ఇవాళ ఇక్కడి ఆకాశం నిర్మలంగా వుంది
బరువైన ఒక్క నీలి మేఘ సంచారమూ లేదు
సంధ్య నలువైపులా పరుచుకుంటూ వుంది
కంటికి కొంచెం దూరంలోనే ఆకాశాన
కొంత వెలుతురు మడుగు కట్టింది

మనసులో ఆనందం ప్రవహిస్తూ వుంది
ఒక్కటంటే ఒక్కటే చేప చచ్చి తేలింది
అఖ్వేరియంలో మిగిలిన చేపలు
హడావిడిగా ఈదుతున్నాయ్
మిగిలిన గదంతా భద్రం

తను నిశ్శబ్దాన్ని
గాజు సీసాతో బద్దలు కొట్టింది
గాజుకాయ కన్నులు చిట్లాయి
వాష్ బేసిన్లో కాలం జారింది
రేపటి గడియారం రేపటిదే

నక్షత్రపు తాబేలు ఒకటి
ఇచ్చాపూర్వకంగా
దారికి అడ్డం వచ్చింది
ఏమిటటా అని
దగ్గరికి వెళ్ళగానే
భయపడి, చటుక్కున
తల లోపలికి లాక్కుంది

మూసుకుంటున్న కళ్ళ వెనుక
దూది పరుపులు మేట వేసాయి
వాలిన కనురెప్ప
శాంతిగా కావలించింది
సుఖ నిద్ర ప్రయాణాన
తీపిరాగం కమ్ముకుంది

ఇంకా చెప్పాలని వుంది
చాలా
వెనుక పేజీలు లేవు
ముందు పేజీలంతా
ఏదో నాటకపు సుందర చిత్రాలు

నాటకాలు లేని వేదికల గురించి
నువ్వు రాస్తావా?