ఆమె మాటలు సూటిగా, నిర్మొహమాటంగా, ఒక్కోసారి ఘాటుగా ఉంటాయి. “పొద్దుపొద్దునే మొహం కడుక్కోగానే నేను చేసే పని నాలుకకు పదును పెట్టడం” అని నిస్సంకోచంగా చెప్పగలిగే తెగువ కూడా ఉంది. స్వేచ్చనీ, ప్రేమనీ సమానంగా కోరుకుని ఒంటరితనంతో మిగిలిపోయే ఒక స్త్రీ గొంతుక ఆమె రచనల్లో వినపడుతుంది.

కథకురాలిగా, కవయిత్రిగా, విమర్శకురాలిగా, సంపాదకురాలిగా సాహిత్యంతో సుదీర్ఘమైన, గాఢమైన అనుబంధం ఉన్న మహిళ డొరోతీ పార్కర్ (ఆగస్ట్ 22, 1893 – జూన్ 7, 1967). ఆవిడ స్క్రీన్ ప్లే రాసిన సినిమాలు అకాడమీ అవార్డులని గెలుచుకుని ఆమెకి మంచి పేరు తెచ్చిపెట్టాయి. డొరోతీ రచనలు ఆమె ఆదర్శాలకి, రాజకీయ, సామాజిక అభిప్రాయాలకి అద్దం పడతాయి.

“నేనొక స్త్రీవాదిని. స్త్రీల గురించిన విషయాలకే కట్టుబడి ఉంటాను. ఈ నగరంలో కనీస సౌకర్యాలు లేని రోజుల్లో కూడా మహిళా ఉద్యమాల్లో మేము పాల్గొన్నాం. ఆడవాళ్లకు సమానహక్కుల కోసం ఎన్నో నిరసనల్లో భాగమయ్యాం. సరదాకోసం ఊహాత్మకమైన కథలు రాసే రచయిత్రులు పుట్టుకొస్తారని అప్పుడు ఊహించలేదు.”

తన రచనల ప్రయోజనం ఏమిటో పై మాటల్లో డొరోతీ స్పష్టం చేసింది. ఈ బలమైన అభిప్రాయలు, కార్యకలాపాల వల్ల ఆవిడ తన సినీ రచనా వ్యాసాంగానికి దూరం కావల్సి వచ్చింది కూడా.

డొరోతీ రచనాశైలిలో కొట్టొచ్చినట్టు కనపడేది వ్యంగ్యం. మూస ఆలోచనల్ని, కట్టుబాట్లని కాదని స్వతంత్రభావాల్ని, ప్రతీ స్త్రీకీ ఉండే ప్రత్యేకమైన అభిరుచుల్ని, ఆకాంక్షలనీ వ్యక్తపరచడం ఆవిడ రచనల ప్రధాన ఉద్దేశం. హాస్యం, చమత్కారం ఆమె వాక్యానికి అలంకారాలు. నిజాయితీ, నిర్మొహమాటత్వం, ధైర్యం ఆవిడ రచనల్లోనూ, జీవన విధానంలోనూ అడుగడుగునా కనిపిస్తాయి.

మచ్చుకి కొన్ని డొరోతీ వాక్యాలు:

ఆమె పద్ధెనిమిది భాషలు మాట్లాడగలదు. కానీ ఏ ఒక్క భాషలోనూ “కాదు” అని చెప్పడం రాదు.

నాకు మగవాళ్లలో నచ్చేవి మూడు విషయాలు- అందం, క్రూరత్వం, మూర్ఖత్వం.

నన్ను తీసుకెళ్ళు, లేకపోతే వదిలెయ్. లేదంటే ఎప్పట్లానే రెండూ చెయ్యి.

బాల్యంలోని అనుభవాలని మీ కథలకి ప్రేరణగా వాడుకున్నారా?

-అవేగనక రాసుంటే మీరిప్పుడు నాతో కూర్చుని మాట్లాడేవాళ్ళు కాదు.

ఐతే, మీ రచనలకి ప్రేరణ?

