వెళ్ళిపోకే మనసా
అలా వెళ్ళిపోకే
ఆలోచనల శిఖరాల పైకి
భావ సముద్రాల లోతుల్లోకి
కవితారణ్య సీమల్లోకి
పక్షిలా
చేపలా
కుందేలులా
వెళ్ళిపోకే మనసా
అలా వెళ్ళిపోకే
మహాకవుల శైలిలోకి
మహా స్వాప్నికుల ఊహల్లోకి
కథన రథికుల పథం లోకి
అక్షరమై
ఉత్ప్రేక్షవై
ధూళియై
వెళ్ళిపోకే మనసా
అలా వెళ్ళిపోకే
సిద్ధాంత సౌధాల్లోకి
రాద్ధాంత వీధుల్లోకి
ముఠాలు కట్టిన మఠాల్లోకి
బందీవై
బాధితవై
మూర్ఖవై
వెళ్ళిపోకే మనసా
అలా వెళ్ళిపోకే
తనకు తాను సమధి కట్టుకుని
తనలోకి తాను ముడుచుకుని
తన్ను తాను వేలార్చుకుని
అంతర్ముఖరీ సుప్త మానస వికాసాన్ని
రంగులుగా ఆవిష్కరించే
సీతాకోకచిలుకలా
నేను నన్ను తీర్చుకునేవరకూ
వెళ్ళిపోకే మనసా
అలా వెళ్ళిపోకే
nice