నీకూ నాకూ మధ్య ఒక భూగోళం అడ్డు
నీకూ నాకూ మధ్య ఒక సూర్యచంద్రులు అడ్డు
అన్నిటికీ మించి ఒక అహం అడ్డు
ఎన్ని అణువులు కలుస్తున్నాయో
కొలవలేని దూరాన్ని అడ్డేయడానికి
ఎన్ని వనాలు కాచుకొనున్నాయో
ఒక సంగమాన్ని హరితవర్ణంచేయడానికి
అయిదేళ్ళ మీద లెక్కించే మహాసముద్రాలేనా
వానకు హేతువయ్యేది
జంట నయనాలెన్నిటినో మర్చిపోయావేం !?
నిన్నూ నన్నూ తడిపే అన్ని వేల వాన చుక్కల్లో
అశ్రుధారలెన్నో
ఏదోక క్షణాన
భూమండలం అంచుల్లో ఒకే అలై పుడతాం
ఎగసిపడే జీవానికి ఒకే అభినయమవుతాం
ఇదిగో ఇక్కడే
సరిహద్దురేఖల్ని చెరుపుకుని
ప్రహారికి పట్టనంత విశాలమవ్వాల్సిందిక్కడే
ఎల్లరాయిల్లేని ఆకాశాన్ని చూసినప్పుడల్లా ఆశ ఇదే!
ఆ నీలపు కాన్వాసుపైన గీయాల్సిన చిత్రమిదే!
Painting: Vincent van Gogh
Credit: wikimedia.org
నిన్నూ నన్నూ తడిపే అన్ని వేల వాన చుక్కల్లో
అశ్రుధారలెన్నో – ……. గుండెను తడిని చేసాయి .
ఎల్లరాయిల్లేని ఆకాశాన్ని చూసినప్పుడల్లా ఆశ ఇదే!….. అనంతమైన ఆత్మ విశ్వాసాన్ని కలిగిస్తోంది.
ఇదిగో ఇక్కడే
సరిహద్దురేఖల్ని చెరుపుకుని
ప్రహారికి పట్టనంత విశాలమవ్వాల్సిందిక్కడే….
నిజమే.. అందరిలోను కలగాల్సిన ఆశను హృద్యంగా చెప్పారు తులసి గారు. అభినందనలతో..
ఎంతో అద్భుతంగా రాస్తున్నారు తులసి గారు. మీ కవితా ప్రస్థానాన్ని మొదటినుంచీ చూస్తున్న నాకు ఇది ఎంతో ఆనందం కలిగిస్తోంది. తప్పక రాస్తూ ఉండండి. BTW మీ పుస్తకం ఎప్పుడొస్తోంది?
తులసి గారూ:
మీరు రాసిన వాటిల్లో ఇది కొంచెం భిన్నమయిన కవిత కదూ?!
ఇప్పటివరకూ చదివిన మీ కవితల్లో అనుభూతి ప్రధానంగా కనిపిస్తుంది, ఇందులో మీరు అనుభూతిని కూడా విశ్లేషించుకొని, సమతుల్యమైన ఒక ఆలోచనని వెంటబెట్టుకొని వచ్చారని అనిపించింది. ఈ మార్పు వల్లనే పైన వ్యాఖ్య రాసిన మూలా గారు మంచి పురోగతిని చూసి ఉంటారని అనుకుంటున్నాను.
ఇందులో చాలా వాక్యాలు మళ్ళీ మళ్ళీ చదువుకోవడమే కాకుండా, చదివిన తరవాత వాటిని గురించి ఆలోచించుకునే పని పెట్టారు మీరు. మీ రీడర్ గా ఇది నాకు పండగ లాంటి సన్నివేశమే మరి!
అలాగే, ఈ కవితలో చరణాల విభజన కూడా! ప్రతి చరణం దానికదే వైవిధ్యంగా ఉంటూ ఒక పూర్తి ఆలోచనని, అనుభూతిని చూపిస్తోంది.
ఈ మార్పు మీరు conscious గా చేస్తున్నారా?
తన కవితల్ని గురించి మాట్లాడడం కవికి కష్టమయిన పనే కాని…మీ కవిత్వం పట్ల తదాదిగా ఆసక్తీ, అనురక్తీ వుండడం వాళ్ళ అడుగుతున్నాను. మీరు సమాధానమిస్తే, ఈ దీపావళికి ఇంకో దీపం ఈ కవిత పేరున వెలిగించుకుంటా సంతసంగా!
Touching.
బరువైన కవిత్వం! లోతైన శైలీ! చేయి తిగిన చిత్రికరణ.
పేరు పేరునా అందరికీ ధన్యవాదాలు.
సుబ్బూ గారు…పుస్తకం…పెద్ద ప్రాజెక్టు…ప్లాన్ చేసినప్పుడు మీకు ముందే చెబుతా
రవికిరణ్ గారు…మీ విశ్లేషణ సూపర్. మీ అభిమానానికి థాంక్యూ. నా కవితను గురించి మాట్లాడం నాకు కష్టమే అని మీరే తేల్చేసారు
నిజమని ఒప్పుకుంటున్నా !
వహ్ … సూపర్ అండి…..
ఔను ఏదో ఓ అపురూప క్షణాన ఆకాశాన్ని కిందకి దించాల్సిందే…ఇలా ఐనా ఎలా ఐనా. ఇలా మీ అక్షరాల్లొంచి తొంగిచూస్తూ దించితే కాన్వాసే మీ కుంచెకి రంగులద్దదూ ఆనందంగా!!