- డబ్బుతో నాకున్న అవసరం

అది కాకుండా?

- మనకి ఇష్టం లేనివాటిని గురించి రాయడం చాలా తేలిక. ఒక చెత్త పుస్తకమో, పనికిరాని నాటకం గురించో అడిగితే చక్కగా రాయొచ్చు.

“బిగ్ బ్లాండ్” ఆలోచన ఎలా వచ్చింది?

- నా స్నేహితురాలు ఒకావిడ చాలా కష్టాలు పడటం చూశాను. చూసింది, అనుభవించింది రాయడమే రచయితల పని అనుకుంటాను. అభూతకల్పనలు నాకిష్టం ఉండవు.

మీరు కథలెలా రాస్తారు? ముందొక చిత్తు రాసుకుని తర్వాత తిరగరాస్తారా?

- ఒక కథ రాయడానికి నాకు ఆర్నెల్లు పడుతుంది. పూర్తిగా ఆలోచించుకొని ఒక్కో వాక్యమూ జాగ్రత్తగా రాస్తాను. విడిగా ప్రతులేమీ ఉండవు.

పాత్రలకి పేర్లెలా పెడతారు?

- టెలిఫోన్ డైరెక్టరీ, పత్రికల్లో సంతాప సందేశాలు – వీటినుంచి.

1. బిగ్ బ్లాండ్ కథ

2. ఒక టెలెఫోన్ కాల్ – కథ

3. ముఖాముఖి – కవిత

4. Dear D. – పూర్ణిమ

5. తెలుపూ, నలుపూ, చామనచాయ కథలు – నిడదవోలు మాలతి గారి ‘తెలుగు తూలిక’ బ్లాగ్ నుండి.

వాకిలి జూలై సంచికకు స్వాగతం. ఈ సంచికలోని విశేషాలు కొన్ని:

అతనికి కడుపునిండా తిండి దొరుకుతుంది, కానీ, వేళ కానీ వేళ, తను తినేది మరెవరికోసమో, ఆకలికి అజీర్తికీ మధ్య శరీరం సతమతమౌతుంటుంది. పెళ్ళాం పిల్లల్ని పస్తు పడుకోబెట్టి తను మాత్రం అతిగా తినకతప్పని ఒక మనిషి (ఒక వృత్తి)ని గురించిన అరిపిరాల కథ “తెల్లతాచు”-

బీఫ్ గురించిన చర్చలు, చట్టాలు ఊపందుకుంటున్న నేపథ్యంలో ఒక సామాజిక వర్గానికి సంబంధించిన వాతావరణాన్ని, సంస్కృతిని అత్యంత సహజంగా చూపించే చంద్రశేఖర్ కథ “బోరచెక్కు”-

స్నేహం, ప్రేమ, కొసమెరుపులతో సాగే ఆ ఐదుగురు స్నేహితుల మధ్య దాగిన రహస్యం “సాక్షి” కథ, విజయ కలం నుండి-

అనిల్ ఎస్. రాయల్ గారి ‘నాగరికథ’ కథాసంపుటిపై చంద్రశేఖర రెడ్డి రాసిన సమీక్షా వ్యాసం-

చిన్ననాటి షికారీలు గుర్తుకు తెచ్చే నాగరాజు రవీందర్ కథ “షికారి”-

ఇకపోతే, నౌడూరి మూర్తిగారి Wakes on the Horizon పుస్తకంపై మానస సమీక్ష, నోబెల్ అవార్డ్ రచయిత విలియం ఫాక్‌నర్ పై సురేష్ గారి వ్యాసం ఈ నెల ప్రత్యేకం.

నుడి, కవితలు, ముషాయిరా గట్రా షరా మామూలే.

వాకిలి జూన్ సంచికకు స్వాగతం!

