‘ మోహన్ రుషి ’ రచనలు

నమ్మకాలు చెదిరిపోతాయి. నటనలు
వ్యవస్థీకృతమవుతాయి. వాగ్దానాలు
వట్టిపోతాయి. అబద్ధాలు ఆశువుగా
జాలువారతాయి. సందర్భాలు
త్రిశంకుస్వర్గంలో వేలాడదీస్తాయి.
నిశ్శబ్దం గడ్డకట్టుకుపోతుంది. మెదడుకు
దిక్కుతోచదు. దుఃఖించడానికి స్థలం
దొరకదు.

అలమటించి. అలసటించి. అటూఇటూ
పరుగులు. వొంటిపైన కనబడని దేవరోని
కొరడాదెబ్బలు. ఓడి, అల్లాడి, తండ్లాడి. నీ
కన్నీటి సముద్రంలోనే మునిగి, ఒకానొక
అర్ధరాత్రి సమయాన ఒక ఒంటరి చేపవై
ఒడ్డుకు చేరుకుంటావు.

రోడ్డంతా ఖాళీగా వుంటుంది. కొన్ని సంవత్సరాలుగా మనుషుల
జాడ లేనట్లు. రాలిపడ్డ ఆకులు జాలిగా చూస్తుంటాయి. గాలి
మాట లేదు. సిలుం పట్టిన పాత బండి గోడకు ఆనించి
వుంది. రంగు వెలిసిన ఆకాశం. నెర్రెలు బాసిన నేల.

వెనక్కి వెళ్ళనే కూడదు. కేవలం నమ్మకం మీద నడక
సాగించాలి. ఈ దారి గుండానే ప్రయాణించి అటు చివర
ఒకరు ఎదురు చూస్తున్నారు. చెవులు రిక్కించి,
కళ్ళు రస్తాకు అప్పగించి. శ్వాస చివరంచున నిలబడి.

నేననుకోవడం, ఈసారి తప్పకుండా కలుసుకుంటాం.
పరిచయం లేనివాళ్ళను కలపడానికే కదూ, ప్రపంచం
వున్నది?!

ఎదురవుతుంటారు కొందరు. చిటికెనవేలితో శిలువను ఎత్తేవాళ్ళు, చిరునవ్వుల్తో
చీకట్లను తరిమి తరిమి తన్నేవాళ్ళు, సమయాలకు సౌరభాన్ని అద్దేవాళ్ళు,
సంభాషణను సమ్మోహితం చేసేవాళ్ళు, పరిచయాన్ని ప్రపంచం చేసేవాళ్ళు,
సామీప్యాన్ని సందర్భంగా మలిచేవాళ్ళు, జీవితాన్ని ఉత్సవం చేసేవాళ్ళు.

ఇదే భూమ్మీద. కళ్ళలోకి సూటిగా చూసేవాళ్ళు, చెత్తమనుషుల చెవుల్లో సీసాలు పోసేవాళ్ళు,
మాటతో మట్టిముద్దకు ప్రాణం పోసేవాళ్ళు, ఆగమనంతోనే ఆత్మీయులయ్యేవాళ్ళు, వీడ్కోలుతో జీవితంపైని ఆశను పెంచేవాళ్ళు.

నిజమై, నిప్పై, ఉరుమై, చెలిమై, పిలుపై, వలపై, గెలుపై, మలుపై. ఎదురవుతుంటారు కొందరు. జీవనకాంక్షని తెలిపే అరుపై.

వెళ్ళరు వాళ్ళు తిరుగుటపాలో. ఉండనీరు మనల్ని ఉన్న బాక్సుల్లో.

మాట నాలుక కింద మడత పడ్తుంది
బాధ గుండె చుట్టే బేలగా తిరుగుతుంటుంది
చూపుకు ఆనుతున్నదేదో మెదడుకు అందదు
పదమొక్కటీ దొరక్క ప్రాణయాతన-

పెద్దగా ఆప్షన్స్ లేవు; ఏ పక్క గోడకు తల మోదుకుంటావన్నది తప్ప,
ఏ శూన్యంలో తలకిందులుగా వేలాడ్తావన్నది మినహా-

ఏం చేస్తావు నువ్వు?!

చాప మధ్యలో సకిలం ముకిలం వేసుకుని నలుదిక్కులకూ పరుగెడ్తావు
త్రికాలాల్లోకీ అదుపు తప్పిన బస్సులా ప్రయాణాలు చేస్తావు
ఎడమ అరచేత్తో గొంతు బిగ్గరగా అదుముకుంటూ
ఏడుపు కూడా అనాథను చేసిన జీవితాన్ని అదేపనిగా తలపోస్తావు-

ఉన్నవాడివి ఉన్నట్టుగా భూమి లోపల్లోపలికి కనబడకుండా మాయమవ్వాలని అత్యాశిస్తావు, సినికల్ గాపూర్తిగా »