‘దేవుడి పాలన’.. ‘దేవుడి పాలన’ అంటూ అంతా అలా ఊదరగొట్టే సజ్జేగానీ.. ఆ పాలించే దేవుడుగారెవరో ఇతమిత్థంగా ఎవరూ తేల్చిచెప్పరు! ఎందుచేతనంటావ్ బాబాయ్!’

‘నీ ద్యాసీ పొద్దు దేవుడిగారిమీదకు మళ్లిందేరా! వివరాలేమన్నా తెలిస్తే ప్రజాప్రయోజన వ్యాజ్యమేదన్నా వేసేద్దామన్న దుర్భుద్ధయితే కాదుగదా!’

‘అపార్థాలొద్దు బాబాయ్! మన ప్రపంచ జనాభా ఏడొందలకోట్ల పైచిలుక్కి చేరుకుంది కదా ఇప్పటికే! అదే దామాషాలో దేవుళ్లసంఖ్యా పెరుగుతున్నదా.. లేదా.. అని నాకో ధర్మసందేహం! మనకి ముక్కోటి దేవతలున్నట్లు ఎక్కడో చదివాను. ఆ లెక్కన ఒక్కో దేవుడికి రెండువందల ముఫ్ఫైముగ్గురు భక్తులను ఆదుకోవాల్సిన బాధ్యతా భగవంతుళ్ళమీద ఉందిగదా! ఈ కరువు రోజుల్లో అదెంత బరువు! అందుకే వాళ్ళ కష్టనష్టాలేమిటోకూడా కాస్త వాకబు చేద్దామనీ,,!’

‘ఇహనేం! జనగణన మాదిరిగా దైవగణనకీ బైలుదేరూ! ఎలాగూ పనీ పాటా లేనట్లుందిగా నీకీ మధ్య!’

***

అబ్బాయి ముందుగా బ్రహ్మలోకంలోకి ప్రవేశించాడు.

తామరతూడులో తామరాసనుడు లేడు! అక్కడే మానససరోవరం మడుగులో కునికిపాట్లు పడే హంసవాహనం అంది ‘మీ లోకానికి సెకనుకి నాలుగు శాల్తీలయ్యా సరఫరా అవ్వాలి! ఇక్కడికి తిరిగొచ్చేవి మాత్రం ముచ్చటగా రెండంటే రెండే! ఈ లెక్కన మనుషుల్నిచేసే ముడిసరుక్కి ఎంత గిరాకీ వచ్చి పడిందో తెలుసా అబ్బాయ్! పనిభారమూ ఎక్కవపోయింది పాపం మా పెద్దాయనకి. బ్రహ్మ రాసిన నుదుటిరాతల్నీ మీరు అవేవో కంప్యూటర్లో.. పాడో.. వాటి సాయంతో తిరగరాసేసుకుంటున్నారటగా ఈ మధ్య! బోలెడన్ని ఫిర్యాదులు వచ్చిపడుతున్నయ్ బాబూ బ్రహ్మలోకానికి ప్రతీరోజూ! వీటన్నిటికీ చెక్ పెట్టేసే కొత్త సాఫ్టువేరేదన్నా దొరుకుంతేమోనని వాకబు చేసేందుకు వెళ్లారు విశ్వకర్మ దగ్గరకు విధాతగారు’

‘వాణీమాతకూడా కనిపించడం లేదే!’

‘బ్రహ్మ కష్టాలు బ్రహ్మవి. అమ్మ కష్టాలు అమ్మవి. మీ మానవుల బుర్రల్లో బుద్ధి ఎక్కువ కూరడం బుద్ధితక్కువ పనయిందనుకుంటున్నారయ్యా ఇక్కడంతా! అంత కష్టపడి ఎన్నో భాషలు కనిపెట్టి ఇంచక్కా ఎవరి పుట్టుకభాష వాళ్ళు మాట్లాడుకోమంటే.. మీరేం చేస్తున్నార్రా అబ్బాయ్! అన్నింటినీ కలగలిపేసి ఓ కొత్త సంకరభాష తయారు చేసేస్తున్నారు! ‘నా భాష గొప్పదం’టే నా భాష గొప్పద’ని దుర్భాషలలాడుకొంటున్నారు! మైకులముందు మీరు కూసే కూతలు.. పత్రికల్లో మీరు రాసే రాతలు భాషామతల్లికే ఓ పట్టాన బుర్రకెక్కి చావడం లేదు! ‘మానవా! కారుకూతలు మానవా!’ అని మీకు అర్థమయేలా అర్ధించాలన్నా శారదమ్మకూ సంకరభాషే గతయిపోయింది.. ఖర్మ! ఎవరో టీ.వీ యాంకరమ్మట! ఆ పిల్ల దగ్గర సంకర ట్యూషను పెట్టించుకొందీ మధ్య. మా పలుకంజలి. అక్కడికెళ్లింది.. ఇంకా రాలేదు’

అబ్బాయి అటునంచటే విష్ణులోకానికి పయనమయ్యాడు.