“ఈ పుస్తకం కొని అలమరాలో భద్రంగా దాచుకోదగింది”. “…ప్రక్రియకు ఈ రచయిత్రే(తే) ఆద్యురాలు(డు)”. “తన జాతి/వర్గం/ప్రాంతం/మతం/కులం/జెండర్ కోసం నిరంతరం పలవరిస్తుంటాడు”. “ఎంతో సున్నితమయిన కవి. ఎక్కడా ఎప్పుడూ ఎవరినీ నొప్పించిన దాఖలాలు లేవు”. “తన శత్రువుని సరిగ్గానే గుర్తించాడు, గుర్తించటమే కాదు సూటిగా శషభిషలు లేకుండా గురిపెట్టాడు. గురిపెట్టటమే కాదు తనేమిటో ప్రపంచానికి ప్రకటించాడు…”. “అతడి కవిత్వాన్ని మౌనంగా చంపే పెద్ద కుట్ర జరుగుతోంది”. “సాహితీలోకం అతడికి బ్రహ్మరథం పట్టింది”. “కాలం అతన్ని కలగనింది. నిజానికి కాలాన్ని అతడే కన్నాడు”. “కాదు అతడొక్కడే కనీ వినీ ఎరుగని ఒకే ఒక కవి (లేదా రచయిత)…”

కవిత/ కథ/ పుస్తకం మీద ఇలాంటి రివ్యూలు పత్రికల్లో తరచూ వస్తుంటాయి.

అది తెలుగే, కానీ తెలుగు పాఠకులకు అర్థం కాని ఓ సరికొత్త భాష. పైన ‘పుస్తక విమర్శ’ లేదా’ సమీక్ష’ అని ఉంటుంది గానీ, అది ఆయా విమర్శకునికీ రచయితకూ మధ్య జరిగే ఓ రహస్య సంభాషణ. పొరపాటున ‘వాట్స్ ఆప్ ‘ లోనో ‘మెసెంజర్’ లోనో పెట్టబోయి పత్రికకు పంపారా అనుకుందామనుకొంటే కింద సమీక్షకుడి ఫోన్ నంబర్ ఉంటుంది – ఆ రొజే ఒక వంద పరామర్శ ఫోన్కాల్ సంభాషణలని ఆశిస్తూ.

అనేక పేరాల కొద్దీ చదివినా ఆ రచన ఏమిటో, ఆ పుస్తకంలో ఏముందో, దాని ప్రత్యేకత, లోటుపాట్లు ఏమిటో తెలియవు – పొగడ్తలు తప్ప. లేదా పై మొత్తానికీ భిన్నంగా తిట్ల వర్షంలో ముంచెత్తటమే లక్ష్యంగా మరో రకం సమీక్షల బహిరంగ యుద్ధం. వీటిని తలదన్నే ఇంకోరకం – అసలా పుస్తకాన్నే చదవకుండా అందులో ఏముందో ఊహించి తెలుసుకొని పేజీలకొద్దీ రాయగలిగే ప్రతిభని సొంతంచేసుకొన్న మరో తరం విమర్శకులూ/ సమీక్షకులూ.

పాఠకులకు సంబంధం లేని ఇలాంటివాటికి భిన్నంగా అచ్చమైన పుస్తక విమర్శను ‘వాకిలి ‘ ఆహ్వానిస్తోంది. ఉత్తమమయిన విమర్శకు లేదా సమీక్షకు ప్రతినెలా బహుమతి ఇవ్వబోతోంది. ప్రతి నెలా ఒక మంచి సమీక్షా వ్యాసానికి ఆ రచయిత మన దేశంలో ఉంటే 1000 రూపాయల అమెజాన్ గిఫ్ట్ కార్డ్ లేదా విదేశాల్లో ఉంటే 20 డాలర్ల Barnes & Noble గిఫ్ట్ కార్డ్ ఇస్తాము.

ఈ సూచనలు పాటించండి:

1. పరిచయం చేయబోయే పుస్తకం వివరాలు (కథా? నవలా? వ్యాసావళా? మరోటా?) వివరంగా రాయండి.

2. సమీక్ష రాయడానికి మిమ్మల్ని ప్రేరేపించిన ప్రధాన ఉద్దేశ్యం.

