అంచెలంచలు గా నిద్ర పోవడం
అనేక ప్రసంగాలు విన్నట్టు మేలుకోవడం
రెప్ప చాటు నుండి
ఎవరో తొంగి చూస్తున్నట్టు ఉలిక్కి పడడం
విడదీయ రాని దృశ్యాన్ని
రక్తాలోడుతుంటే రెండుగ చీల్చటం
ఎప్పుడూ ఒక నిందితుడెవడో
మన వెనకే నడుస్తున్నట్టు అన్పించడం
పరివర్తన లేని జీవితాన్ని
ప్రాయోపవేశాల మధ్య బిగించటం
మనల్ని రక్షించే
మనకి గురిచూడడం నేర్పించే
ధనుర్విద్యాపారంగతుడి కోసం వెతకటం
చలనం లో కూడా
నిశ్చలనంగా ఉండటం ఎలాగో తెలియకపోవటం
మరణిస్తూ కూడా
జీవించటం ఎలాగో నేర్వకపోవటం
యేమీ లేని దాన్నుంచి
ఒక నిర్దిష్ట చైతన్య రూపం రావాలి
రెంటిని ఒకటిగా చేసే
విద్య ఏదో
మనకి వంటబట్టాలి