక సంస్ధలు దృష్టిపెట్టాలి. ఒక సాంస్కృతిక విధానాన్నిరూపొందించుకోవాలి. నేరస్ధులను శిక్షించడంతోపాటు స్త్రీ పట్ల దురవగాహనపెంచే మూలాలపై చైతన్యం తేవాలి. నీచమైన ఆలోచనలు ఒక రుగ్మత అనే స్పృహ పెంచాలి. ఇదంతా అంతతేలికేనా అనేఆనుమానం ఎదురౌతుంది. ఆదేసమయంలో గోదావరి ప్రవాహాన్ని మళ్ళించి గట్టు కాపాడుకునే గిరిజనుల అనుభవాన్ని కూడా గుర్తు చేసుకోవాలి.
నవీన్ గారు. చక్కని విశ్లేషణ చేసారు.
అద్భుతమైన విశ్లేషణ
…