3. పుస్తకంలో నచ్చినవీ, నచ్చనివీ – కట్టె, కొట్టె, తెచ్చె – అన్నట్లు కాకుండా వివరంగా ఉదాహరణలు సహా ఉండాలి.

4. అన్నీ సుగుణాలే కాకుండా లోటుపాట్లతో కూడిన సద్విమర్శ కూడా ఉండాలి.

5. కేవలం పుస్తకం గురించే ఉండాలి కానీ, ఆ రచయితపై వ్యక్తిగత వ్యాఖ్యలు ఉండరాదు.

6. ఈ పుస్తకం చదవమని కానీ, కొనమని కానీ సిఫార్సు చేస్తారా?

7. సంక్షిప్తంగా కాకుండా వీలయినంత పరిశీలనతో, విశ్లేషణతో ఉండాలి.

8. 1990వ సంవత్సరం తర్వాత ప్రచురింపబడ్డ తెలుగు పుస్తకాలను మాత్రమే సమీక్ష కోసం ఎంపిక చేసుకోవాలి.

గమనిక: బహుమతి ఇచ్చే / ఇవ్వని విషయంలో సంపాదకులదే తుది నిర్ణయం. మీ సమీక్షలను ప్రతినెలా 20 వ తేదీలోగా పంపించండి.

ఈ సంచికలో:

బయటికి అందంగా, బలంగా కనిపించే వివాహ బంధాలు నిజానికి పెళుసుగా ఉంటాయని నిగూఢంగా చూపించిన సుజాత గారి అనువాద కథ ‘ఆ తెల్లని ఇల్లు’;

రచయిత తత్వాన్ని పరిచయం చేసే మెహెర్ గారి కథ(లు) ‘రెండు రచయితల కథలు’;

ఇంతకుముందు ‘బౌండరీ దాటిన బాలు’ లాంటి చక్కని కథలని వాకిలి పాఠకులకు అందించిన మధు పెమ్మరాజు గారి కలం నుండి మరో కథ, ఆధునిక బంధాలలోని సంక్లిష్టతను సున్నితంగా స్పృశించిన కథ, ‘ఫైండింగ్ డోరీ’;

ఎంతో మంది ప్రశంశలు అందుకున్న ‘గ్రేప్స్ ఆఫ్ రాత్ ‘ నవల గురించి సురేష్ గారు రాసిన వ్యాసం;

ఇంకా-
హరి బొద్దున గారి కథ ‘డెజిగ్నేటెడ్ పార్ట్ నర్’, మైథిలి గారి కొత్త కాలమ్ ‘దీపాలు పెట్టే వేళ’, ఎలనాగ గారి నుడి, కవితలు, ప్రకటనలు యధావిధిగా.

దర్భశయనం శ్రీనివాసాచార్య
#2-324, వీధి నెంబర్ -5,
బ్యాంకు కాలనీ; విద్యారణ్యపురి,
హనుమకొండ – 506009
మొబైల్ : 9440419039

కాలేయం గురించి కవిత్వం రాస్తాడు. కథలతో కీమో థెరఫీ చేస్తాడు. సంకోచాలు లేని పద సంచయం అతనిది. సందేహాలు, మొహమాటాలు లేని సూటిదనం అతని వచనంలో గుచ్చుకుంటుంది. ఎవరికివారు నేనేనేమో అని తరచిచూసుకునేలాంటి పాత్రలు, వాస్తవంలోంచి త్రీడీ చిత్రాలుగా మనముందుకొచ్చే సన్నివేశాలు అతని స్పెషల్ మార్క్. డాక్టర్, రచయిత వంశీధర్ రెడ్డితో ఇంటర్వ్యూ ఈనెల ప్రత్యేకం.

గిరికుమారుని నవయవ్వన ప్రేమగీతాలనుంచి, కిన్నెరసాని పరుగులమీదుగా ప్రవహించి, భ్రష్టయోగి తత్వాన్ని చూపిన విశ్వనాథ గారి అసమాన కవితా ప్రతిభ, నవరసాల మేళవింపుతోసాగే ఆయన కాల్పనిక సృజనలను స్మరిస్తూ ఈ నెల ఎడిటర్స్ పిక్.

