ఎవరైనా ఎప్పుడైనా అమ్మ తో మాట్లాడారా?
దివారాత్రుల నడుమ మూడో కన్నులా
నిరంతరం మెలకువ తో జీవించే అమ్మతో
ఎవరైనా ఎప్పుడైనా మాట్లాడారా?
అమ్మా! నువ్వంటే నాకిష్టమని చెప్పేలోగా
నేనంటే ఎంత ప్రాణమో
ఆమె తన ప్రేమ చూపించేది….
అంతే…ఇక నేను మాట్లాడనే లేదు….
నీకేమైనా సహాయం చేయాలా అని అడిగేలోగా
నా పనులన్నీ తనే చేసి పెట్టేసేది
అంతే…ఇక నేను మాట్లాడనే లేదు….
మొదటి సారి నేను ఇల్లొదిలి వెళ్ళేటప్పుడు
ఆమె కన్నీళ్ళ నది లో
వాళ్ళ అమ్మ రూపం కనిపించింది నాకు
నా పిచ్చి తల్లి వాళ్ళ అమ్మ కోసం
ఎంతకాలంగా బెంగెట్టుకుందో…
అంతే…ఇక నేను మాట్లాడనే లేదు….
మనం రాయని ఉత్తరాల కోసం
మనం మాట్లాడని మాటల కోసం
మనం చెయ్యని సహాయాల కోసం
మనం పొందటమే తప్ప తిరిగివ్వని ప్రేమల కోసం
మన కవితల్లో వస్తువులై, కవితా శీర్షికలై
మాతృ దినోత్సవాలకు గ్రీటింగ్ కార్డులై
అమ్మ లు అలా ఎదురు చూస్తూనే వున్నారు
నాకిప్పటికీ అర్థం కాదు
మనకు అమ్మ అపురూపమా? అమ్మకు మనం అపురూపమా?
కల్పన గారూ,మీ అక్షరాలకు అంజలి ఘటిస్తున్నాను. తనహాయ్ చదవాలనె ్తమన్నా ఇంకా తీరలేదు.
ఒక బిడ్డగా,అమ్మగా రెండు పత్రాలు పోషించే మీకు ఏది అపురుపమో తేలవదంటారా? మీకు తేలవనప్పుడు మాకు తెలిసే అవకాశమే లేదు.
నాకిప్పటికీ అర్థంకాదు
మనకు అమ్మ అపురూపమా? అమ్మకు మనం అపురూపమా?
కల్పనగారూ,మీ అక్షరాలకు అంజలి..!
*ఆమె కన్నీళ్ళ నది లో
వాళ్ళ అమ్మ రూపం కనిపించింది నాకు
నా పిచ్చి తల్లి వాళ్ళ అమ్మ కోసం
ఎంతకాలంగా బెంగెట్టుకుందో…*
కవిత మొత్తం.. అమ్మ, అమ్మను కన్న అమ్మ..
అమ్మతనం లో మూగతనం..
కొత్త దృశ్య ప్రవాహం కల్పన గారు!