నాకు తెలిసేసరికే నువ్వున్నావు.
గుండె గదులు కబ్జా చేసి
మోయలేనంత భారంగా
దూరలేనంత చిక్కంగా
ఆకాశంలా అనంతమౌతూ
2
పంచుకుని తేలికౌదామనుకుంటే
ఓపలేని బరువుతో కొందరు
మనసు లేని దేహంతో ఇంకొందరు
నకిలీ ముఖాలతో మరికొందరు
అసలు ముఖమే లేని వాళ్ళు మిగాతాకొందరు
నిన్ను మోయలేక ముక్కలైన
పొడిబారిన ప్రపంచం
3
కొత్తా పాతా లేదు
స్థలకాలాల స్పృహ అసలే లేదు
పరాయి లొకంలోఉన్నా
పరాయి మనుషుల మధ్య ఉన్నా
ఎక్కడైనా ఎప్పుడైనా
తొంగి చూసే నిన్ను
తరిమి కొట్టలేక
దిగమింగుకోనూలేక
ఎన్ని అగ్నిపర్వతాలు బద్దలవలేదూ?!
పొంగిపొర్లిన లావాలో
ఎన్ని దేహాలు చితికిపోలేదు?!
4
నువ్వులేని మనిషి కోసం
నువురాని తావు కోసం
నువ్వు లేని నా కోసం
ఈ అన్వేషణ
ఎప్పటికైనా కనుగొనలేకపోతానా?!
అప్పటి వరకు
నాకు నువ్వు
నీకు నేను.
హరితా దేవి గారూ,
మీ ఊహాశాలిత అసామాన్యం అనిపించింది నాకు. అభినందనలు.
ధన్యవాదాలు ఎలనాగ గారు