క్రైమ్ వెనక కథలు, కథల వెనక కరడుగట్టిన జీవితపు కత్తిపోట్లు, కలగలిసిన ఉత్కంఠ. చీకటి బతుకులు, బతుకు చీకట్లు ముసురుకోవటాన్ని చూపించే “ఫోర్ స్క్వేర్”, వాకిలిలో అనంత్ మొదటి కథ.

పుట్టి పెరిగిన ఊరి పటాన్ని మనముందు పరిచి, నడిచొచ్చిన తొవ్వల్లో మళ్ళీ నడిపించి, చిన్ననాటి జ్ఞాపకాలను ఒక్కపెట్టున మనమీద కుమ్మరించి వెళ్ళే ప్రేమ కథ “నీలా టీచరూ, ఇంకో పెద్దకళ్ళ అమ్మాయీ”, మెహెర్ కలం నుంచి.

మైథిలి గారి Historical fiction ‘సుధా వృష్టి’, రవి బడుగు ‘గరుగు చెప్పిన కథ’, కవితలు, పుస్తక పరిచయాలు యధావిధిగా.

ఈ సంచికలో-

అలంకారాల ఆడంబరాల దారినుండి సరళత వైపు, దృశ్యమానమైన వచనంవైపు తెలుగు కవిత్వాన్ని మలుపు తిప్పిన కవి ఇస్మాయిల్. ఈ కవి రచనలు, సదరు రచనలపై వచ్చిన పలు విమర్శ వ్యాసాలతో కూర్చిన “ఒకే ఒక్కడు ఇస్మాయిల్” ఈ నెల ఎడిటర్స్ పిక్.

అందరూ ఒకేరకంగా ఎందుకూ రాయడం అంటున్న కవీ, కథకుడూ ‘కన్నెగంటి చంద్ర’తో ముఖాముఖం.

రానారె గారి గొంతులో స.వెం.రమేశ్ గారి ప్రళయ కావేరి కథ ‘ఉత్తరపొద్దు’.

ఏప్రిల్ 17న మార్క్వెజ్ వర్ధంతి. One Hindered years of solitude పుస్తకానికి ఈ ఏడాదితో యాభయ్యేళ్ళు నిండుతాయి. ఈ సందర్భాన్ని పురస్కరించుకుని “యాభయ్యేళ్ల వందేళ్ల ఏకాంతం” పేరుతో సురేష్ గారు తెలుగులోకి అనువాదం చేసిన మార్క్వైజ్ ఇంటర్వ్యూ.

చిన్న పిల్లలనుండి విశ్రాంత ఉద్యోగుల వరకూ అందరికీ ఆసక్తి కలిగించే వ్యాపకం నుడికట్టు. ఈ క్రాస్వర్డ్ పజిళ్ళ పరంపరలో చెప్పుకోదగ్గది హిందు పత్రికవారు నిర్వహిస్తున్న Crossword. ‘ద హిందు’ క్రాస్ వర్డ్ పజిళ్లలోని చమత్కార వైవిధ్యం, విస్తృతి, వైచిత్రి గురించి ఎలనాగ గారి ప్రత్యేక వ్యాసం.

1989 లో ‘ఆనంద వికడన్’ పత్రికలో వచ్చిన ప్రముఖ అరవ రచయిత సుజాత గారు రాసిన “ముదల్ మనైవి” కథకి అవినేని భాస్కర్ గారి అనువాదం.

కళాకారుల జీవితాల గురించి ప్రజలకి ఎప్పుడూ కుతూహలం ఉండటం సహజమే. వాళ్ళు నివసించిన ఇళ్ళు, వాడిన వస్తువులు, పదిలపరిచిన జ్ఞాపకాలు అన్నీ అపురూపమే. ఇటువంటి విషయాల గురించిన సమాచారమూ అరుదే. ఇటువంటి అరుదైన సమాచారాన్ని మనకందిస్తున్న సుజాత గారి వ్యాసం “హెమింగ్వే మ్యూజియం” ఈ నెల వాకిలి ప్రత్యేక ఆకర్షణ.