పాలకడలిమీది పాముపడగా బోసిగా ఉంది. పరమాత్ముడేమన్నా కొత్త అవతారం ఎత్తేందుకని వెళ్లాడేమో! ఆ మాటే ఆదిశేషుని అడిగితే ఇంతెత్తున బుస్సుమని లేచాడు!

‘అదొక్కటే తక్కువయ్యా ఇప్పుడు మా అవతారమూర్తికి! మీ లోకంలో ఎవరో గాలి సోదరులంటగా! నలభైమూడు కోట్లుపోసి వజ్రవైఢూర్యాలు పొదిగిన స్వర్ణకిరీటమొకటి స్వామివారి నెత్తికి తగలేసారు అప్పుడెప్పుడో! అప్పుడొచ్చిన మాడుపోటు.. ఇప్పటికీ తగ్గలేదు. మా ధన్వంతరిగారి దగ్గరి మందులేవీ పనిచేయడం లేదు. ఆయనా వల్లకాదని చేతులెత్తేస్తే మంచి వైద్యుడేమన్నా దొరుకుతాడేమోనని మీలోకానికే వచ్చారు.. ఇంకా తిరిగి రాలేదు’

‘మరి సిరి? అమ్మగారూ అయ్యగారి వెంటనే వెళ్లారా?’

‘అమ్మో! మీ లోకానికే! డబ్బుకాకలో కొట్టుమిట్టాడుతున్నారంటగా అక్కడ మీరంతా! ఎక్కడే పాపాత్ముడు కట్టిపారేస్తాడోనని స్వామివారే లక్ష్మమ్మ తల్లిని వెంట రావద్దన్నారు.
అయినా.. మీ మానవాధవులమీదే మా తల్లికి ఆదరం ఎక్కువ. అక్కడి బీదాబిక్కిని ఆదుకుందామని వస్తే ఆదిలక్ష్మనికూడా గౌరవం లేకుండా ఏంచేసారయ్యా మీ పెద్దమనుషులు! నల్లరంగు పూసేసి నేలమాళిగల్లో దాచేస్తారా! అహ్వ..!’ అంటూ జిహ్వనిండా నిప్పులు గుమ్మరించాడు ఆదిశేషుడు.

ఇంకాసేపు అక్కడే ఉంటే మాడి మసయిపోవడం ఖాయం.

అబ్బాయి అమాంతం కైలాసం జంప్!

వెండికొండా భూత్ బంగళానే తలపిస్తోంది.

తెల్లకార్డువాళ్లకి చంద్రన్నలిద్దరూ రూపాయిక్కిలో బియ్యం పంచుతున్నారు కదా ఈ మధ్య! దారిద్ర్యరేఖకు ఎల్లప్పుడూ దిగువునే ఉండే మారాజాయ ఈ ఆదిభిక్షువు! చౌకబియ్యంకోసం అటుగానీ వెళ్లాడేమో!

ఆ మాటే అడిగితే ‘కాదయ్యా!’ అంది నంది ‘ఆ ముక్కసరుక్కి కొండలెక్కి దిగాలా మా కైలాసవాసుడు! మింగి హరాయియించుకోడానికి మీ నూకలేమన్నా అలనాటి హాలాహలమా నాయనా! వ్యాహ్యాళికని వెళ్లిన అమ్మవారు వెండికొండకు ఇంకా తిరిగి రాలేదు. ‘విచారిద్దామ’ని వెళ్లారు మా విలయదేవుడు!’ అంది నంది.

దేవుళ్ళంటే ఒక్క త్రిమూర్తులే కాదుగదా!

బాపట్ల భావనారాయణ స్వామివారేమన్నా వివరాలు చెబుతారేమోనని అటుగా వెళ్లాడు అబ్బాయి. ఆ మధ్యనే ఏదో చిన్నగాలితెర వీస్తే నెత్తిమీది గాలిగోపురంకాస్తా ఠప్పుమని కూలిపోయిందట! ఆ కుములుడింకా తీరనే లేదేమో! బైటికొచ్చి మొహం చూపించేందుకే అహం అడ్డొచ్చింది భావనారాయణస్వామివారికి!

శ్రీ కాళహస్తీశ్వరుడి దగ్గరా అదే చేదు అనుభవం. దర్శనభాగ్యం కలగలేదు!