మిగతా కవితలు.. కథలు యధావిధిగా…

“అట్లాగని పెద్ద బాధా ఉండదు” అనేది ఒక మో కవితలో మొదటి పంక్తి. ఈ పంక్తికి ముందు (తర్వాత కాదు) మీరేదన్నా పంక్తిని ఊహించి రాయగలరా? అది తమాషాగానూ ఉండవచ్చు, కవితాత్మకంగానూ ఉండవచ్చు, మీ ఇష్టం.

అటువంటి సంగీతాత్మకమైన, సాహసోపేతమైన ఒక ప్రయాణాన్ని గురించిన అనుభవాలు అజిత్ హరిసింఘాని పుస్తకం “ప్రయాణానికే జీవితం” లో ఉంటాయి. దీన్ని తెలుగులో అనువదించింది కొల్లూరి సోమశంకర్. ఈ పుస్తక రచయిత మోటర్ సైకిల్ పై పూనె నుండి జమ్మూ వరకూ ఒక సూదూర ప్రయాణాన్ని సఫలం చేసుకున్నారు.

దారులు, వాతావరణాలు, ఆహారం గురించిన సమాచారాన్నిచ్చే మాములు యాత్రావిశేషాల కేటలాగ్ కాదిది. ఎటువంటి ముందస్తు ఏర్పాట్లూ లేకుండా కొత్త ప్రదేశాల్లో రాత్రులు గడపటం, రైతుల్నీ, సాధువుల్నీ, సైనుకుల్నీ, ఇతర ప్రాంతాల సామాన్య ప్రజల్నీ కలుస్తూ, పలకరిస్తూ ఆ కాసేపటికీ వారిలో మనిషిగా కలిసిపోతూ సాగిన ఆత్మీయమైన ప్రయాణం ఇది. అసాధారణమైన వాతావరణాలకి అనుకూలంగా మెలగడం, ఊహించని ప్రమాదాలకి సిద్ధంగా ఉండటం, తన గుర్తింపు అనుమానించబడిన సందర్భంలో స్నేహంతో నెగ్గుకురావడం వంటివి ఈ యాత్రలో కీలకమైన విషయాలు. చదువరికి ఆహ్లాదంగా, ఆసక్తికరంగా సాగిపోయే శైలి, దానికి అణుగుణమైన అనువాదం.

***

పుస్తకంలోని ‘కన్నీళ్ళ లోయ’ చాప్టర్ లోంచి:

“తలుపు పక్కన, నేను నిలుచున్న చోటికి ఎడమవైపు ఎత్తుగా ఉన్న ఓ అలమారలో టి.వి, డివిడి ప్లేయర్ అమర్చి ఉన్నాయి. ఏదో సినిమా పెట్టినట్లున్నారు… “రాత్ అకేలీ హై” అంటూ తనూజ, దేవానంద్‍ను కవ్విస్తోంది. కానీ ఎవరూ దానిని చూడడం లేదు. అంతకుముందు వాళ్ళు దాన్ని ఎన్నోసార్లు చూసుంటారు. ఎవరో నా చేతిలో ఓ పెద్ద స్టీలు గ్లాసుడు లస్సీ పెట్టారు. నేను మరాఠీలో మాట్లాడుతుంటే వినాలని ఆ యువకుల కోరిక. గడ్డం గీసుకోకుండా నల్ల టీ-షర్ట్ జీన్స్ పాంటుతో ఉన్న కుర్రాడు – అదే నన్ను రోడ్డు మీద ఆపిన కుర్రాడు – తన పేరు శివనాథ్ అని, పూనెకి సుమారుగా 25 కిలోమీటర్ల దూరంలో ఉన్న ఆకుర్డి తన ఊరని చెప్పాడు. నేను పూనే చేరాక వాళ్ళింటికి ఫోన్ చేసి తానిక్కడ బావున్నట్లుగా వాళ్ళ అమ్మకీ, సోదరికి చెప్పమని అడిగాడు. అదో సాహసవంతమైన సందేశం అని నాకు తెలుసు, ఎందుకంటే నిజానికి వీరెవ్వరూ ఇక్కడ ‘బాగోలేరు’. ఇక్కడి ఒత్తిడి వీళ్ళపై ప్రతీక్షణం ప్రభావితం చూపుతోంది. బయటకి ధైర్యం నటిస్తూ, ఆ ఒత్తిడిని మభ్యపెట్టడానికి ప్రయత్నిస్తున్నారీ యువకులు. సొంత ఊర్లని, బంధుజనాన్ని వదిలి ఎక్కడో దూరంగా ప్రమాదకరపరిస్థితుల్లో… ఇలా నా చుట్టూ మూగి ఉన్న వీళ్ళు – అత్యంత ప్రమాదకర ప్రపంచంలో వదిలివేయబడ్డ పిల్లల్లాగా – ఉన్నారు. నాందేడ్‌కు చెందిన దిలావర్ అనే సిక్కు యువకుడు…. స్వచ్ఛమైన మరాఠీ మాట్లాడుతూ మమ్మల్నందరినీ ఓ ఫొటో తీసాడు. మేమందరం ఆ ఫొటోలో నిషేధించబడ్డవారిలా కనబడుతున్నాం.

బయల్దేరుదామని లేచినప్పుడు, ఏదో తెలియని అపరాధ భావంతో నా గుండె బరువెక్కింది. వాళ్ళని వాళ్ళ ఖర్మకి వదిలేసి వస్తున్నట్లు అనిపించింది. ఈ ప్రతికూల పరిస్థితులలో, ఈ ఏడాది వీళ్ళలో ఎంతమంది సైనికులు మిగులుతారు? ఓ వారం తర్వాత మా ఇంట్లో సుఖంగా పడక్కుర్చీలో కూర్చుని కాఫీ తాగుతూ, వీళ్ళ జీవితాలను బలితీసుకున్న ఆకస్మిక దాడి లేదా పేలుడు గురించి చదువుతానా? శివనాథ్‌కి పెళ్ళై, కుటుంబం ఏర్పడుతుందా? లేకపోతే అతని అమ్మ, సోదరి అతనిక లేడనే దుర్వార్త వింటారా?

విషమమైన ఈ ఆలోచనలు నాలో ఏ మాత్రం ఉత్సాహాన్ని కలిగించలేకపోయాయి. మొహానికి బలవంతంగా చిరునవ్వు పులుముకుని వాళ్ళకు వీడ్కోలు పలికాను. రోడ్డెక్కి, నా ముఖం హెల్మెట్ కింద మరుగున ఉన్న ఆ క్షణంలో నా గుండె బరువుని దించుకున్నాను. అవును నేను ఏడుస్తున్నాను. గట్టు తెగిన ఆనకట్టలా ధారాపాతంగా కంటి నిండా నీళ్ళు! నాలో ఏదో వెలితి. ఓ సైనికుడు దేశం కోసం చేసే త్యాగాన్ని మొట్టమొదటిసారిగా… అర్థం చేసుకున్నాను. జాతీయత పేరుతోనూ మతం పేరుతోనూ మానవ దురవస్థని ఎప్పుడూ రగులుతూండేలా చూసే వ్యక్తుల కోసం తన జీవితాన్ని ఫణంగా పెడుతున్నాడు మాములు సైనికుడు. ”

***

వివరాలు:
పుస్తకం: ప్రయాణానికే జీవితం (పూనె నుంచి జమ్మూకి మోటర్ సైకిల్ యాత్ర)
రచన: అజిత్ హరిసింఘాని
అనువాదం: కొల్లూరి సోమశంకర్
ప్రతులకు: కినెగె మరియు ఇతర పుస్తకాల షాపులు
http://kinige.com/book/Prayananike+Jeevitam

**** (*) ****