‘ఏడుకొండలవాడి ఆలయానికి బంగారు తాపడాలేమిటి? చిన్నగుళ్లమీద చిన్నచూపేమిటి? దేవుళ్లంతా సమానమే అయినప్పుడు ఒక్కోగుడికి ఒక్కోతీరు కేటాయింపులు.. అన్యాయం!ఈ అసమానత్వం నడవనివ్వం’ అంటూ కొట్లాడేందుకు చిల్లర దేవుళ్లంతా కలిసి కొత్తగా ఓ సంఘం (చి.దే.సం) పెట్టుకొనే పనిలో హడావు’డిగా ఉన్నార’న్న సమాచారం అందింది అబ్బాయికి.

మర్రిచెట్టు నీడలో కునికిపాట్లు పడుతున్న పోతురాజు దొరికాడు చివరికి అతికష్టంమీద. ‘మీరు నిజంగా ముక్కోటి దేవతలేనా! మూడురోజులబట్టీ కాలికి బలపం కట్టుకు తిరుగున్నానయ్యా భగవంతుడా! ఒక్క దేవుడైనా దర్శనమిస్తేనా మగడా!’ అంటూ గట్టిగానే నిలదీసాడు పోతురాజును పట్టుకొని ఆబ్బాయి.

‘గాలి సోదరుల్లాంటి మాఫియా దెబ్బలకు సుంకాలమ్మల్లాంటి గ్రామదేవతలకు నిలవనీడకూడా కరువైపోయింది! కరువు కాటకాలతో అల్లాడే చిన్నా చితకా జనతా.. చిన్నపిల్లలకు ఎక్కడ కాన్వెంటు బళ్లల్లో ఉచిత ప్రవేశాలు.. పెద్దాసుపత్రుల్లో సకల సౌకర్యాలు అడుగుతారోనని కలల్లోనైనా కనిపించేందుకు గడగడలాడుతున్నారయ్యా దేవుళ్లంతా!’ అని మళ్లీ నిద్రకు పడ్డాడు పోతురాజు.

ఒక్క చిన్నదేవుడితోనైనా మాట కలవకుండానే అబ్బాయి దైవగణన కార్యక్రమం అర్థాంతరంగా ముగిసింది.

***

‘పెట్రోలు సుంకాలు తగ్గించమని, పచారీ సామాను చవక దుకాణాల్లోనైనా చవగ్గా ఇప్పించమని, కోతల్లేని కరెంటు కంటిరెప్ప పాటైనా కనికరించమని, నలకలున్నా సరే నాలుగు నిమిషాలకు తగ్గకుండా నల్లాల్లో నీళ్లు ధారకట్టించమని.. ఇలా మనం సవాలక్ష గొంతెమ్మ కోరికలు కడుపులో దాచుకొని వెంటబడితే పాపం.. దేవుళ్లుమాత్రం ఏం చేయగలరు చెప్పు! దోమలు ‘జైకా’ వైరస్సున మోసుకుంటూ ప్రపంచమంతటా ఝామ్మని జైత్రయాత్రలు చేసే తరుణంలో దైవగణనకని బైలుదేరాను చూడు. నాదీ తప్పు! నా ‘ముక్కోటి దేవతల’ సందేహం ప్రస్తుతానికి అలాగే పెండింగులో పడింది బాబాయ్ చివరికి.. ప్చ్!’ అని నుదురుబాదుకొనే డింబకుడితో..

‘ముక్కోటి ఏం ఖర్మరా పిచ్చోడా! మూడొందల కోట్లమంది దేవతలున్నారు.. మన చూట్టూతానే! ఆ దేవుళ్ల దగ్గరికి నువ్వసలు వెళ్లనే లేదు. వెయ్యినోటు చూపిస్తే బొందితో కైలాసానికైనా తోసేస్తామని ప్రకటనలు గుప్పించే బాపతు చిల్లర దేవుళ్ళు.. ఎంత మందున్నారో నీ లెక్కలేం తేలుస్తాయ్.. అమాయకుడా! ఎన్నికల ముందు ‘దేవుడి పాలన’ అందిస్తాం.. ‘దేవుడి పాలన’ అందిస్తామని మన నేతాశ్రీలు.. ఓహో.. అదేపనిగా హామీలు కుమ్మేస్తుంటారు చూడు! ఆ దేవుళ్ళు ఈ దేవుళ్లేరా పిల్లవెధవా! ఆ చిల్లర దేవుళ్ల ఆశీర్వాదాలతోనే మనం ఓట్లేసి గెలిపించే నేతలు మనల్ని టోకున పరిపాలించి పారేస్తున్నది!’ అని కళ్ళు తెరిపించే ప్రయత్నం చేసాడు బాబాయి ఎప్పటి మాదిరిగానే.

**** (*) ****